सोमवार, 31 ऑगस्ट 2026
Chandrapur News: गणेशोत्सवासाठी चंद्रपूर सज्ज; बाजारपेठा सजल्या, जिल्ह्यात १७ हजार गणरायांच्या आगमनाची शक्यता
गणेशोत्सव हा जिल्ह्यातील प्रमुख धार्मिक आणि सांस्कृतिक उत्सवांपैकी एक आहे. त्यामुळे गणेश मंडळांनी आतापासूनच तयारीला वेग दिला आहे. शहरासह ग्रामीण भागात विविध आकारांच्या आकर्षक गणेशमूर्ती तयार करण्याचे काम मूर्तिकारांकडून सुरू आहे. अनेक मंडळांनी आपल्या पसंतीच्या मूर्तीचे आगाऊ बुकिंग केले असून, घरगुती गणपतींसाठीही नागरिकांकडून मूर्ती खरेदीला सुरुवात झाली आहे. सार्वजनिक गणेशोत्सव मंडळांनी मंडप उभारणी, देखावे आणि विद्युत रोषणाईची तयारी सुरू केली आहे. विविध सामाजिक, धार्मिक आणि सांस्कृतिक उपक्रमांचे आयोजन करण्यासाठी मंडळांच्या बैठका होत आहेत.
काही मंडळांकडून आरोग्य शिबिर, रक्तदान, गरजू विद्यार्थ्यांना मदत, प्रबोधनपर कार्यक्रम तसेच सांस्कृतिक कार्यक्रम घेण्याचे नियोजन केले जात आहे. दरम्यान, गणेशोत्सवाच्या पार्श्वभूमीवर प्रशासन आणि पोलिस यंत्रणेकडूनही तयारी सुरू झाली आहे. सार्वजनिक मंडळांना परवानगी, वाहतूक व्यवस्था, मिरवणुकीचे मार्ग, ध्वनिक्षेपकांचा वापर, अग्निसुरक्षा तसेच विसर्जन व्यवस्थेबाबत आवश्यक सूचना देण्यात येणार आहेत. गणेशोत्सवाच्या पार्श्वभूमीवर सजावटीचे साहित्य, फुलांच्या माळा, विद्युत रोषणाई, पूजेचे साहित्य, आरास करण्यासाठी लागणाऱ्या वस्तू आणि विविध प्रकारच्या सजावटीच्या साहित्याची दुकाने सजली आहेत.
आगामी काही दिवसात बाजारपेठेतील गर्दीत मोठी वाढ होण्याची शक्यता व्यापाऱ्यांकडून व्यक्त केली जात आहे. गणरायाच्या स्वागतासाठी घराघरांत आणि सार्वजनिक मंडळांमध्ये तयारी सुरू झाल्याने जिल्ह्यात गणेशोत्सवाचा उत्साह आता दिसू लागला आहे. पुढील पंधरा दिवसात चंद्रपूर जिल्ह्यातील बाजारपेठा आणि प्रमुख शहरांमध्ये गणेशोत्सवाची लगबग आणखी वाढणार आहे.
यंदा गणेशमूर्तीच्या किमतीत सरासरी २० टक्क्यांनी वाढ झाली आहे. मूर्ती तयार करण्यासाठी लागणारा कच्चा माल, रंग, सजावटीचे साहित्य, वाहतूक तसेच मजुरीच्या वाढलेल्या खर्चाचा परिणाम मूर्तीच्या दरावर झाला असल्याचे मूर्तिकारांचे म्हणणे आहे. त्यामुळे गतवर्षीच्या तुलनेत यंदा गणेशभक्तांना काहीशी अधिक रक्कम मोजावी लागणार आहे. लहान घरगुती मूर्तीपासून ते सार्वजनिक मंडळांसाठीच्या मूर्तीपर्यंत विविध प्रकार उपलब्ध आहेत. पर्यावरणपूरक शाडू मातीच्या मूर्तीनाही यंदा मागणी वाढत असल्याचे चित्र आहे. काही मूर्तिकारांकडून नैसर्गिक रंगांचा वापर करून आकर्षक मूर्ती तयार केल्या जात आहेत.
गणेशोत्सवासाठी मूर्ती बनविण्याची तयारी अंतिम टप्यात पोहचलेली असून मूर्तिकारांची लगबग सुरू आहे. यंदा मूर्ती बनविण्यासाठी लागणाऱ्या कच्चा माल, रंग, मजुराच्या मजुरीत वाढ यामुळे गणेशमूर्तीच्या किमती जवळपास २० टक्क्यांनी महागलेल्या आहेत. महागाईच्या काळातही अंतिम टप्यातील काम पूर्ण करण्याकडे मूर्तिकारांचा भर दिसून येत आहे.- हरीश मंचलवार, जिल्हाध्यक्ष, महाराष्ट्र कुंभार समाज विकास परिषद, चंद्रपूर
