पुणे : कसबा पेठ विधानसभा मतदारसंघासाठी (Kasba Peth Bypoll) पोटनिवडणूक जाहीर झाली. या निवडणुकीत भाजपकडून हेमंत रासने (Hemant Rasane) यांना उमेदवारी देण्यात आली आहे. तर महाविकास आघाडीकडून काँग्रेसच्या रविंद्र धंगेकर (Ravindra Dhangekar) हे निवडणुकीच्या रिंगणात आहेत. पण काँग्रेसचे नाराज बाळासाहेब दाभेकर (Balasaheb Dabhekar) यांनी देखील उमेदवारी अर्ज दाखल केला होता. मात्र, आज त्यांनी उमेदवारी अर्ज मागे घेतला.
कसबा पेठ हा काँग्रेसचा पारंपरिक मतदारसंघ आहे. या मतदारसंघातून निवडणूक लढवण्यास काँग्रेसकडून तीन इच्छुक उमेदवारांची नावे पक्षश्रेष्ठींकडे पाठवण्यात आली होती. त्यामध्ये रवींद्र धंगेकर, बाळासाहेब दाभेकर, कमल व्यवहारे यांची नावे होती. पण काँग्रेसकडून रवींद्र धंगेकर यांना उमेदवारी देण्यात आली. या उमेदवारीनंतर विधानसभेसाठी इच्छुक असलेले बाळासाहेब दाभेकर नाराज झाले होते. त्यांनी अपक्ष लढणार असल्याचे ठरवले. त्यानुसार त्यांनी उमेदवारी अर्ज दाखल देखील केला होता. मात्र, आज त्यांनी उमेदवारी अर्ज मागे घेतला.
काँग्रेस नेत्यांकडून मनधरणीचा प्रयत्न
बाळासाहेब दाभेकर यांनी बंडखोरी केली. त्यामुळे काँग्रेस प्रदेशाध्यक्ष नाना पटोले यांनी दिलेल्या सूचनेवरून शहराध्यक्ष अरविंद शिंदे, आमदार संग्राम थोपटे यांच्यासह इतर पदाधिकाऱ्यांनी बाळासाहेब दाभेकर यांच्याशी चर्चा केली. त्यानंतर पुढच्या वेळी संधी देण्यात येईल, असे आश्वासन देण्यात आल्याची माहिती दिली जात आहे. त्यानंतर दाभेकर यांनी अर्ज मागे घेण्याचा निर्णय घेतला.
अभिजित बिचकुले यांचाही अर्ज
सातत्याने चर्चेत राहणारा अभिनेता, सेलिब्रिटी अभिजित बिचकुले यांनी देखील कसबा विधानसभा मतदारसंघाच्या पोटनिवडणुकीत उमेदवारी अर्ज दाखल केला. बिचकुले यांच्या उमेदवारीमुळे प्रचारातील रंगत वाढणार असल्याचे चित्र दिसत आहे. बिचकुले यांनी अनेकदा मोठमोठ्या निवडणुका लढवणार असल्याच्या घोषणा केल्या होत्या. आता ते कसबा पेठची पोटनिवडणूक लढवणार आहे.
.png "Videos"){kind=small}
