बुधवार, 28 ऑक्टोबर 2026
Chandrapur News: चंद्रपुरात दिवाळी बोनससाठी आशा वर्कर आक्रमक; २ नोव्हेंबरपासून आंदोलनाचा इशारा
येत्या पाच दिवसात बोनस न मिळाल्यास २ नोव्हेंबरपासून महानगरपालिका कार्यालयासमोर बेमुदत धरणे आंदोलन छेडण्यात येईल, असा इशारा आयटकचे राज्य उपाध्यक्ष विनोद झोडगे पाटील यांनी दिला. सणासुदीच्या काळात कर्मचाऱ्यांच्या आर्थिक गरजांचा विचार करून प्रशासनाने तातडीने निर्णय घ्यावा, अशी भूमिका आंदोलकांनी मांडली. (फोटो सौजन्य – AI Created)
या मागणीसाठी प्रशासनाला पाच दिवसांची मुदत देण्यात आली आहे. या कालावधीत ३१ हजार रुपयांचे सानुग्रह अनुदान मंजूर न झाल्यास २ नोव्हेंबरपासून बेमुदत धरणे आंदोलन सुरू केले जाईल. मागणी मान्य होईपर्यंत आंदोलन सुरू ठेवण्याचा इशाराही दिला. त्यामुळे आशा वर्करच्या बोनसचा प्रश्न आता ऐरणीवर आला असून, मनपा प्रशासन काय निर्णय घेते याकडे सर्वांचे लक्ष लागले आहे. आंदोलनात सविता गटलेवार यांच्यासह किरण धोंगडे, प्रमिला बावणे, शकुंतला दाभेकर, वर्षा मोरे, सोनाली हजारे, स्वाती तळसे, छाया तोडसे सहभागी झाल्या होत्या.
चंद्रपूर महानगरपालिकेच्या राष्ट्रीय शहरी आरोग्य अभियानांतर्गत सुमारे १७० आशा वर्कर आणि गटप्रवर्तक कार्यरत आहेत. या कर्मचाऱ्यांना दिवाळीनिमित ३१ हजार रुपये सानुग्रह अनुदान देण्यात यावे, अशी संघटनेची प्रमुख मागणी आहे. याच मागणीसाठी मंगळवारी (दि. २७) आयटकच्या नेतृत्वात आंदोलन करण्यात आले.
मोठ्या संख्येने सहभागी झालेल्या आशा वर्करनी घोषणाबाजी करत प्रशासनांचे लक्ष वेधले. कोरोना महामारीच्या संकटकाळात आशा वर्कर, गटप्रवर्तक आणि आरोग्य अभियानातील कर्मचाऱ्यांनी नागरिकांच्या आरोग्यरक्षणासाठी महत्त्वपूर्ण काम केले. आरोग्यसेवेच्या क्षेत्रात योगदान देणाऱ्या या कर्मचाऱ्यांना दिवाळीनिमित्त सानुग्रह अनुदान मिळावे, अशी मागणी संघटनेने केली आहे.
कोरोना महामारीच्या काळात नागरिकांच्या आरोग्यरक्षणासाठी आशा वर्कर आणि गटप्रवर्तकांनी महत्त्वपूर्ण जबाबदारी पार पाडली. आरोग्यसेवेतील या योगदानाची दखल घेऊन दिवाळीसाठी ३१ हजार रुपये सानुग्रह अनुदान देण्यात यावे, अशी आयटकची मागणी आहे. मागणी मान्य न झाल्यास २ नोव्हेंबरपासून बेमुदत धरणे आंदोलन करण्यात येईल- विनोद झोडगे, राज्य उपाध्यक्ष
