उन्हाळ्यात वाटेल ताजेतवाने आणि फ्रेश! १० मिनिटांमध्ये झटपट घरी बनवा थंडगार कैरीचे सरबत, नोट करा रेसिपी

आज आम्ही तुम्हाला सोप्या पद्धतीमध्ये कच्च्या कैरीचे सरबत बनवण्याची सोपी रेसिपी सांगणार आहोत. या पद्धतीने बनवलेले सरबत चवीला अतिशय सुंदर लागते. जाणून घ्या रेसिपी.

राज्यासह संपूर्ण देशभरात कडक ऊन पडत आहे. वातावरणात सतत होणाऱ्या बदलांमुळे शरीराची खूप जास्त काळजी घ्यावी. उन्हात कुठेही बाहेर जाऊन आल्यानंतर भरपूर पाण्याचे आणि थंड पदार्थांचे सेवन करावे. कारण घामावाटे शरीरातील पाणी बाहेर पडून जाते. ज्याच्या परिणामामुळे थकवा, अशक्तपणा वाढतो आणि आरोग्य बिघडते. कायमच थंडगार कोल्ड्रिंक किंवा इतर हानिकारक पेयांचे सेवन करण्याऐवजी घरी बनवलेले थंडगार सरबत प्यावे. म्हणूनच आज आम्ही तुम्हाला कच्च्या कैरीचे सरबत बनवण्याची सोपी रेसिपी सांगणार आहोत. उन्हाळ्याच्या दिवसांमध्ये बाजारात कच्ची कैरी मोठ्या प्रमाणावर उपलब्ध असते. आंबटगोड चवीची कच्ची कैरी सगळ्यांचं खायला खूप जास्त आवडते. पण आंबट कैरी खाल्ल्यानंतर काहींचे दात आंबट होतात. अशावेळी कैरीचे सेवन करण्याऐवजी कैरीपासून बनवलेले सरबत प्यावे. यामुळे शरीरात वाढलेली उष्णता आणि पोटात वाढलेली जळजळ कमी होण्यास मदत होते.चला तर जाणून घेऊया कच्च्या कैरीचे सरबत बनवण्याची कृती.(फोटो सौजन्य – pinterest)

भाजणी बनवण्याचे टेन्शन कायमचे जा विसरून! १० मिनिटांमध्ये झटपट बनवा वाटीभर पोह्यांचे खमंग थालीपीठ

साहित्य:

• कच्ची कैरी
• साखर
• जिरं
• बर्फाचे खडे
• मीठ
• काळे मीठ
• पुदिन्याची पाने

Summer Special : उन्हाळ्यात वाढतो डिहायड्रेशनचा त्रास; घरी बनवा थंडगार अन् चटपटीत चवीचा ‘पुदिना सरबत’

कृती:

• कैरीचे सरबत बनवण्यासाठी सर्वप्रथम, कैरी स्वच्छ धुवून साल काढा आणि बारीक तुकडे करून घ्या.
• मिक्सरच्या भांड्यात कैरीचे तुकडे, पुदिन्याची पाने आणि जिरं घालून बारीक वाटून घ्या.
• त्यानंतर तयार केलेले मिश्रण कॉटनच्या कपड्यावर घेऊन गाळून घ्या. त्यानंतर त्यात आवश्यकतेनुसार साखर घालून मिक्स करा.
• तयार केलेल्या सरबतमध्ये चवीनुसार काळे मीठ घालून व्यवस्थित मिक्स करून घ्या.
• काचेच्या ग्लासला लाल तिखट मिठाचे मिश्रण कडेने लावा. त्यानंतर त्यात बर्फाचे खडे आणि कैरीचे तुकडे घाला.
• वरून तयार केलेले सरबत घालून पिण्यासाठी सर्व्ह करा.
• तयार आहे सोप्या पद्धतीमध्ये बनवलेले थंडगार कैरीचे सरबत.