महायुतीनंतर ‘मविआ’समोर बंडखोरी राखण्याचे आव्हान; वरिष्ठ नेत्यांना इचलकरंजीत करावी लागणार कसरत! 

महायुतीने राहुल आवाडे यांची उमेदवारी सर्वप्रथम जाहीर केली. त्यानंतर भाजपमधील नाराजी नाट्य खऱ्या अर्थाने सुरू झाले. माजी आमदार सुरेश हाळवणकर गटाने आवाडेंच्या उमेदवारीला जोरदार विरोध केला. निष्ठावंत विरुद्ध उपरा उमेदवार अशी तुलना करीत आवाडेंना खिंडीत गाठण्याचा प्रयत्न केला गेला. नाराज कार्यकर्त्यांची मनधरणी करण्यासाठी आणि हळवणकर आवाडे यांच्यातील मनोमिलन घडविण्यासाठी प्रदेशाध्यक्ष चंद्रशेखर बावनकुळे यांना इचलकरंजीत यावे लागले. बावनकुळेंच्या मध्यस्थीनंतर हळवणकर गट रिचार्ज झाला, मात्र भाजपाचे  माजी  जिल्हाध्यक्ष हिंदुराव शेळके यांनी पदाचा राजीनामा देऊन आवाडे विरोधकांना एकत्रित करून विरोधकांची मोट बांधली जाते का याची चाचपणी सुरू केली. अशा वातावरणात शिवसेना (शिंदे गट ) चे जिल्हाध्यक्ष रविंद्र माने यांनी निवडणूक रिंगणात उतरणार असल्याचे सांगत महायुतीला धक्का दिला हे वादळ अवघ्या चार दिवसात संपले मुख्यमंत्री शिंदे यांनी रविंद्र माने यांना पुनर्वसनाचा शब्द देऊन महायुतीसोबत राहण्याचा सल्ला दिला.

आता राष्ट्रवादी (अजित पवार ) गटाचे जिल्हाध्यक्ष विठ्ठल चोपडे अपक्ष म्हणून निवडणूक लढवणार आहेत. पदाचा राजीनामा देत त्यांनी मंगळवारी अर्ज दाखल करणार असल्याचे त्यांनी सांगितले. आता जांभळे गटाने ही कार्यकर्त्यांचा मेळावा घेत निवडणूक लढवण्याचा चंग बांधला आहे. त्यामुळे उमेदवारी अर्ज दाखल करण्याच्या शेवटच्या दिवशी महायुती बरोबरच महाविकास आघाडीतील नाराज मोठ्या संख्येने उमेदवारी अर्ज दाखल करण्यासाठी पुढे येणार आहेत. या मतदारसंघातील खरी लढत ही दुरंगीच असणार आहे. महायुतीचे राहुल आवाडे विरुद्ध महाविकास आघाडीचे मदन कारंडे अशी ही लढत होणार असली तरी महायुती आणि महाविकास आघाडीतील बंडखोर उमेदवारांची मोठी डोकेदुखी ठरणार आहे.

हेही वाचा: Maharashtra Election: महायुतीत अंतर्गत बंडखोरीची ठिणगी; इचलकरंजीत ‘या’ उमेदवाराच्या विरोधात अंतर्गत कुरघोड्या सुरुच

राष्ट्रवादी काँग्रेसच्या फुटीनंतर कारंडे व चोपडे यांच्यातही दरी निर्माण झाली. स्थानिक पातळीवर एकत्र काम करणाऱ्या कारंडे व चोपडे यांनी या निवडणूकीत विरुद्ध लढण्याचा निर्णय घेतला. राष्ट्रवादीतील कारंडे यांना मिळणाऱ्या  मताच्या विभागणीसाठी चोपडे यांची उमेदवारी पुढे आल्याची चर्चा दबक्या आवाजात  सुरू झाली आहे .

इचलकरंजीच्या राजकारणात आमदार प्रकाश आवाडे हे मुरब्बी आहेत. त्यांना या मतदारसंघातील विजयाची गणिते चांगली ज्ञात आहेत. डाव प्रतिडाव माहीत असल्याने विरोधकांना खिडींत गाठून नामोहरण करण्याची संधी ते सोडणार नाहीत. पुत्र प्रेमापोटी  कोणताही राजकीय डाव आवाडे खेळू शकतात.  दुरंगी लढतीत दगाफटका होऊ नये  यासाठी मताची विभागणी व्हावी आणि त्याचा फायदा महायुतीला मिळावा यासाठी प्रकाश आवाडें  काहींना मैदानात उतरण्यासाठी मनधरणी करू शकतात अशीही चर्चा ऐकावयास मिळत आहे.