रविवार, 8 नोव्हेंबर 2026
पोलीस निरीक्षक मोहन बोरसे यांनी स्मशानभूमीत साजरी केली अनोखी दिवाळी
पोपट पिटेकर, शेवगाव,अहिल्यानगर : दिवाळी म्हणजे प्रकाशाचा सण, आनंदाचा सण आणि कटुता विसरून एकमेकांच्या आयुष्यात उजेड पसरवण्याचा सण…ही केवळ एक आणि दोन ओळींची व्याख्या नाही, तर तिचा प्रत्यय शेवगाव शहरात खऱ्या अर्थाने आला आहे. नेहमीच आपल्या धडक कारवाई आणि हटके सामाजिक उपक्रमांमुळे चर्चेत असणारे शेवगाव पोलीस स्टेशनचे पोलीस निरीक्षक मोहन बोरसे यांनी पुन्हा एकदा आपल्या संवेदनशील आणि माणुसकीने भरलेल्या कृतीने संपूर्ण महाराष्ट्राचे लक्ष वेधले आहे. (Ahilyanagar News)
महाराष्ट्राच्या राजकारणात आणि समाजकारणात अनेक कौतुकास्पद घटना घडत असतात, परंतु पोलीस दलातील एका जबाबदार अधिकाऱ्याने आपल्या पत्नीसह आणि सहकाऱ्यांसोबत थेट स्मशानभूमीत राहणाऱ्या उपेक्षित कुटुंबासोबत दिवाळी साजरी करण्याची कदाचित महाराष्ट्रातील ही पहिलीच आणि अत्यंत प्रेरणादायी घटना असावी.
गेल्या अनेक वर्षांपासून शेवगावच्या स्मशानभूमीत राहून तिथली राखण करण्याचे आणि मृत्युनंतर अंत्यसंस्काराची विविध कामे पार पाडण्याचे कष्टाचे काम अनिल गायकवाड यांचे कुटुंब करत आहे. समाजाच्या मुख्य प्रवाहापासून दुरावलेल्या, कायम स्मशानभूमीच्या निवाऱ्यात आणि उपेक्षेच्या अंधारात दिवस काढणाऱ्या या कुटुंबाची दिवाळी इतर सर्वसामान्य नागरिकांसारखी आनंदाची कधीच नसते.
जिथे अंत्यविधीनंतर कोणी थांबत नाही, तिथेच गायकवाड कुटुंबाची साजरी होते दिवाळी!
हीच गोष्ट पोलीस निरीक्षक मोहन बोरसे यांच्या संवेदनशील मनाला स्पर्श करून गेली. सण-उत्सवाच्या काळात प्रत्येकाच्या घरात रोषणाई आणि आनंदाचे वातावरण असताना, स्मशानभूमीत राहणाऱ्या गायकवाड कुटुंबाची दिवाळी साधी आणि अंधारातच जाण्याची शक्यता होती. हे ओळखून बोरसे यांनी स्वतः पुढाकार घेतला आणि दिवाळीच्या पवित्र सणानिमित्त स्मशानभूमीतच जाऊन या कुटुंबासोबत दिवाळी साजरी करण्याचे ठरवले.
केवळ औपचारिकता म्हणून नव्हे, तर खऱ्या अर्थाने माणुसकीचे दर्शन घडवत पोलीस निरीक्षक मोहन बोरसे यांनी आपल्या पत्नीसह आणि पोलीस सहकाऱ्यांसोबत गायकवाड कुटुंबाची भेट घेतली. यावेळी त्यांनी गायकवाड कुटुंबातील सर्व लहान-थोर सदस्यांना नवीन कपडे भेट दिले.दिवाळीचा पारंपरिक फराळ, गोडधोड पदार्थ आणि खाऊ दिला. कुटुंबाच्या गरजेनुसार इतर आवश्यक दैनंदिन साहित्य सुपूर्द केले.
या साहित्यापेक्षाही मोठी गोष्ट म्हणजे, पोलीस अधिकाऱ्याने आपल्या कुटुंबासह येऊन आपल्यासोबत वेळ घालवला, संवाद साधला आणि आपल्या अडचणी जाणून घेतल्या, यामुळे गायकवाड कुटुंबाच्या डोळ्यात आनंदाचे अश्रू तरळले.
सामान्यत: समाजात पोलिसांची प्रतिमा ही कडक शिस्त, गुन्हेगारांवर वचक आणि कायदा-सुव्यवस्थेची काटेकोर अंमलबजावणी करणारी म्हणून पाहिली जाते. परंतु, त्या खाकी वर्दीमागे एक संवेदनशील, मायाळू आणि समाजमनाचा वेध घेणारे मन लपलेले असते, हे मोहन बोरसे यांनी कृतीतून सिद्ध केले आहे.
‘नवराष्ट्र‘ वृत्तपत्राने या आगळ्यावेगळ्या घटनेला वाचा फोडल्यानंतर अवघ्या महाराष्ट्रातून या उपक्रमाचे जोरदार स्वागत होत आहे. शेवगाव शहर आणि परिसरातील विविध सामाजिक संस्था, प्रतिष्ठित नागरिक आणि सामान्य जनतेने पोलीस निरीक्षक मोहन बोरसे यांच्या या स्तुत्य उपक्रमाबद्दल तीव्र शब्दांत गौरवोद्गार काढले आहेत.
“पोलीस हा केवळ कायदा सुव्यवस्था राखणारा रक्षकच नाही, तर समाजातील शेवटच्या घटकाच्या दुःखात पाठीशी उभा राहणारा एक खरा मित्रही असतो, अशा भावना शेवगावकरांकडून व्यक्त होत आहेत.
मोहन बोरसे आणि त्यांच्या पत्नीसह पोलीस प्रशासनाने घेतलेला हा संवेदनशील निर्णय केवळ शेवगावपुरता मर्यादित न राहता, संपूर्ण राज्यातील पोलीस दल आणि समाजप्रमुखांसाठी एक आदर्श आणि प्रेरणादायी पायंडा ठरला आहे.
आरेतील आदिवासींसोबत मंगलप्रभात लोढांनी साजरी केली दिवाळी; फराळ वाटप करत घेतला, तारपा नृत्याचा आनंद
Ans: शेवगाव पोलीस स्टेशनचे पोलीस निरीक्षक मोहन बोरसे यांनी पत्नी आणि पोलीस सहकाऱ्यांसोबत स्मशानभूमीत राहणाऱ्या अनिल गायकवाड यांच्या कुटुंबासोबत दिवाळी साजरी केली.
Ans: त्यांनी कुटुंबातील सदस्यांना नवीन कपडे, दिवाळीचा फराळ, मिठाई, खाऊ आणि दैनंदिन गरजेच्या वस्तू भेट दिल्या.
Ans: समाजाच्या मुख्य प्रवाहापासून दूर असलेल्या कुटुंबासोबत दिवाळी साजरी करून त्यांनी सामाजिक संवेदनशीलता आणि माणुसकीचा संदेश दिला. त्यामुळे त्यांच्या उपक्रमाचं नागरिकांकडून कौतुक होत आहे.
