Chandrapur News: परवानगी नाही, तरी व्यापारी संकुलाचे बांधकाम सुरू? चंद्रपुरात नेमकं चाललंय काय?

चंद्रपूरातील बजाज पॉलिटेक्निकसमोरील जागेवर एका कापड व्यापाऱ्याकडून भव्य व्यापारी संकुल उभारण्याचे काम सुरू करण्यात आले आहे. मात्र या बांधकामाला महापालिकेची अधिकृत बांधकाम परवानगी मिळालेली नसल्याची माहिती समोर आली आहे.

• परवानगी मिळालेली नसतानाही शहरात एका भव्य व्यापारी संकुलाचे बांधकाम सुरू
• बांधकाम परवानगी मिळविण्यासाठी महापालिकेच्या नगररचना विभागाकडे ऑनलाइन अर्जही सादर
• महापौर आणि उपमहापौर यांच्या प्रभागातच हा प्रकार घडत असल्याने प्रशासनाच्या कार्यपद्धतीबाबत चर्चा

चंद्रपूर: महापालिकेची अधिकृत बांधकाम परवानगी मिळालेली नसतानाही शहरात एका भव्य व्यापारी संकुलाचे बांधकाम सुरू असल्याचा प्रकार समोर आला आहे. विशेष म्हणजे, हे बांधकाम महापौर संगीता खांडेकर आणि उपमहापौर प्रशांत दानव यांच्या प्रभागातील बजाज पॉलिटेक्निकसमोरील विठ्ठल मंदिर परिसरात सुरू असल्याचे सांगितले जात आहे. यासंदर्भात तक्रार प्राप्त झाल्यानंतर महापालिकेच्या अधिकाऱ्यांनी घटनास्थळी भेट देत बांधकाम थांबविण्याचे तोंडी निर्देश दिल्याची माहिती आहे. मात्र, त्यानंतरही बांधकाम सुरूच असल्याचा आरोप होत असल्याने महापालिका प्रशासनाच्या भूमिकेकडे लक्ष लागले आहे.

अकोल्यात भीषण पाणीटंचाई; टँकर लॉबी सक्रिय, घरगुती वापरापासून ते बांधकामापर्यंत मनमानी दर

बजाज पॉलिटेक्निकसमोरील जागेवर एका कापड व्यापाऱ्याकडून भव्य व्यापारी संकुल उभारण्याचे काम सुरू करण्यात आले आहे. संबंधित व्यापाऱ्याने जागेचे चार भाग करण्यासाठी अर्ज केला असून, बांधकाम परवानगी मिळविण्यासाठी महापालिकेच्या नगररचना विभागाकडे ऑनलाइन अर्जही सादर केला आहे. मात्र, या अर्जावर अद्याप निर्णय झालेला नसल्याची माहिती आहे. त्यामुळे बांधकामाला अधिकृत मंजुरी मिळाली नसताना प्रत्यक्ष काम सुरू कसे झाले, असा प्रश्न उपस्थित केला जात आहे.  (फोटो सौजन्य – AI Created) 

बांधकामाबाबत तक्रार झाल्यानंतर महापालिकेच्या संबंधित अधिकाऱ्यांनी घटनास्थळी जाऊन काम थांबविण्याचे तोंडी निर्देश दिल्याचे सांगितले जाते. मात्र, या निर्देशांनंतरही बांधकाम सुरू असल्याचा आरोप होत आहे. त्यामुळे संबंधित विभागाने केवळ तोंडी सूचना देण्याऐवजी प्रत्यक्ष परिस्थितीची पाहणी करून नियमांनुसार पुढील कारवाई करावी, अशी अपेक्षा व्यक्त होत आहे. महापौर आणि उपमहापौर यांच्या प्रभागातच हा प्रकार घडत असल्याने प्रशासनाच्या कार्यपद्धतीबाबत चर्चा सुरू झाली आहे. संबंधित बांधकामाची अधिकृत परवानगी, अर्जाची सद्यस्थिती आणि प्रत्यक्ष कामाची पाहणी करून महापालिका प्रशासन काय कारवाई करते, याकडे नागरिकांचे लक्ष लागले आहे.

Mumbai Drone Crash: शो ठरला जीवघेणा! मुंबईत उडत्या ड्रोनचा प्रवाशाला भीषण फटका; डोक्याला गंभीर दुखापत!

संबंधित बांधकामाला अद्याप परवानगी देण्यात आली नाही, या प्रकरणाची फाइल नगररचना विभागात प्रलंबित आहे. संबंधितांवर कोणती कारवाई करायची, याचा निर्णय महापालिकेतील संबंधित अधिकारी घेतील,- राहुल भोवर, नगररचनाकार, चंद्रपूर महापालिका

संबंधित व्यापाऱ्याने परवानगी न घेताच बांधकाम सुरू केले. सदर प्रकरणाची तक्रार प्राप्त झाली असून बांधकाम थांबवण्याचे आदेश दिले आहे. सध्या बांधकाम सुरू नाही.- संगीता खांडेकर, महापौर, चंद्रपूर

(डिस्क्लेमर: हे नवराष्ट्र वृत्तपत्राचे स्वयंचलित न्यूज फीड आहे. ते navarashtra.com च्या कर्मचाऱ्यांनी संपादित केलेले नाही.)