अकोल्यातील हिवरखेड नगर परिषदेच्या मासिक सभेत राडा; नगरसेवकासह काही जण जखमी
अकोला : महाराष्ट्रात तसेच केंद्र सरकारमध्ये भाजप आणि एकनाथ शिंदेंची शिवसेना सत्तेत खांद्याला खांदा लावून काम करत असताना हिवरखेड नगरपरिषदेत मात्र वेगळेच राजकीय चित्र पाहायला मिळत आहे. नगर परिषदेच्या मासिक सभेदरम्यान व्हिडिओ शूटिंग करण्याच्या मुद्द्यावरून वादाची ठिणगी पडली. त्यानंतर या वादाचे पर्यवसान नगर परिषदेसमोरच हाणामारीत झाले. यात शिंदेसेनेचे नगरसेवक ऋषिकेश पंचबुद्धे यांच्यासह दोन्ही गटांतील जण जखमी झाल्याची माहिती आहे.
विशेष म्हणजे, हा संपूर्ण प्रकार पोलिस आणि गृहरक्षक दलाच्या जवानांच्या उपस्थितीत घडला. त्यामुळे पोलिसांनी हाणामारी रोखली नाही की, त्यांना ती रोखता आली नाही, असा प्रश्न उपस्थित होत आहे. दरम्यान, या प्रकरणी अद्याप कोणत्याही गटाकडून पोलिस ठाण्यात तक्रार दाखल झालेली नसल्याची माहिती ठाणेदार सचिन पाटील यांनी दिली. या घटनेनंतर हिवरखेडमधील राजकीय वातावरण चांगलेच तापले असून, सत्ताधारी पक्षांतील स्थानिक पातळीवरील मतभेद चव्हाट्यावर आल्याची चर्चा आहे.
सभेत निघाले धारदार शस्त्र
दुसरीकडे, भाजपचे बांधकाम सभापती अजित जमीर खान यांनाही मारहाण करण्यात आली. तसेच नगराध्यक्ष सुलभा दुतोंडे यांचे भाचे विशाल कुलट यांचा हात फॅक्चर झाला असून, त्यांच्या डोक्यावर व पोटावर धारदार शस्त्राने वार करण्यात आल्याची माहिती आहे.
नगर परिषद परिसरातील या प्रकारामुळे नागरिकांमध्येही नाराजी व्यक्त होत असून, लोकप्रतिनिधींकडून संयम राखण्याची अपेक्षा व्यक्त केली जात आहे. अशा घटनांमुळे नगर परिषदेच्या कामकाजावरही प्रश्नचिन्ह उपस्थित केले जात आहे.
शूटिंग सुरु ठेवल्याने वाद
सभेची अध्यक्ष म्हणून माझी परवानगी न घेता ऋषिकेश पंचबुद्धे यांनी व्हिडिओ शूटिंग सुरू केली. मनाई करूनही त्यांनी शूटिंग सुरूच ठेवल्याने वाद झाला. काही वेळाने सभा पूर्ववत सुरू झाली. नगर परिषदेसमोर झालेल्या हाणामारीबाबत मला कोणतीही माहिती नाही. या घटनेबाबत अधिकृत माहिती मिळाल्यानंतरच योग्य ती भूमिका स्पष्ट करता येईल.
– सुलभा दुतोंडे, नगराध्यक्ष, नगर परिषद, हिवरखेड.
हिवरखेड नगरपरिषदेत भाजपची एकहाती सत्ता असून, दादागिरीच्या जोरावर जनतेचा व विरोधकांचा आवाज दाबला जात आहे. विकासाचे प्रश्न उपस्थित केल्याने शिंदेसेनेचे नगरसेवक ऋषिकेश पंचबुद्धे यांना रॉडने मारहाण करण्यात आली. यात ते व मी जखमी झालो.
– रवी घुंगड, शिंदेसेना गटनेते तथा नगरसेवक
.png "Videos"){kind=small}
