गुरुवार, 29 ऑक्टोबर 2026
एसएनए स्पर्श प्रणालीने मुख्याध्यापक त्रस्त! अनुदान खर्चाची प्रक्रिया सुलभ करण्याची शिक्षक समितीची मागणी
Amravati News: जिल्हा परिषद प्राथमिक शाळांना मिळणाऱ्या विविध अनुदानांच्या खर्चासाठी लागू करण्यात आलेल्या एसएनए स्पर्श प्रणालीमुळे मुख्याध्यापकांना तांत्रिक आणि प्रशासकीय अडचणींचा सामना करावा लागत आहे.संथ सव्र्व्हर, ऑनलाइन प्रक्रियेतील किचकटपणा आणि ओटीपीसाठी मिळणारी अवघ्या एका मिनिटाची मुदत यामुळे मुख्याध्यापकांचा अध्यापनासह शालेय कामकाजाचा वेळ खर्च होत आहे. या प्रणालीतील अडचणी दूर करून अनुदान खर्चाची प्रक्रिया सुलभ करावी, अशी मागणी महाराष्ट्र राज्य प्राथमिक शिक्षक समितीने केली आहे.(फोटो सौजन्य – AI)
जिल्हा परिषद प्राथमिक शाळांना दरवर्षी शाळा अनुदान, बांधकाम अनुदान, शालेय गणवेश अनुदान तसेच बूट व मोजे खरेदीसाठी विविध अनुदाने दिली जातात. यापूर्वी या अनुदानांच्या खर्चाची प्रक्रिया पंचायत समिती स्तरावरून पूर्ण केली जात होती. मात्र, यंदा एसएनए स्पर्श प्रणालीद्वारे मुख्याध्यापकांनाच ही प्रक्रिया पूर्ण करावी लागत आहे. या प्रक्रियेत दुकानदारांकडून देयके घेणे, शाळा व्यवस्थापन समितीच्या अध्यक्षांचा आदेश प्राप्त करणे आणि आवश्यक कागदपत्रे ऑनलाइन अपलोड करणे आवश्यक आहे. त्यानंतर अध्यक्ष, दुकानदार आणि मुख्याध्यापक यांच्या आधारशी संलग्न मोबाईल क्रमांकांवर येणाऱ्या ओटीपीच्या माध्यमातून देयक मंजुरीची प्रक्रिया पूर्ण केली जाते. त्यानंतर संबंधित दुकानदाराच्या खात्यात रक्कम जमा होते.
ग्रामीण भागातील इंटरनेटची समस्या, सव्र्व्हरची संथ गती आणि शाळा व्यवस्थापन समितीच्या अध्यक्षांशी वेळेत संपर्क साधण्यात येणाऱ्या अडचणींमुळे ही प्रक्रिया पूर्ण करणे कठीण होत आहे. ओटीपीसाठी अवघा एक मिनिटाचा कालावधी मिळत असल्याने अध्यक्ष वेळेत उपलब्ध न झाल्यास व्यवहाराची प्रक्रिया पुन्हा करावी लागते. परिणामी, मुख्याध्यापकांचा वेळ आणि श्रम दोन्ही खर्च होत आहेत. विशेष म्हणजे, ठरवून दिलेल्या मुदतीत अनुदान खर्चाची प्रक्रिया पूर्ण न झाल्यास निधी परत जाण्याची शक्यता आहे. अशा परिस्थितीत संबंधितांना जबाबदार धरून कारवाई करण्याच्या सूचना दिल्या जात असल्याने मुख्याध्यापकांमध्ये चिंतेचे वातावरण आहे.
या अडचणींबाबत मुख्याध्यापकांनी शिक्षक संघटनेच्या पदाधिकाऱ्यांकडे मदत मागितली. त्यानंतर महाराष्ट्र राज्य प्राथमिक शिक्षक समितीच्या पदाधिकाऱ्यांनी समग्र शिक्षा अभियानाच्या लेखाधिकाऱ्यांची भेट घेऊन प्रणालीतील तांत्रिक अडचणी आणि प्रत्यक्ष कामकाजात येणाऱ्या समस्यांवर चर्चा केली. या समस्या वरिष्ठ स्तरावर मांडण्यासाठी शिक्षण विभागाच्या सचिवांशी व्हिडिओ कॉन्फरन्सद्वारे चर्चा घडवून आणावी, अशी मागणीही करण्यात आली. एसएनए स्पर्श प्रणाली अधिक सुलभ करणे, सर्व्हरचा वेग वाढविणे, ओटीपीची मुदत वाढविणे आणि अनुदान खर्चासाठी दिलेला कालावधी वाढविणे आवश्यक असल्याचे शिक्षक समितीच्या पदाधिकाऱ्यांनी स्पष्ट केले.
SNA SNA स्पर्श शक्य असल्यास पूर्वीप्रमाणेच अनुदान खर्चाची जबाबदारी गट साधन केंद्रांकडे सोपवावी, अशी मागणीही समितीने केली आहे. तांत्रिक अडचणी तातडीने दूर करून मुख्याध्यापकांना दिलासा द्यावा आणि त्यांना अध्यापन व शैक्षणिक कामकाजासाठी अधिक वेळ उपलब्ध करून द्यावा, अशी अपेक्षा शिक्षक समितीने व्यक्त केली आहे.
