रविवार, 8 नोव्हेंबर 2026
Carrom Tournament : बालदिनी रंगणार शालेय कॅरमचा डाव; प्रल्हाद नलावडे स्मृती स्पर्धेत मोफत प्रवेश
बालदिनाचे औचित्य साधून शालेय विद्यार्थ्यांमधील क्रीडागुणांना प्रोत्साहन देण्यासाठी कांदिवली पश्चिम येथे सहाव्या प्रल्हाद नलावडे स्मृती शालेय कॅरम स्पर्धेचे (Carrom Tournament) आयोजन करण्यात आले आहे. आयडियल स्पोर्ट्स अकॅडमी, शशिकला फाउंडेशन आणि अविनाश नलावडे स्पोर्ट्स यांच्या संयुक्त विद्यमाने शुक्रवार, 14 नोव्हेंबर रोजी ही स्पर्धा होणार आहे. 14 वर्षांखालील शालेय मुला-मुलींसाठी ही स्पर्धा विनामूल्य खुली असून, स्पर्धेतील 8 विजेत्यांना आकर्षक पुरस्कार देऊन गौरविण्यात येणार आहे.
साईनगर, कांदिवली पश्चिम येथील मुंबई पब्लिक स्कूलच्या सभागृहात स्पर्धेचे सामने खेळवले जातील. या स्पर्धेत शालेय मुला-मुलींसाठी एकेरी कॅरम प्रकार ठेवण्यात आला आहे. त्यामुळे नवोदित खेळाडूंना आपले कौशल्य दाखवण्याची आणि स्पर्धात्मक वातावरणाचा अनुभव घेण्याची संधी मिळणार आहे.
कॅरमप्रेमी स्वर्गीय प्रल्हाद नलावडे यांनी नवोदित आणि उदयोन्मुख कॅरमपटूंना नेहमीच प्रोत्साहन दिले. 2019 मध्ये आयडियल स्पोर्ट्स अकॅडमीच्या वतीने आयोजित पहिल्या महापौर चषक शालेय कॅरम स्पर्धेत सहभागी झालेल्या दोनशेहून अधिक खेळाडूंना त्यांनी मोफत स्ट्रायकर भेट दिले होते. विद्यार्थ्यांना कॅरम खेळण्यासाठी प्रोत्साहन मिळावे आणि नव्या खेळाडूंना आवश्यक साहित्य उपलब्ध व्हावे, हा त्यामागील उद्देश होता.
त्यांच्या याच क्रीडाप्रेमी वृत्तीची आठवण जपण्यासाठी प्रल्हाद नलावडे स्मृती चषक शालेय कॅरम स्पर्धेचे आयोजन केले जाते. यंदा या स्पर्धेचे सहावे वर्ष असून, उपक्रमाचे सातत्य टिकवण्यासाठी संयोजक लीलाधर चव्हाण आणि रामेश्वर लोहे विशेष प्रयत्न करीत आहेत.
14 वर्षांखालील शालेय मुला-मुलींना या स्पर्धेत कोणतेही प्रवेश शुल्क न भरता सहभागी होता येणार आहे. स्पर्धेत सहभागी होऊ इच्छिणाऱ्या विद्यार्थ्यांनी प्रवेश अर्ज आणि अधिक माहितीसाठी सहसचिव ओमकार चव्हाण किंवा संतोष जाधव यांच्याशी संपर्क साधावा असे आयोजकांच्या वतीने सांगण्यात आले आहे.
प्रवेश नोंदणीची अंतिम तारीख 9 नोव्हेंबर असून, इच्छुक खेळाडूंनी मुदतीपूर्वी आपली नावे नोंदवावीत, असे आवाहन आयोजकांनी केले आहे.
Ans: ही स्पर्धा १४ नोव्हेंबर रोजी बालदिनानिमित्त आयोजित करण्यात आली आहे.
Ans: साईनगर, कांदिवली पश्चिम येथील मुंबई पब्लिक स्कूलच्या सभागृहात स्पर्धा होणार आहे.
Ans: स्पर्धेतील आठ विजेत्यांना आकर्षक पुरस्कार देऊन गौरविण्यात येणार आहे.
