राज्य सरकारकडून सर्वसामान्यांना दिलासा मिळणार; ऐन उन्हाळ्यात वीज दरात कपात होणार

नवीन आर्थिक वर्ष २०२६-२७ साठी विविध स्लॅबनुसार वीज दरात घट करण्यात आली आहे. यामुळे घरगुती ग्राहकांचे मासिक वीज बिल कमी होण्याची शक्यता आहे.

मुंबई : उन्हाळ्याच्या तडाख्यात नागरिकांना दिलासा देणारा महत्त्वाचा निर्णय राज्य वीज नियामक आयोगाने घेतला आहे. महावितरण, अदाणी, बेस्ट आणि टाटा या वीज वितरण कंपन्यांच्या प्रस्तावानुसार घरगुती वीज दरात कपात करण्यात आली असून, नवीन दर १ एप्रिलपासून लागू होणार आहेत. उकाड्याच्या पार्श्वभूमीवर घेतलेल्या या निर्णयामुळे सर्वसामान्य ग्राहकांना मोठा आर्थिक दिलासा मिळणार आहे.

विशेषतः कमी वीज वापरणाऱ्या ग्राहकांसाठी बेस्ट प्रशासनाने स्वस्त दर लागू करण्याचा निर्णय घेतला आहे, त्यामुळे लहान ग्राहकांना अधिक फायदा होणार आहे. नवीन आर्थिक वर्ष २०२६-२७ साठी विविध स्लॅबनुसार वीज दरात घट करण्यात आली आहे. यामुळे घरगुती ग्राहकांचे मासिक वीज बिल कमी होण्याची शक्यता आहे. या दरकपातीमुळे वाढत्या तापमानात वीज वापर वाढत असतानाही ग्राहकांना काही प्रमाणात आर्थिक दिलासा मिळणार असल्याचे मानले जात आहे.

मुख्यमंत्र्यांनी वचन पाळले

मुख्यमंत्री देवेंद्र फडणवीस यांनी महायुती सरकार स्थापन करताना भविष्यात वीज दर कमी करण्याचे आश्वासन दिले होते. मुख्यमंत्र्यांनी रामनवमीच्या दिवशी ही भेट देऊन आपले वचन पूर्ण केले. ऊर्जा मंत्रालयाचा कार्यभार सांभाळणाऱ्या फडणवीस यांनी अधिकाऱ्यांना वीज दर कमी करण्याचे कडक निर्देश दिले होते. कोणत्याही परिस्थितीत वीज दरात वाढ करू नये. विशेषतः शेतकरी, ग्रामीण रहिवासी आणि मध्यमवर्गीयांना अनुदानित वीज पुरवली पाहिजे, असे आदेश त्यांनी दिले होते. राज्यात शेतीसाठी वापरली जाणारी वीज पूर्णपणे अपारंपरिक ऊर्जा स्रोतांमधून मिळवली पाहिजे. या दिशेने महाराष्ट्रात एक मोठी मोहीम सुरू आहे.

थकीत भरणाही कोट्यवधींचा

विजेचा वापर केल्यानंतरही बिलांचा मासिक भरणा नियमित होत नसल्याने रत्नागिरी परिमंडल अंतर्गत प्रामुख्याने घरगुती, व्यावसायिक, औद्योगिक, सार्वजनिक सेवा व इतर वर्गवारीतील १ लाख ६७ हजार ८२५ ग्राहकांकडे २५ कोटी ९१ लाख रुपयांची थकबाकी झाली आहे. यामुळे गेल्या दोन महिन्यांत परिमंडल अंतर्गत १ हजार १८२ ग्राहकांचा वीजपुरवठा तात्पुरत्या स्वरुपात खंडित करण्यात आला आहे. त्यामुळे थकबाकीदार वीजग्राहकांनी बिलांचा भरणा देय दिनांकापूर्वी करावा व वीजपुरवठा खंडित करण्याची कटू कारवाई टाळावी, असे आवाहन महावितरणकडून करण्यात आले आहे.

हेदेखील वाचा : रत्नागिरी परिमंडलात २५ कोटी ९१ लाखांची थकबाकी; दोन महिन्यांत १ हजार १८२ ग्राहकांचा…