Dharashiv Water Crisis: नागरिकांनो, पाणी जपून वापरा! धरणांत अवघा ६.४४ टक्के पाणीसाठा; पुढील १० महिने पाणी जपून वापरण्याचे आवाहन

Dharashiv Water Crisis: धाराशिव जिल्ह्यात आगामी काळात भीषण पाणीटंचाई निर्माण होण्याची शक्यता व्यक्त करण्यात आली आहे. ११ ऑक्टोबर रोजी जिल्ह्यातील सिंचन प्रकल्पांमध्ये केवळ ६.४४ टक्के उपयुक्त पाणीसाठा शिल्लक असल्याची माहिती समोर आली आहे.

• धाराशिवमध्ये पाणी आणीबाणीचे सावट!
• धरणांत अवघा ६.४४ टक्के पाणीसाठा
• पुढील १० महिने पाणी जपून वापरण्याचे आवाहन

Dharashiv Water Crisis: पावसाळा संपत आला तरी धाराशिव जिल्ह्यात भीषण पाणीटंचाईचे संकट गडद होऊ लागले आहे. वाढते तापमान, वेगाने होणारे बाष्पीभवन आणि खालावणारी भूजलपातळी यामुळे आगामी उन्हाळ्यात जिल्ह्यात पाण्याचा मोठा तुटवडा निर्माण होण्याची शक्यता आहे. जिल्ह्यातील सिंचन प्रकल्पांमध्ये ११ ऑक्टोबर रोजी केवळ ६.४४ टक्के उपयुक्त पाणीसाठा शिल्लक राहिला असून, पुढील १० महिने हे पाणी पुरवून वापरावे लागणार आहे. ही गंभीर परिस्थिती लक्षात घेता नागरिकांनी पाण्याचा अत्यंत काटकसरीने वापर करावा, असे आवाहन आमदार राणाजगजितसिंह पाटील यांनी केले आहे. (Dharashiv Water Crisis)

Nagpur News : पुन्हा २४ तास शटडाऊन ;काटकसरीचा दिला सल्ला; मनपा-ओसीडब्ल्यूचे अपयश

४१ दिवसांत जलसाठ्यात झपाट्याने घट

जिल्ह्यातील सिंचन प्रकल्पांची एकूण उपयुक्त पाणीसाठा क्षमता सुमारे ७२५ दशलक्ष घनमीटर (दलघमी) आहे. १ सप्टेंबर रोजी या प्रकल्पांमध्ये ५९.६ दलघमी पाणी उपलब्ध होते. मात्र, अवघ्या ४१ दिवसांत (११ ऑक्टोबरपर्यंत) यात १२.८५ दलघमीची घट होऊन हा साठा आता फक्त ४६.७५ दलघमीवर (६.४४ टक्के) आला आहे. ऑक्टोबर महिन्यात जिल्ह्याचे कमाल तापमान साधारणतः ३० ते ३१ अंश सेल्सिअस असते; परंतु यंदा ते ३४ ते ३५ अंशांपर्यंत पोहोचल्याने बाष्पीभवन वेगाने होत आहे.

भूजलपातळी तब्बल ८.६६ मीटरने खालावली

१ सप्टेंबर रोजी जिल्ह्यातील भूजलपातळीतील घसरण ६ मीटर होती, ती ऑक्टोबरच्या पहिल्या आठवड्यात थेट ८.६६ मीटरपर्यंत खाली गेली आहे. त्यामुळे विहिरी आणि बोअरवेलच्या पाणी उपलब्धतेवरही मोठा परिणाम होण्याची भीती आमदार पाटील यांनी व्यक्त केली आहे.

२०१५ च्या भीषण टंचाईची पुनरावृत्ती टाळण्यासाठी नियोजन

यापूर्वी २०१५ मध्ये जिल्ह्यात भीषण पाणीटंचाई निर्माण झाली होती, तेव्हा जलसाठा १२ दलघमीपर्यंत घसरला होता आणि प्रशासनाला ४६८ टँकर सुरू करावे लागले होते. तशीच परिस्थिती पुन्हा उद्भवू नये म्हणून आतापासूनच नियोजन सुरू करण्यात आले आहे. संभाव्य संकटाचा सामना करण्यासाठी प्रत्येक गावात ‘नोडल अधिकारी’ नियुक्त करण्यात आले आहेत. पिण्याच्या पाण्याचे नियोजन, जनावरांसाठी चारा-पाणी उपलब्धता आणि ग्रामीण भागात रोजगार मिळवून देण्याला प्राधान्य दिले जात असल्याचे त्यांनी सांगितले.

“पाणीटंचाईचा सामना करणे ही केवळ शासनाची जबाबदारी नसून प्रत्येक नागरिकाचे कर्तव्य आहे. राजकारण बाजूला ठेवून सर्वपक्षीयांनी सामूहिक जबाबदारीने काम करावे आणि नागरिकांनी पाण्याचा अपव्यय टाळावा.” अशी माहिती आमदार, राणाजगजितसिंह पाटील यांनी दिली.

Washim: आठवड्यात दोनवेळा पाणीपुरवठा करा, तंटामुक्त समिती अध्यक्षांचे ग्रामपंचायतला निवेदन