
पाचगणीत घराला भीषण आग; अनेक संसारोपयोगी आगीत जळून खाक, 4 लाखांचे नुकसान
पाटण : पाचगणी (ता.पाटण) येथे रंजना ईश्वर सुर्वे यांच्या राहत्या घरास अचानक आग लागली. या आगीत सर्व अन्नधान्य, कपडे, कागदपत्रे, सोन्याच्या मौल्यवान वस्तू, किरकोळ वस्तू तसेच ३० हजार रुपये जळून नुकसान झाले आहे. आगीत घराच्या केवळ भिंतीच शिल्लक राहिल्या आहेत. सुदैवाने यात कोणतीही जीवितहानी झालेली नाही. मात्र, आगीत रंजना सुर्वे यांचे जवळपास चार लाखांचे आर्थिक नुकसान झाले आहे.
याबाबत अधिक माहिती अशी, तालुक्यातील मोरगिरी विभागातील दुर्गम ठिकाणी वसलेल्या पाचगणी येथे रंजना सुर्वे यांचे घर आहे. त्या शुक्रवारी मजुरीसाठी कामावर गेल्या होत्या. रात्री नऊच्या सुमारास घराला अचानक आग लागल्याचे ग्रामस्थांच्या निदर्शनास आले. ग्रामस्थांनी आग विझविण्याचा प्रयत्न केला. मात्र, आगीत संपूर्ण घर जळून खाक झाले. आगीचे कारण समजू शकले नाही. शेजाऱ्यांनी सुर्वे यांना त्यांच्या घरी थांबवून योग्य तो आधार दिला. आगीत अन्नधान्य, कपडे, कागदपत्रे, सोन्याच्या वस्तू, किरकोळ वस्तू तसेच 30 हजार रुपयांची रोकड जळून नुकसान झाले आहे. आगीत घराच्या केवळ भिंतीच शिल्लक राहिल्या आहेत.
हेदेखील वाचा : मोठी बातमी! बिग बॉस फेम शिव ठाकरेच्या घराला भीषण आग, Video व्हायरल
दरम्यान, या आगीचा पंचनामा गावकामगार तलाठी, पाचगणी व सर्कल मोरगिरी यांनी जागेवर जाऊन केला आहे. आगीत सुर्वे यांचे ४ लाख रुपयांचे मोठे आर्थिक नुकसान झाले आहे. पंचनाम्याप्रसंगी मोरगिरी विभागाचे माजी जिल्हा परिषद सदस्य बशीर खोंदू, सरपंच सुरेश शेंडे, माजी सरपंच आनंदा सुर्वे, बंडू सुर्वे, आत्माराम सुर्वे व ग्रामस्थ उपस्थित होते.
मदतीसाठी आवाहन
जळीतग्रस्त सुर्वे कुटुंबाला आर्थिक व इतर मदत मिळण्यासाठी तहसीलदार यांना पालकमंत्री शंभूराज देसाई यांच्या कार्यालयाकडून सूचना देण्यात आल्या आहेत. जळीतग्रस्त कुटुंबाला दानशूर लोकांनी मदतीचा हात पुढे करावा, असे आवाहन माजी जिल्हा परिषद सदस्य बशीर खोंदू यांनी केले आहे.
अभिनेता शिव ठाकरेच्या घराला आग
रोडीज आणि बिग बॉस फेम अभिनेता शिव ठाकरे याच्या गोरेगाव येथील निवासस्थानी आग लागल्याची घटना काही दिवसांपूर्वी घडली होती. त्याच्या टीमने दिलेल्या अधिकृत माहितीनुसार, अभिनेता सुरक्षित आहे. आणि त्याला कोणतीही दुखापत झालेली नाही. सोशल मीडियावर त्याच्या घराला लागलेल्या आगीचे काही व्हिडीओ व्हायरल होत आहेत. या व्हिडीओमधून आगीमुळे शिव ठाकरेच्या घराचं नुकसान झाल्याचं दिसत आहे.