मंगळवार, 29 सप्टेंबर 2026
(फोटो सौजन्य-AI एआय)
तासगाव आणि खानापूर तालुक्याच्या सीमेवर असलेला कोळदुर्ग किल्ला पावसाळ्यात हिरवाईने नटत असतो. किल्ल्याच्या परिसरातील धबधबा या काळात आकर्षणाचे केंद्र बनत असून, त्याच ठिकाणी दोराच्या साहाय्याने कडा उतरण्याचा साहसी थरारक अनुभव घेतला जात आहे. धबधब्याच्या प्रवाहातून खाली उतरताना तरुणांना ट्रेकिंगसोबत रॅपलिंगच्या साहसाचाही अनुभव मिळत आहे.
रॅपलिंगसारख्या साहसी प्रकारात केवळ धाडस पुरेसे नसते, तर योग्य प्रशिक्षण, शारीरिक तंदुरुस्ती आणि सुरक्षा उपकरणांचा वापरही महत्त्वाचा ठरत असतो. या रॅपलिंगच्या उपक्रमात हेल्मेट, हार्नेस आणि सुरक्षा दोराचा वापर केला जात असतो, तज्ज्ञ मार्गदर्शकांच्या देखरेखीखाली इथे दोरखंडानी धबधबा चढला उतरला जातो, ज्याला रॅपलिंग असे म्हणले जाते. त्यामुळे सुरक्षेच्या नियमांना विशेष महत्त्व दिले जात आहे.
सह्याद्रीतील किल्ले, घाटवाटा आणि धबधबे यांची भटकंती करणाऱ्या तरुणांमध्ये अशा साहसी उपक्रमांविषयी दिवसेंदिवस उत्सुकता वाढत आहे. कोळदुर्गसारख्या तुलनेने कमी परिचित आणि ‘Untouched From Human Life’ ठिकाणांकडे पर्यावरणपूरक साहसी पर्यटनाच्या दृष्टीने पाहण्याची संधीही निर्माण होत आहे.
रॅपलिंग हा तसा साहसी क्रीडा प्रकार असल्याने त्यासाठी सशक्त शारीरिक क्षमता आणि योग्य मार्गदर्शन आवश्यक असते. वय जास्त असलेल्या किंवा शारीरिक अडचणी असलेल्या व्यक्तींनी तज्ज्ञांचा सल्ला घेतल्याशिवाय अशा उपक्रमात सहभागी होऊ नये, असे आयोजकांकडून सांगितले जात आहे.
सांगली-सातारा भागातून प्रथमच अशा स्वरूपाचे वॉटरफॉल रॅपलिंग होत असल्याने स्थानिक साहसी पर्यटनाच्या दृष्टीने या उपक्रमाकडे पाहिले जात आहे. या मोहिमेचे फोटो आणि व्हिडिओ ‘दुर्गम सह्याद्री’ ट्रेकर्सच्या सोशल मीडिया पेजवर शेअर केले जात असून, कोळदुर्ग परिसरातील अत्यंत साहसी दुर्गभ्रमंतीकडे तरुणांचे लक्ष मोठ्या वेगाने वेधले जात आहे.
