रविवार, 15 नोव्हेंबर 2026
छटपूजेवरून प्रकाश आंबेडकरांचा भाजपला थेट सवाल (संग्रहित फोटो)
Prakash Ambedkar on Chhath Pooja : छटपूजेवरून महाराष्ट्रातील राजकीय वातावरण चांगलंच तापलं आहे. शिवसेना उद्धव ठाकरे गट आणि मनसे यांनी घेतलेल्या भूमिकेवरून आता राजकीय आरोप-प्रत्यारोप सुरू झाले आहेत. अशातच वंचित बहुजन आघाडीचे अध्यक्ष प्रकाश आंबेडकर यांनी मोठी भूमिका घेत उद्धव ठाकरे आणि राज ठाकरे यांच्यावर निशाणा साधला आहे. (Prakash Ambedkar)
प्रकाश आंबेडकरांनी भाजपला थेट सवाल करत ठाकरे बंधूंवर NSA कायद्यांतर्गत कारवाई करणार की नाही, याचा खुलासा करण्याची मागणी केली आहे. यावेळी त्यांनी राष्ट्रवादी काँग्रेसच्या दोन्ही गटांच्या विलिनीकरणावरही मोठं विधान केलं.
प्रकाश आंबेडकर म्हणाले की, छटपूजेच्या विरोधाची व्याप्ती आता वाढत असून हा विरोध भाषेच्या आधारावर होत असल्याचं दिसत आहे. भाषा हीदेखील स्वतंत्र अस्मितेचा भाग आहे. भाषेच्या आधारावर देश आणि राज्यांमध्ये फूट पडण्याची ठिणगी पडली आहे, असं त्यांनी म्हटलं.
याच मुद्द्यावरून त्यांनी भाजपला सवाल केला. उद्धव ठाकरे आणि राज ठाकरे यांच्यावर NSA कायद्यांतर्गत कारवाई होणार आहे का, हे भाजपने स्पष्ट करावं. कारवाई झाली नाही, तर भाजपच्या अजेंड्यासाठी ठाकरे बंधूंचा वापर केला जात असल्याची आपली समजूत होईल, असा इशाराही आंबेडकर यांनी दिला.
राष्ट्रवादी काँग्रेसच्या विलिनीकरणाच्या चर्चेवर बोलतानाही आंबेडकरांनी मोठा दावा केला. दोन्ही राष्ट्रवादी काँग्रेस हे भाजपचे A टीम आणि B टीम असल्याचा आरोप त्यांनी केला. दोन्ही पक्षांचं विलिनीकरण होणार नसल्याचंही ते म्हणाले. सुनेत्रा पवार यांचं राजकीय वजन वाढवलं जात असून एकनाथ शिंदे यांना डावलण्याचा प्रयत्न सुरू असल्याचा दावाही त्यांनी केला. शिंदे यांनी या परिस्थितीत सावध राहावं, असंही आंबेडकर म्हणाले.
मुंबईमध्ये छट पूजेला शिवसेनेकडून याआधी ही विरोध झाला होता. ही छट पूजा मुंबईत का? हा त्या विरोधाचा सूर होता. आताही शिवसेना उबाठा, मनसेने त्याचा विरोध केलाय. आता त्या विरोधाची व्याप्ती वाढली आहे. आताचा विरोध हा भाषा आधारित होतोय. भाषा ही सुद्धा सब नॅशनॅलिटी आहे, हे आपण लक्षात घ्यावे. भावनेच्या आधाराला धरून भाषेचा प्रश्न उपस्थित केला जातोय.
भाषेच्या आधारावर जगभरात राज्य, देश फुटले आहेत. भाषेवरून द्वेषाची ठिणगी पाडणारे हे देशद्रोही आहेत. उद्धव ठाकरे, राज ठाकरे या दोघांवर NSA कायद्या अंतर्गत कारवाई होणार कि नाही? याचा खुलासा भाजपने करावा. भाजपाने जर कारवाई केली नाही, तर भाजप स्वतःचा अजेंडा पुढे करण्यासाठी यांचा वापर करतंय हे स्पष्ट होईल. #छठ_पूजा #मुंबई — Prakash Ambedkar (@Prksh_Ambedkar) November 15, 2026
दरम्यान, कर्जतमधील वृक्षतोडीच्या मुद्द्यावरही प्रकाश आंबेडकर यांनी भूमिका मांडली. आदिवासींच्या माध्यमातून संबंधित कंपनी आणि सरकारवर अॅट्रॉसिटी कायद्यांतर्गत कारवाई होऊ शकते, असं त्यांनी सांगितलं.
या प्रकरणात न्यायालयीन प्रक्रियेचा वापर करून याचिका फेटाळण्याचा प्रयत्न होत असल्याचा आरोपही त्यांनी केला. त्यामुळे छटपूजा, राष्ट्रवादीचं राजकारण आणि कर्जतमधील वृक्षतोड या तिन्ही मुद्द्यांवर आंबेडकरांच्या विधानांची चर्चा सुरू झाली आहे.
Ans: छटपूजेच्या विरोधावरून उद्धव ठाकरे आणि राज ठाकरे यांच्यावर NSA कायद्यांतर्गत कारवाई करणार का, याबाबत भाजपने आपली भूमिका स्पष्ट करावी, अशी मागणी प्रकाश आंबेडकर यांनी केली.
Ans: दोन्ही राष्ट्रवादी काँग्रेस हे भाजपचे A टीम आणि B टीम असल्याचा आरोप करत दोन्ही पक्षांचं विलिनीकरण होणार नसल्याचा दावा प्रकाश आंबेडकर यांनी केला.
Ans: सुनेत्रा पवार यांचं राजकीय वजन वाढवलं जात असून एकनाथ शिंदे यांचं महत्त्व कमी करण्याचा प्रयत्न सुरू असल्याचा दावा प्रकाश आंबेडकर यांनी केला.
