महायुतीला टक्कर देण्यासाठी शरद पवारांच्या राष्ट्रवादीचा प्लॅन ठरला; शशिकांत शिंदे यांनी दिली माहिती

सातारा जिल्ह्यात महायुतीला टक्कर देण्यासाठी भाजपा वगळून समविचारी पक्षांशी युती करून निश्चित चांगली लढत देऊ, असा आत्मविश्वास शशिकांत शिंदे यांनी व्यक्त केला.

• आगामी निवडणुकांसाठी सर्व पक्षांची जोरदार तयारी
• स्थानिकच्या निवडणुकांसाठी राष्ट्रवादीचा प्लॅन
• शशिकांत शिंदे यांनी दिली माहिती

सातारा : आगामी निवडणुकांसाठी सर्व राजकीय पक्षांनी जोरदार तयारीला सुरुवात केली आहे. निवडणुका लवकरच होणार आहेत. राजकीय नेत्यांचे विविध भागात दौरेही वाढले आहेत. महायुती आणि महाविकास आघाडीकडून कार्यकर्त्यांना कामाला लागण्याचे आदेशही दिले आहेत. अशातच आता साताऱ्यातही शरद पवारांच्या राष्ट्रवादीकडून जोरदार तयारी सुरु आहे. सातारा येथील राष्ट्रवादी भवनामध्ये राष्ट्रवादी शरद पवार गटाच्या वतीने नगरसेवक आणि नगराध्यक्ष पदांच्या मुलाखती आयोजित करण्यात आल्या होत्या. त्यावेळी शशिकांत शिंदे यांनी स्वतः उमेदवारांशी चर्चा करून बऱ्याचशा निवडी अंतिम केल्याची माहिती आहे.

राष्ट्रवादी शरद पवार गटाला गळती लागली म्हणजे संपले असे नाही. रिकाम्या जागा भरून काढण्याचा प्रयत्न आहे. स्थानिक स्वराज्य संस्थांच्या निवडणुका जिंकणे हे जितके महत्त्वाचे तितकेच निवडणुकीत भूमिका घेणे महत्त्वाचे आहे. महाविकास आघाडीने त्या संदर्भात भूमिका घेतली आहे. जिल्ह्यात महायुतीला टक्कर देण्यासाठी भाजपा वगळून समविचारी पक्षांशी युती करून निश्चित चांगली लढत देऊ, असा आत्मविश्वास राष्ट्रवादी शरद पवार गटाचे प्रदेशाध्यक्ष शशिकांत शिंदे यांनी व्यक्त केला.

आमदार शिंदे म्हणाले, साताऱ्यातील सुसंस्कृत वर्ग, तरुण-तरुणी यांचा राष्ट्रवादी शरद पवार गटाला चांगला प्रतिसाद आहे. इतर मागास प्रवर्गाचे प्रतिनिधी भारतीय जनता पार्टीला नाकारून राष्ट्रवादी आणि महाविकास आघाडीच्या समविचारी पक्षांना साथ देत आहेत. त्याचे प्रतिबिंब साताऱ्यात दिसत आहे. ओबीसीच्या संदर्भाने राज्य शासनाने बरेच उलट सुलट निर्णय घेऊन संभ्रमावस्था निर्माण केली आहे. त्यामुळे या प्रवर्गामध्ये असंतोष आहे. सातारा शहरातही महाविकास आघाडी जास्तीत जास्त उमेदवार उभे करून पूर्ण ताकतीने निवडणूक लढवण्याच्या तयारीत आहे.

महाविकास आघाडी सातारा जिल्ह्यामध्ये यशस्वीपणे पुन्हा आपले अस्तित्व निर्माण करेल. भारतीय जनता पार्टी साेडून कोणत्याही समविचारी पक्षांशी आमची युती असणार आहे. स्थानिक समीकरणांना महत्त्व देऊन आणि जनमताचा कानोसा घेऊन जनमान्यतेने उमेदवार दिले जात आहेत. – आमदार शशिकांत शिंदे

नगराध्यक्षपदासाठी दिग्गज आमच्या संपर्कात

आमदार शशिकांत शिंदे म्हणाले, महाविकास आघाडीची जर सत्ता साताऱ्यात आली तर घडलेल्या घटनांचा आढावा घेऊन योग्य ती कार्यवाही जरूर केली जाईल. नगराध्यक्षपदासाठी व नगरसेवक पदासाठी अनेक इच्छुक व दिग्गज आमच्या संपर्कात आहेत, मात्र सर्व काही आत्ताच सांगता येणार नाही आपण काही काळ प्रतीक्षा करावी. परिणाम आपल्यासमोर दिसतील, असे शिंदे यांनी स्पष्ट केले.