Breast Cancer Screening : महाराष्ट्रात स्तन कर्करोग तपासणी, ‘आयब्रेस्टएक्झाम’ द्वारे १ लाखांहून अधिक महिलांची तपासणी

Breast Cancer Screening : ब्रेस्ट कॅन्सर अवेअरनेस मंथनिमित्त महाराष्ट्रात महिलांच्या स्तनाच्या आरोग्याची नियमित तपासणी आणि स्तनाच्या कर्करोगाचे सुरुवातीच्या टप्प्यात निदान करण्यासाठी आयब्रेस्टएक्झाम (iBreastExam) तंत्रज्ञानाचा वापर केला जात आहे.

• तपासणीदरम्यान ४,९०० हून अधिक महिलांमध्ये वैद्यकीयदृष्ट्या लक्ष 
• २२ शासकीय वैद्यकीय महाविद्यालयांमध्ये ४४ आयब्रेस्टएक्झाम डिवाईसेस   
• फॉलो-अप आणि योग्य वैद्यकीय मूल्यमापन होणे तितकेच आवश्यक  

Breast Cancer Screening  : ब्रेस्ट कॅन्सर अवेअरनेस मंथ निमित्त महिलांमध्ये स्तनाच्या आरोग्याची नियमित तपासणी आणि आजाराचे सुरुवातीच्या टप्प्यात निदान होण्याचे महत्त्व अधोरेखित केले जात आहे. महाराष्ट्रात समुदाय-आधारित तपासणी उपक्रमांद्वारे ‘आयब्रेस्टएक्झाम’ (iBreastExam) तंत्रज्ञान दुर्लक्षित व वंचित घटकांपर्यंत स्तनाच्या आरोग्याच्या तपासणीची सुविधा पोहोचवण्यासाठी आणि वेळेवर वैद्यकीय सल्ला मिळवून देण्यासाठी महत्त्वपूर्ण भूमिका बजावत आहे.

तपासणीदरम्यान ४,९०० हून अधिक महिलांमध्ये वैद्यकीयदृष्ट्या लक्ष

एम्पथी फाउंडेशनच्या सहकार्याने महाराष्ट्रात राबवण्यात आलेल्या या उपक्रमाच्या पहिल्या टप्प्यात १२ महिन्यांच्या कालावधीत १,०१,२०० हून अधिक महिलांची तपासणी करण्यात आली असून १ लाख महिलांच्या सुरुवातीच्या उद्दिष्टाला पार करण्यात आले आहे. या तपासणीदरम्यान ४,९०० हून अधिक महिलांमध्ये (४.९ टक्के) वैद्यकीयदृष्ट्या लक्ष देण्याजोग्या गाठी आढळल्या असून त्यांना पुढील वैद्यकीय मूल्यमापनासाठी आणि उपचारांसाठी मार्गदर्शन करण्यात आले आहे.

Hedache Causes: सकाळी उठल्यानंतर कायमचं डोकं दुखत? ‘ही’ लक्षणे दिसताच अजिबात करू नका दुर्लक्ष, आजारांपासून मिळेल सुटका

२२ शासकीय वैद्यकीय महाविद्यालयांमध्ये ४४ आयब्रेस्टएक्झाम डिवाईसेस

पहिल्या टप्प्यातील यशानंतर, आता दुसऱ्या टप्प्यांतर्गत महाराष्ट्रातील २२ शासकीय वैद्यकीय महाविद्यालयांमध्ये ४४ आयब्रेस्टएक्झाम डिवाईसेस तैनात करण्यात आली आहेत, ज्याद्वारे राज्यातील ४.४ लाख अतिरिक्त महिलांपर्यंत ही सेवा पोहोचवण्याचा मानस आहे.

आयब्रेस्टएक्झाम हे बॅटरीवर चालणारे, वेदनारहित आणि रॅडिएशन-मुक्त पोर्टेबल डिवाईस असून ते पेशींमधील असामान्य कडकपणा ओळखण्याचे काम करते. हे तंत्रज्ञान क्लिनिक्स, आरोग्य शिबिरे आणि थेट समुदाय स्तरावर सहजरीत्या वापरता येते.

या उपक्रमाबाबत बोलताना *युई लाइफसायन्सेसच्या भारतातील सीईओ श्रीमती गौरी नवलकर-गोडसे* म्हणाल्या, “सुरुवातीच्या टप्प्यात निदान होण्यासाठी स्तनाच्या आरोग्याची तपासणी अधिक सहज उपलब्ध करणे आणि महिलांना वेळेवर वैद्यकीय सल्ला घेण्यासाठी प्रोत्साहित करणे आवश्यक आहे. महाराष्ट्रातील प्रगतीवरून ही सुविधा थेट समुदायांपर्यंत पोहोचवण्याचे आणि असामान्य गाठ आढळल्यापासून ते वैद्यकीय मूल्यांकनापर्यंतचा मार्ग सुलभ करण्याचे महत्त्व स्पष्ट होते. जनजागृती, सुलभ उपलब्धता आणि पाठपुरावा यावर सातत्यपूर्ण काम करणे गरजेचे आहे.”

फॉलो-अप आणि योग्य वैद्यकीय मूल्यमापन होणे तितकेच आवश्यक

पीडी हिंदुजा हॉस्पिटलच्या जनरल आणि इंटरनल मेडिसिन फिजिशियन डॉ. मोनिका गोयल यांनी सांगितले, “स्तनाच्या नियमित तपासणीची सुविधा नसलेल्या महिलांपर्यंत पोहोचण्यासाठी समुदाय-आधारित तपासणी महत्त्वाची भूमिका बजावते. गाठ ओळखणे हे महत्त्वाचे पहिले पाऊल असून त्यानंतर वेळेवर फॉलो-अप आणि योग्य वैद्यकीय मूल्यमापन होणे तितकेच आवश्यक आहे. हे उपक्रम वंचित घटकांमध्ये जनजागृती वाढवण्यास आणि महिलांना आरोग्यदायी पावले उचलण्यास प्रेरित करतात.”

सुलभ तपासणी, जनजागृती, वेळेवर वैद्यकीय सल्ला आणि योग्य पाठपुरावा यांची सांगड घालून स्तनाच्या कर्करोगाविरुद्धचा लढा अधिक सक्षम करण्यासाठी हे उपक्रम अत्यंत मोलाचे ठरत आहेत.

Menopause: वयाच्या तिशीनंतर महिलांच्या शरीरात होतात ‘हे’ मोठे बदल, रजोनिवृत्तीच्या काळात स्वतःच्या आरोग्याची घ्या योग्य काळजी