Mumbai Ganeshotsav 2026: लालबागमध्ये यंदा साकारली जाणार २२ फूट उंच पर्यावरणपूरक गणेशमूर्ती; ज्योतिबाच्या रूपाची अनोखी संकल्पना

श्रावण सुरू होताच मुंबईकरांना आता वेध लागले आहेत ते लाडक्या बाप्पाच्या आगमनाचे. यंदा तेजुकाया सार्वजनिक गणेशोत्सव ट्रस्ट, लालबागच्या हीरक महोत्सवी वर्षात २२ फूट उंच पर्यावरणपूरक गणेशमूर्ती हे विशेष आकर्षण ठरणार असून, ही मूर्ती ज्योतिबाच्या रूपावर आधारित असणार आहे.

• तेजुकाया सार्वजनिक गणेशोत्सव साकारणार २२ फूट उंच पर्यावरणपुरक गणेशमूर्ती
• पर्यावरणपूरक साहित्याचा वापर करून भक्तांना देण्यात येणार संवर्धनाचा संदेश
• ज्योतिबाच्या रूपाची अनोखी संकल्पना

अवघ्या एक महिन्यावर मुंबईचा गणेशोत्सव येऊन ठेपला आहे. पवित्र मास श्रावणाचा आरंभ झाला असून श्रावणी शनिवार, सोमवार, रक्षाबंधन, नारळी पौर्णिमा आणि गोकुळाष्टमी पूर्वीच मुंबईकरांना वेध लागले आहे ते भाद्रपद महिन्यातील गणेश चतुर्थीचे, आपल्या लाडक्या बाप्पाच्या मंगल मूर्ती गणरायाच्या आगमनाचे मुंबईतील गणेशोत्सवाची समृद्ध परंपरा जपत तेजुकाया सार्वजनिक गणेशोत्सव ट्रस्ट, लालबाग यंदा आपल्या हीरक महोत्सवी वर्षांत गणेशोत्सवाचे भव्य आयोजन करीत आहे. या ऐतिहासिक वर्षाचे विशेष आकर्षण ठरणार आहे ते म्हणजे कागदाच्या लगदयापासून साकारण्यात आलेली २२ फूट उंच पर्यावरणपूरक गणेशमूर्तीचे. यंदाची भव्य गणेशमूर्ती मूर्तिकार राजन झाड यांच्या संकल्पना आणि कलाकौशल्यातून साकारण्यात येत आहे.

पर्यावरणपूरक साहित्याचा वापर करून भक्तांना देण्यात येणार संवर्धनाचा संदेश

मोठ्या आकाराची मूर्ती असूनही पर्यावरणपूरक साहित्याचा वापर करून पर्यावरण संवर्धनाचा संदेश देण्याचा अभिनव प्रयत्न ट्रस्टने केला आहे असे अध्यक्ष राजेंद्र सातार्डेकर सांगतात. गणेश उत्सवात उत्साही सहकारी सचिव संतोष शिंदे आणि खजिनदार अमोल भांबड यांच्यासह ट्रस्टचे तसेच कार्यकर्ते यांचे मोठे योगदान लाभते.

गणेश मंडळांसाठी ‘वन विंडो’ प्रणाली सुरू! मंडप परवानगीसाठी येत्या १३ सप्टेंबरपर्यंत महापालिकेकडे ऑनलाईन अर्ज करा दाखल

पर्यावरणपूरक विचारांची नवी दिशा देणारा उत्सव

हीरक महोत्सवाच्या या ऐतिहासिक पर्वात परंपरा, भक्ती, अध्यात्म आणि पर्यावरण संवर्धन यांचा सुंदर मिलाफ साधण्याचा प्रयत्न तेजुकाया सार्वजनिक गणेशोत्सव ट्रस्टने केला आहे. गेल्या अनेक दशकांची गणेशोत्सवाची परंपरा पुढे नेत यंदाचा उत्सव सामाजिक बांधिलकी आणि पर्यावरणपूरक विचारांची नवी दिशा देणारा ठरणार आहे असे सचिव संतोष शिंदे सांगतात.

मूर्तीची संकल्पना ज्योतिबाच्या रूपावर आधारित गणेशोत्सव

यंदाचे वैशिष्ट्य म्हणजे यंदाच्या गणेशमूर्तीची संकल्पना कोल्हापूर ज्योतिबा रूपावर आधारित आहे. या संकल्पनेमागील धार्मिक, सांस्कृतिक आणि आध्यात्मिक संदेश ट्रस्टने सध्या गोपनीय ठेवला आहे. त्यामुळे या अनोख्या संकल्पनेचा उलगडा गणेशभक्तांना प्रत्यक्ष दर्शनाच्या वेळीच होणार आहे, असे राजेंद्र सातोंडकर यांनी सांगितले.

Ganeshotsav 2026: डोंबिवलीत पर्यावरणपूरक पंचगव्य गणपतीची पर्वणी; घरच्या घरी करता येणार विसर्जन

‘ज्योतिबाच्या नावानं चांगभलं’चा केला जयघोष

गुलालाची उधळणकरीत येतील भक्तजन ज्योतिबाच्या नावानं चांग भलं असा जयघोष करीत ज्योतिबाला गुलाल, खोबरे, खारका उडवीत आणि श्रींना दवणा अर्पण करीत दर्शन सोहळ्याचा लाभ घेतील हे मात्र ओघाने आलेच. कोल्हापूर मुंबईकर भाविक ‘सासन काठ्या’ घेऊन दर्शनात आस्थेने सहभागी होण्यासाठी येतानाचे दृष्य ही पाहण्यास मिळण्याची शक्यता आहे. तसेच दर रविवारी जोतिबाचे खेटे घालण्याची परंपरा असल्याने काही भाविक देवाला ‘खेटे’ घालण्याची परंपरा येथेही करतात का हे पाहण्याचा योग येऊ शकतो, असे भाविकांचे म्हणणे आहे.

(डिस्क्लेमर: हे नवराष्ट्र वृत्तपत्राचे स्वयंचलित न्यूज फीड आहे. ते navarashtra.com च्या कर्मचाऱ्यांनी संपादित केलेले नाही.)