सोशल मीडिया ते रस्त्यावर प्रचाराची धामधूम; चाकणमध्ये राजकीय वातावरण तापले

चाकण नगरपरिषद पंचवार्षिक निवडणूक मतदान मंगळवार दिनांक २ रोजी होत असल्याने मतदानाचा दिवस जवळ येताच शहरातील राजकीय तापमान दिवसेंदिवस वाढू लागले आहे.

• आगामी मिवडणुकांसाठी जोरदार तयारी
• सोशल मीडिया ते रस्त्यावर प्रचाराची धामधूम
• चाकणमध्ये राजकीय वातावरण तापले

चाकण : चाकण नगरपरिषद पंचवार्षिक निवडणूक मतदान मंगळवार दिनांक २ रोजी होत असल्याने मतदानाचा दिवस जवळ येताच शहरातील राजकीय तापमान दिवसेंदिवस वाढू लागले आहे. संपूर्ण शहरात निवडणूकमय वातावरण निर्माण झाले असून, सोशल मीडियासह रस्त्यावरही जोरदार प्रचाराची झंकार दिसून येत आहे. शहरातील विविध प्रभागांमध्ये सकाळपासून रात्रीपर्यंत उमेदवार पदयात्रा, ढोल-ताशे, टेम्पो आणि रिक्षावर लावलेल्या स्पीकर्सच्या माध्यमातून प्रचारासाठी दिंड्या काढताना दिसत आहेत. मतदारांशी प्रत्यक्ष संपर्क साधण्यावर भर देत घरभेटी, भेटीगाठी आणि कोपरा सभा आयोजित केल्या जात आहेत.

डिजिटल प्रचाराचा जोर

या निवडणुकीत रील्स, फेसबुक पोस्ट, व्हॉट्सअॅप स्टेटस आणि खास तयार केलेले प्रचार व्हिडिओ मोठ्या प्रमाणात व्हायरल होत आहेत. तरुण मतदारांना आकर्षित करण्यासाठी राजकीय पक्ष आणि कार्यकर्त्यांनी आकर्षक गाणी, ट्रेंडिंग कट्स, प्रोमो व्हिडिओ प्रचार सामग्री तयार केली आहे.

पोस्टर-बॅनरमुळे शहर सजले

मुख्य रस्ते, चौक, बाजारपेठा, सार्वजनिक स्थळांवर विविध रंगीत पोस्टर, फ्लेक्स, बॅनरमुळे निवडणुकीची धामधूम अधिक वाढली आहे. सायकल, टेम्पो-रिक्षातून होणाऱ्या जाहीरातीमुळे वातावरणात निवडणुकीचा उत्साह आणि तापमान दोन्ही वाढताना दिसत आहे.

मतदार संपर्क अंतिम टप्प्यात

प्रत्येक उमेदवार स्वतःची कामगिरी, संकल्पनापत्रातील आश्वासने आणि कार्यकर्त्यांचे सामर्थ्य लोकांपर्यंत पोहोचवण्यासाठी शेवटच्या टप्प्यात आक्रमक मोहीम राबवत आहेत. विविध राजकीय पक्षांनी प्रत्येक मतदारापर्यंत पोहोचण्याच्या उद्दिष्टाने प्रचार अधिक वेगात सुरू केला आहे. मतदानाच्या दिवशी मोठ्या प्रमाणात मतदान व्हावे यासाठी आवाहन करून प्रचार मोहिमेची धग शिगेला पोहोचली आहे. चाकणकर आता मतदानाच्या दिवशी कोणाला संधी देणार याकडे सर्वांचे लक्ष लागले आहे.