पावसाबाबत महत्त्वाची अपडेट; देशातील 16 राज्यांत मेघगर्जनेसह मुसळधार पावसाचा इशारा

हिमाचल प्रदेशातील कांग्रा, शिमला, कुल्लू आणि चंबा येथे मेघगर्जना आणि विजांचा धोका आहे, तर उत्तराखंडमध्ये १६-१७ ऑगस्ट रोजी विशेष सावधगिरी बाळगण्याचा सल्ला देण्यात आला आहे.

नवी दिल्ली : देशाच्या अनेक भागांत शनिवारी मुसळधार पावसाची शक्यता आहे. हवामान विभागाने १६ राज्यांत मुसळधार पाऊस, मेघगर्जनेसह पाऊस आणि विजांच्या कडकडाटाचा इशारा दिला आहे. या काळात किनारपट्टी आणि मैदानी भागांमध्ये ताशी ४० ते ८० किमी वेगाने जोरदार वारे वाहण्याची शक्यता आहे.

हवामान विभागाच्या अंदाजानुसार, बंगालच्या उपसागरावरील कमी दाबाचे क्षेत्र येत्या काही दिवसांत तीव्र होऊन त्याचे खोल दाबात रूपांतर होण्याची शक्यता आहे. ही प्रणाली बंगाल आणि झारखंडमधून वायव्य दिशेने सरकेल, ज्यामुळे पूर्व आणि मध्य भारतातील पावसाचा जोर वाढेल. देशात सर्वत्र पावसाचा इशारा देण्यात आला आहे. राजस्थानातील जोधपूर, उदयपूर आणि अजमेर विभागांमध्ये पावसाचे प्रमाण कमी होईल. तथापि, बिकानेर, जयपूर, भरतपूर आणि कोटा विभागांच्या काही भागांमध्ये मध्यम ते मुसळधार पावसाची शक्यता आहे.

India caste census : जात मोजणार, पण नेमकी कशी? जनगणना २०२७ मधील जातनिहाय आकडेवारीवरून का वाद?

दरम्यान, उत्तर प्रदेशातील मेरठ, वाराणसी, अयोध्या, मोरादाबाद आणि बिजनौरसह अनेक जिल्ह्यांमध्ये १५ ते १८ ऑगस्ट दरम्यान हलका ते जोरदार पाऊस पडण्याची शक्यता आहे. या काळात वीज पडण्याचीही शक्यता आहे.

मुसळधार पावसासाठी विशेष सतर्कतेचा इशारा

बिहार, पंजाब, डोंगराळ राज्ये राज्याच्या अनेक भागांमध्ये पाऊस पडेल. १७ आणि १८ ऑगस्ट रोजी मुसळधार पावसासाठी विशेष सतर्कतेचा इशारा देण्यात आला आहे. हिमाचल प्रदेश आणि उत्तराखंडमध्ये १५ ते १९ ऑगस्टपर्यंत मुसळधार पाऊस सुरू राहील.

पावसाचा हा कल 19 ऑगस्टपर्यंत सुरू

हिमाचल प्रदेशातील कांग्रा, शिमला, कुल्लू आणि चंबा येथे मेघगर्जना आणि विजांचा धोका आहे, तर उत्तराखंडमध्ये १६-१७ ऑगस्ट रोजी विशेष सावधगिरी बाळगण्याचा सल्ला देण्यात आला आहे. पंजाबच्या काही भागांमध्ये मुसळधार पावसाची शक्यता आहे. पावसाचा हा कल १९ ऑगस्टपर्यंत सुरू राहील.

जपानमध्ये पुराचे चार बळी

जपानमधील पूर्व टोकियोमध्ये रात्री झालेल्या मुसळधार पावसामुळे आलेल्या पुरात किमान ४ जणांचा मृत्यू झाला असून, एक व्यक्ती बेपत्ता आहे. या पुरामुळे रस्ते आणि अनेक घरे पाण्याखाली गेली, वीजपुरवठा खंडित झाला आणि बाधित भागांमध्ये हजारो लोक अडकून पडले.