शनिवार, 10 ऑक्टोबर 2026
राज्यातील वातावरणात होतोय कमालीचा बदल; नागरिकांना बसतोय 'ऑक्टोबर हीट'चा तडाखा (File Photo)
मुंबईत समुद्राकडून येणाऱ्या थंड वाऱ्यांच्या प्रवाहावरही हावरही परिणाम होत असल्याने उकाड्याची तीव्रता जाणवत आहे. मात्र, 20 ऑक्टोबरपासून कमाल तापमानात घट होऊन काहीसा दिलासा मिळण्याची शक्यता आहे, असा अंदाज ज्येष्ठ हवामानतज्ज्ञ माणिकराव खुळे यांनी व्यक्त केला. उत्तर गुजरातपासून पश्चिम बंगालपर्यंत तयार झालेल्या उच्च दाबाच्या पट्ट्यामुळे महाराष्ट्रातील हवेचा दाब सरासरीपेक्षा वाढला आहे. त्यात निरभ्र आकाशामुळे दिवसभर सूर्याची किरणे थेट जमिनीवर पडत असून, उष्ण व कोरडे वारेही तापमानवाढीस हातभार लावत आहेत.
दरम्यान, मुंबईत समुद्राकडून येणारे थंड वारे संथ झाल्यास जमिनीवरील उष्णता कमी होण्यास विलंब होतो. त्यामुळे सकाळचा आल्हाददायकपणा कमी होऊन दुपारनंतर उकाडा अधिक जाणवतो. पुढील दोन आठवड्यांत चक्रीवादळ किंवा महाराष्ट्रात पावसाची शक्यता नसल्याचे खुळे यांनी म्हटले आहे. दसऱ्यापासून, म्हणजे २० ऑक्टोबरपासून, तापमानात काहीशी घट होण्याची शक्यता असल्याचे खुळे म्हणाले.
विदर्भात पारा 39 अंशांवर; रात्रीचाही उकाडा वाढणार
खुळे यांच्या निरीक्षणानुसार, कोकणात कमाल तापमान ३३ ते ३८ अंश, मध्य महाराष्ट्रात ३४ ते ३८ अंश, मराठवाड्यात ३४ ते ३६.६ अंश, तर विदर्भात ३५ ते ३९ अंशांपर्यंत पोहोचले आहे. या भागांतील तापमान सरासरीपेक्षा लक्षणीय अधिक आहे. तुलनेने पहाटेच्या किमान तापमानात मोठी वाढ झालेली नसली, तरी अलिबागमध्ये किमान तापमान २७.६ अंश नोंदवण्यात आले. १६ ते २२ ऑक्टोबरदरम्यान रात्रीचाही उकाडा वाढण्याची शक्यता त्यांनी वर्तवली आहे.
