विद्यार्थ्यांच्या सोयीसाठी गोंदियाहून देवरीकडे सकाळी ५.३० वाजता सुरू करण्यात आलेली एसटी बस सध्या वारंवार उशिराने धावत असल्याने विद्यार्थ्यांना मोठ्या गैरसोयीला सामोरे जावे लागत आहे. बसच्या विलंबामुळे महाविद्यालयातील एक-दोन तासिका चुकत असून, त्याचा थेट परिणाम विद्यार्थ्यांच्या शैक्षणिक प्रगतीवर होत आहे. त्यामुळे विद्यार्थी व पालकांमध्ये संताप व्यक्त होत आहे.
गोंदिया-आमगाव-देवरी मार्गावर शिक्षणासाठी दररोज प्रवास करणाऱ्या विद्यार्थ्यांची संख्या मोठी आहे. विद्यार्थ्यांना महाविद्यालयात वेळेत पोहोचता यावे, या उद्देशाने गोंदिया एसटी आगारातून सकाळी साडेपाच वाजताची बस सुरू करण्यात आली. मात्र, ही बस निर्धारित वेळेत देवरी येथे पोहोचत नसल्याने विद्यार्थ्यांची गैरसोय होत आहे. बस उशिराने पोहोचल्यामुळे
विद्यार्थ्यांच्या महत्त्वाच्या तासिका चुकत असून, उपस्थिती आणि अभ्यासक्रम पूर्ण करण्यावरही परिणाम होत असल्याचे विद्यार्थ्यांचे म्हणणे आहे. ‘विद्यार्थ्यांच्या सोयीसाठी बस सुरू केली, मग वेळेचे नियोजन का नाही?’ असा सवालही विद्यार्थ्यांकडून उपस्थित केला जात आहे. एसटी महामंडळाने विद्यार्थ्यांच्या शैक्षणिक हिताचा विचार करून या बसचे वेळापत्रक सुरळीत करावे आणि सकाळी साडेपाचची बस निर्धारित वेळेत धावेल, याची दक्षता घ्यावी, अशी मागणी केली.
विद्यार्थ्यांच्या शैक्षणिक भवितव्याशी संबंधित या प्रश्नाकडे एसटी महामंडळाने गांभीर्याने लक्ष देऊन तातडीने कार्यवाही करावी, अशी मागणी जोर धरत असून वारंवार होणारा विलंब थांबला नाही, तर आंदोलनाचा मार्ग स्वीकारण्याचा इशाराही विद्यार्थ्यांनी दिला.
.png "Videos"){kind=small}
