Bombay HC Clerk Typing Test : मोठी बातमी ! हायकोर्टाच्या लिपिक पदाची टायपिंग परीक्षा रद्द; तांत्रिक गोंधळानंतर मोठा निर्णय

Bombay HC Clerk Typing Test : मुंबई उच्च न्यायालयाच्या लिपिक पदासाठी 16 ऑगस्ट रोजी घेण्यात आलेली ऑनलाइन टंकलेखन परीक्षा रद्द करण्यात आली आहे. सर्व्हर आणि कीबोर्डच्या समस्यांसह विविध तांत्रिक अडचणींमुळे उमेदवारांना त्रास झाला होता.

16 ऑगस्टची हायकोर्ट लिपिक टायपिंग टेस्ट रद्द
सर्व्हर आणि कीबोर्डच्या तांत्रिक समस्यांमुळे उमेदवार त्रस्त
नव्या परीक्षेची तारीख लवकरच संकेतस्थळावर जाहीर होणार

Bombay HC Clerk Typing Test : मुंबई उच्च न्यायालयाच्या लिपिक पदासाठी 16 ऑगस्ट रोजी घेण्यात आलेल्या ऑनलाइन टंकलेखन परीक्षेबाबत मोठा निर्णय घेण्यात आला आहे. परीक्षा केंद्रांवर आलेल्या विविध तांत्रिक अडचणी आणि उमेदवारांना आलेल्या समस्यांच्या पार्श्वभूमीवर ही परीक्षा रद्द करण्यात आली आहे. नव्या टंकलेखन परीक्षेची तारीख नंतर जाहीर केली जाणार आहे.

लिपिक पदाच्या भरती प्रक्रियेत ऑनलाइन टंकलेखन चाचणी महत्त्वाची होती. मात्र, परीक्षा सुरू असताना अनेक केंद्रांवर उमेदवारांना तांत्रिक अडचणींचा सामना करावा लागला. त्यामुळे अनेक उमेदवारांना अपेक्षित पद्धतीने परीक्षा देता आली नसल्याच्या तक्रारी समोर आल्या.

सर्व्हर डाऊन, कीबोर्डच्या समस्यांमुळे गोंधळ

16 ऑगस्ट रोजी राज्यभरात परीक्षा घेण्यात आली. छत्रपती संभाजीनगर, कल्याण, वाशिम, हिंगोली यासह विविध ठिकाणी परीक्षा केंद्रांवर तांत्रिक समस्या आल्याचे उमेदवारांनी सांगितले. काही ठिकाणी सर्व्हर डाऊन होणे, तर काही केंद्रांवर कीबोर्ड व्यवस्थित काम न करणे यासारख्या अडचणी निर्माण झाल्याची तक्रार होती. त्यामुळे संतप्त झालेल्या उमेदवारांनी आंदोलनही केले होते.

Pune HCMTR Inner Ring Road: पुण्याच्या ‘HCMTR’ प्रकल्पाला ३० वर्षांनंतर मुहूर्त; भूसंपादनासाठी ३१ ऑगस्टची मुदत

परीक्षेतील या गोंधळानंतर उमेदवारांच्या समस्यांकडे लक्ष वेधण्यासाठी सीजेपीचे अभिजीत दीपके यांनीही छत्रपती संभाजीनगरमध्ये परीक्षा देणाऱ्या उमेदवारांसोबत ठिय्या आंदोलन केले होते.

रोहित पवारांचा पाठपुरावा

या प्रकरणात राष्ट्रवादी काँग्रेस शरद पवार पक्षाचे आमदार रोहित पवार यांनीही पाठपुरावा केला होता. उच्च न्यायालयाच्या लिपिक भरतीच्या टंकलेखन परीक्षेत मोठ्या प्रमाणात गोंधळ झाल्याचे निदर्शनास आल्यानंतर त्यांनी उच्च न्यायालयाचे महानिबंधक मुनगंटे आणि महाधिवक्ता मिलिंद साठे यांची भेट घेतली होती.

उच्च न्यायालयाच्या लिपिक भरतीसाठी घेण्यात आलेल्या टायपिंगच्या परीक्षेत काल मोठ्या प्रमाणात गोंधळ झाला. त्यामुळं ही परीक्षा देणाऱ्या विद्यार्थ्यांना मोठा मनःस्ताप सहन करावा लागला. त्यामुळं या परीक्षेतील गैरप्रकाराची उच्चस्तरीय चौकशी करावी आणि सदर भरती परीक्षा रद्द करुन… pic.twitter.com/4GCI10XfHt — Rohit Pawar (@RRPSpeaks) August 17, 2026

परीक्षेतील समस्यांच्या पार्श्वभूमीवर 16 ऑगस्टची टंकलेखन चाचणी रद्द करून नव्याने परीक्षा घेण्याची मागणी त्यांनी केली होती.

नव्या परीक्षेची तारीख कधी?

अखेर न्यायालयीन प्रशासनाने 16 ऑगस्ट रोजी घेण्यात आलेली ऑनलाइन टंकलेखन परीक्षा रद्द करण्याचा निर्णय घेतला आहे. नव्या परीक्षेची तारीख नंतर जाहीर केली जाणार असून उमेदवारांना ती अधिकृत संकेतस्थळावर कळवण्यात येईल. या निर्णयाचे रोहित पवार यांनी स्वागत केले आहे. मात्र, केवळ परीक्षा रद्द करणे पुरेसे नसून आधी झालेल्या गोंधळाची उच्चस्तरीय चौकशी करावी, अशी मागणी त्यांनी केली आहे.

Antilia Case : परमबीर सिंह यांच्या भूमिकेवर गंभीर प्रश्न; सेवानिवृत्त ACP बी. आर. घाडगेंची कोर्टात याचिका, सोमवारी सुनावणी

तसेच, नव्याने घेण्यात येणारी टंकलेखन परीक्षा स्वतंत्र आणि पारदर्शक पद्धतीने पार पडावी, अशी अपेक्षाही त्यांनी व्यक्त केली आहे. त्यामुळे आता नव्या परीक्षेची तारीख आणि परीक्षा कोणत्या पद्धतीने घेतली जाणार, याकडे लिपिक पदाच्या उमेदवारांचे लक्ष लागले आहे.