Recipe: सोप्या पद्धतीने घरीच बनवा साऊथ स्टाईल सांबार; जाणून घ्या स्टेप-बाय-स्टेप रेसिपी

South Style Sambhar Recipe: जर तुम्हालाही घरच्याघरी साऊथ स्टाईल सांबार बनवायाचा असेल तर ही सोपी रेसिपी नक्की ट्राय करा.

दक्षिण भारतीय पदार्थांमध्ये सांबार हा सर्वात लोकप्रिय आणि पौष्टिक पदार्थ मानला जातो. इडली, डोसा, मेदूवडा किंवा गरमागरम भातासोबत सांबार खाण्याची मजाच वेगळी असते. डाळ, भाज्या, चिंचेचा आंबटपणा आणि खास मसाल्यांचा सुगंध यामुळे सांबारची चव अधिक खुलते. योग्य प्रमाणात भाज्या आणि मसाले वापरले तर घरच्या घरीही अगदी हॉटेलसारखा स्वादिष्ट सांबार तयार करता येतो. सांबार बनवण्यासाठी लागणाऱ्या भाज्या, मसाले आणि त्याची सोपी रेसिपी, जाणून घ्या.

घरच्या घरी सोप्या पद्धतीने बनवा साऊथ स्टाईल मेदू वडा, वाचा सोपी रेसिपी

सांबार बनवण्यासाठी लागणारे साहित्य

• १ कप तूर डाळ
• ३ कप पाणी
• ¼ चमचा हळद
• चवीनुसार मीठ
• शेवग्याच्या शेंगा
• गाजर
• भोपळा
• वांगे
• भेंडी
• छोटा कांदा
• १ टोमॅटो
• चिंच
• २ चमचे सांबार मसाला
• चिमूटभर हिंग
• १ चमचा मोहरी
• ½ चमचा मेथीदाणे
• २ सुक्या लाल मिरच्या
• १०-१२ कढीपत्त्याची पाने
• २ चमचे तेल किंवा तूप
• कोथिंबीर
• चवीसाठी थोडासा गूळ

सांबार बनवण्याची स्टेप-बाय-स्टेप पद्धत

सर्वप्रथम तूर डाळ स्वच्छ धुऊन कुकरमध्ये घ्या. त्यात पाणी, हळद आणि थोडे तेल घालून ३ ते ४ शिट्ट्या होईपर्यंत शिजवा. डाळ व्यवस्थित मऊ झाल्यावर चमच्याने किंवा घोट्याने मॅश करून बाजूला ठेवा. यानंतर, एका मोठ्या भांड्यात सर्व चिरलेल्या भाज्या आणि थोडे पाणी घालून शिजवून घ्या. भाज्या जास्त मऊ होणार नाहीत याची काळजी घ्या. चिंच थोडा वेळ पाण्यात भिजवून तिचा कोळ वेगळा करुन घ्या. हा कोळ भाज्यांमध्ये घाला. त्यानंतर सांबार मसाला, हिंग आणि मीठ घालून ५ ते ७ मिनिटांसाठी मिश्रण उकळवा. आता शिजवलेली डाळ या मिश्रणात घाला आणि नीट एकजीव करा. सांबार जास्त घट्ट वाटत असल्यास थोडे गरम पाणी घाला. नंतर ५ ते १० मिनिटे मंद आचेवर उकळू द्या. एका छोट्या पॅनमध्ये तेल गरम करा. त्यात मोहरी, मेथीदाणे, लाल मिरच्या आणि कढीपत्ता घाला. मोहरी तडतडली की ही फोडणी तयार झालेल्या सांबारवर घाला. शेवटी वरून ताजी कोथिंबीर घाला. गरमागरम सांबार इडली, डोसा, वडा किंवा भातासोबत सर्व्ह करा.

परफेक्ट सांबारसाठी खास टिप्स

• सांबार बनवल्यानंतर १५-२० मिनिटे झाकून ठेवल्यास चव अधिक मुरते.
• भेंडी वापरत असल्यास ती आधी हलकी परतून घातल्यास चिकटपणा कमी होतो.
• थोडासा गूळ घातल्यास आंबट आणि तिखट चवीचा उत्तम समतोल साधला जातो.

Recipe: उरलेल्या भातापासून बनवा क्रिस्पी मंचुरियन, नोट करा झटपट आणि चविष्ट रेसिपी