डाळ तांदूळ न आंबवता १० मिनिटांमध्ये हिरव्या मुगांपासून बनवा कुरकुरीत डोसा, झटपट तयार होणारी सोपी रेसिपी

सकाळच्या नाश्त्यासाठी तुम्ही सोप्या पद्धतीमध्ये भिजवलेल्या हिरव्या मुगाचा डोसा बनवू शकता. हा पदार्थ चवीसोबतच आरोग्यासाठी सुद्धा अतिशय गुणकारी आहे. जाणून घ्या रेसिपी.

कामाच्या धावपळीमध्ये सकाळच्या वेळी नाश्ता बनवण्यासाठी जास्त वेळ मिळत नाही. त्यामुळे नाश्त्यात बाहेरून विकत आणलेले किंवा ब्रेड बटर, बिस्कीट इत्यादी पदार्थ विकत आणून खाल्ले जातात. पण कायमच नाश्त्यात विकतच्या पदार्थांचे सेवन केल्यास शरीराची पचनक्रिया बिघडण्याची खूप जास्त शक्यता असते. घरात कायमच रवा, उपमा, पोहे, इडली, डोसा इत्यादी पदार्थ खाऊन सगळ्यांचं खूप जास्त कंटाळा येतो. म्हणूनच आज आम्ही तुम्हाला सोप्या पद्धतीमध्ये भिजवलेल्या हिरव्या मुगाचे डोसे बनवण्याची सोपी रेसिपी सांगणार आहोत. हिरवे मूग खायला अनेकांना आवडत नाही. अशावेळी तुम्ही काहींना काही पदार्थ बनवून मुलांना खाण्यास देऊ शकता. साऊथ इंडियन पदार्थ बनवण्यासाठी उडीद डाळ आणि तांदूळ भिजवून पीठ तयार करावे लागते. मात्र कामाच्या धावपळीमध्येपीठ आंबवण्यासाठी वेळ मिळत नाही. त्यामुळे तुम्ही सोप्या पद्धतीमध्ये भिजवलेल्या मुगाचे डोसे बनवू शकता. चला तर जाणून घेऊया झटपट तयार होणारी रेसिपी.(फोटो सौजन्य – istock)

कुरकुरीत नाश्ता चहाची मजा वाढवेल, यंदा घरी बटाट्याचे नाही तर लालचुटुक बीटरूट चिप्स बनवून पहा; रेसिपी नोट करा

साहित्य:

• भिजवलेले हिरवे मूग
• हिरवी मिरची
• आलं
• लसूण
• मीठ
• कोथिंबीर
• नाचणीचे पीठ
• हळद
• तूप
• पाणी

थंडीत लहान मुलांच्या नाश्त्यासाठी बनवा नाचणीचे हॉट चॉकलेट! शरीरातील सर्वच हाडे होतील मजबूत, नोट करा रेसिपी

कृती:

• हिरव्या मुगाचा डोसा बनवण्यासाठी सर्वप्रथम, मिक्सरच्या भांड्यात भिजवलेले मूग, हिरव्या मिरच्या, लसूण पाकळ्या, आलं पेस्ट, जिरे, कोथिंबीर आणि चवीनुसार मीठ घालून पेस्ट तयार करा.
• मुगाची पेस्ट जास्त पातळ किंवा जाड करू नये. अन्यथा डोसे व्यवस्थित येणार नाहीत.
• तयार केलेली पेस्ट वाटीमध्ये काढून त्यात ओल्या खोबऱ्याचा किस आणि नाचणीचे पीठ घालून बॅटर मिक्स करा. त्यानंतर त्यात आवश्यकता वाटल्यास पाणी घालून डोसाचे पीठ तयार करावा.
• तवा गरम करून त्यावर तूप लावा. त्यानंतर गरम तव्यावर डोसा घालून व्यवस्थित एकसमान पसरवून घ्या.
• डोसा दोन्ही बाजूने व्यवस्थित कुरकुरीत भाजून घ्या. यामुळे डोसाची चव आणखीनच सुंदर लागेल.
• तयार आहे सोप्या पद्धतीमध्ये बनवलेला भिजवलेल्या मुगाचा डोसा. हा पदार्थ खोबऱ्याच्या चटणीसोबत अतिशय सुंदर लागेल.