Buldhana News: समृद्धीवरील अपघातात एक ठार, क्लीनर किरकोळ जखमी; ट्रकची समोरील वाहनाला धडक

Buldhana Samruddhi Expressway Accident: समृद्धी महामार्गावर बुलढाणा येथे झोपेची डुलकी लागल्याने ट्रक चालकाचे वाहनावरील नियंत्रण सुटले आणि ट्रकने समोरील वाहनाला जोरदार धडक दिली. या अपघातात ट्रक चालकाचा जागीच मृत्यू झाला, तर क्लिनर किरकोळ जखमी झाला.

• समृद्धीवरील अपघातात एक ठार
• क्लीनर किरकोळ जखमी
• ट्रकची समोरील वाहनाला धडक

बुलढाणा: समृद्धी महामार्गावर ट्रक चालकाला झोपेची डुलकी लागल्याने ट्रकने समोरील वाहनाला पाठीमागून जोरदार धडक दिल्याची घटना मंगळवारी पहाटे घडली. या अपघातात ट्रक चालकाचा जागीच मृत्यू झाला, तर त्याचा क्लिनर किरकोळ जखमी झाला. आरजे-जीडी ४४१२ क्रमांकाचा ट्रक समृद्धी महामार्गावरील चॅनेल क्रमांक २६९,४०० जवळून जात असताना चालक लेकराज (२६, रा. टेडीबगिया, ता. जि. आग्रा, उत्तर प्रदेश) याला पहाटे सुमारे ३.५३ वाजता झोपेची डुलकी लागली. त्यामुळे ट्रकवरील नियंत्रण सुटून तो समोरील वाहनावर पाठीमागून धडकला. धडक इतकी जोरदार होती की ट्रकच्या पुढील भागाचे मोठे नुकसान झाले आणि चालकाचा घटनास्थळीच मृत्यू झाला. तर क्लिनर सोनू निरंजन निषाद (रा. फरे, जि. मधुरा, उत्तर प्रदेश) किरकोळ जखमी झाला.

Buldhana News: अतिवृष्टीचा कहर; पावसाने जिल्ह्यात घातले थैमान, चोवीस तासात चार बळी

क्लिनरवर स्थानिक रुग्णालयात उपचार

अपघाताची माहिती मिळताच मेहकरजवळील फरदापूर पोलिस चौकीचे पोलिस निरीक्षक सुनील सोळंके, सहायक पोलिस उपनिरीक्षक मंगेश खडसे तसेच पोलिस कर्मचारी निलेश राठोड, धीरज चंदन, मंगेश तंत्रे आणि गजानन जाधव यांनी तातडीने घटनास्थळी धाव घेतली. जखमी क्लिनरला उपचारासाठी स्थानिक रुग्णालयात दाखल करण्यात आले. तसेच अपघातग्रस्त वाहन हटवून समृद्धी महामार्गावरील वाहतूक सुरळीत करण्यात आली.

बुलढाण्यात पावसाचा धुमाकूळ; ११ तालुक्यांमध्ये १०० मिमीपेक्षा अधिक पाऊस, मलकापूर-सोलापूर महामार्ग ठप्प