Asha Bhosle Funeral: आशाताईंनी स्वर समाधी घेतली! उपमुख्यमंत्री एकनाथ शिंदे यांनी वाहिली श्रद्धांजली

आशाताईंच्या निधनाने सांस्कृतिक क्षेत्रात शोककळा पसरली आहे. उपमुख्यमंत्री एकनाथ शिंदे यांनी त्यांना श्रद्धांजली वाहत त्यांच्या योगदानाची आठवण करून दिली.

मुंबई : ज्येष्ठ गायिका आशाताई भोसले यांनी संगीत क्षेत्रात हिमालया एवढं उत्तुंग काम करुन ठेवलंय, जे कुठल्याही फूटपट्टीने मोजता येणार नाही. आशाताई महाराष्ट्राच्या शान होत्या आणि मराठी अस्मितेच्या मानबिंदू होत्या. आशाताईंचे निधन नाही तर त्यांनी स्वर समाधी घेतली, अशा शब्दांत शिवसेना मुख्य नेते व राज्याचे उपमुख्यमंत्री एकनाथ शिंदे यांनी ज्येष्ठ गायिका आशा भोसले यांना श्रद्धांजली वाहिली.

उपमुख्यमंत्री शिंदे म्हणाले की, आशाताईंनी मराठी आणि हिंदीच नाही तर तामिळ, मल्याळम, इंग्रजी, रशियन अशा जवळपास २० भाषांमधील गाणी गायली. सुख-दु:खात त्यांची गाणी ऐकायचो. खासकरुन दु:खाच्या प्रसंगी त्यांची गाणी आधार वाटतात. आजही त्यांनी गायलेली हजारो गाणी कालची ताजी गाणी असल्याचा भास होतो. जोपर्यंत चंद्र-सूर्य आहेत, तोपर्यंत आशाताईंची गाणी अजरामर राहतील आणि संगीत प्रेमींना आनंद देत राहतील, अशी भावना उपमुख्यमंत्री शिंदे यांनी व्यक्त केली.

Asha Bhosle Funeral: सूरसम्राज्ञी आशा भोसले अनंतात विलीन, शिवाजी पार्कवर शासकीय इतमामात अखेरचा निरोप

आशा ताईंना अनेक पुरस्कार मिळाले पण मुख्यमंत्री असताना त्यांना महाराष्ट्र भूषण पुरस्काराने सन्मानित करण्याचे संधी मला मिळाली, याबद्दल मी भाग्यवान समजतो, असे ते म्हणाले. आशाताईंनी लाडकी बहिण योजनेचे कौतुक केले होते. १५०० रुपयांचे मोल किती आहे हे त्यांनी जाहीरपणे सांगितले होते. त्यांच्या सुरुवातीच्या काळात ही योजना हवी होती, असेही आशाताई म्हणाल्या होत्या. कारण त्यांनी आणि त्यांच्या कुटुंबियांनी गरिबीचे चटके सहन केले होते, अशी आठवण उपमुख्यमंत्री शिंदे यांनी यावेळी बोलून दाखवली. या दु:खद प्रसंगातून सावरण्याचे त्यांच्या कुटुंबियांना बळ मिळो, आशाताईंना शिवसेना पक्षाच्या वतीने श्रद्धांजली अर्पण करतो, असे उपमुख्यमंत्री शिंदे म्हणाले.

आपल्या अद्वितीय आवाजाने हिंदी पार्श्वगायनात एक विशेष स्थान मिळवणाऱ्या महान गायिका आशा भोसले यांचे रविवारी निधन झाले. त्या ९२ वर्षांच्या होत्या. छातीत संसर्ग आणि अशक्तपणामुळे त्यांना शनिवारी संध्याकाळी मुंबईच्या ब्रीच कँडी रुग्णालयात दाखल करण्यात आले होते.

आशा भोसले यांच्यावर सोमवारी अंत्यसंस्कार करण्यात आले. सकाळी ११ वाजल्यापासून त्यांचे पार्थिव लोअर परेल येथील कासा ग्रांडे येथे अंत्यविधीसाठी ठेवण्यात आले होते. सायंकाळी ५:१५ च्या सुमारास शिवाजी पार्क येथे त्यांच्यावर अंत्यसंस्कार करण्यात आले. आशा भोसले यांचा विवाह १९४९ मध्ये वयाच्या १६ व्या वर्षी गणपतराव भोसले यांच्याशी झाला होता आणि नंतर त्यांनी त्यांचे सहकारी व संगीतकार आर. डी. बर्मन यांच्याशी विवाह केला. त्यांच्या पश्चात मुलगा आनंद आणि नातवंडे आहेत.