गुरुवार, 1 ऑक्टोबर 2026
'शिवाजी महाराजांचा अपमान सहन करणार नाही'; अभिजीत दिपकेंच्या आंदोलनावर नितेश राणेंचा घणाघात
Nitesh Rane On Abhijeet Dipke : कॉक्रोच जनता पार्टीच्या उद्या (शुक्रवार, 2 ऑकटोबर) मुंबईत होणाऱ्या आंदोलनावरून राजकीय वातावरण चांगलंच तापलं आहे. या आंदोलनावरून महायुतीतील नेत्यांकडून मोठ्या प्रमाणात टीका करण्यात येत असून आता भाजप नेते नितेश राणे यांनी सुद्धा यात भर टाकली आहे.
नितेश राणे यांनी CJP चे संस्थापक अभिजीत दिपके यांच्यावर जोरदार टीका करत, छत्रपती शिवाजी महाराजांचा अपमान करणारा फोटो सोशल मीडियावर पोस्ट केल्याचा आरोप करत दिपकेंनी माफी मागावी, अशी मागणी राणेंनी केली.
CJPकडून 2 ऑक्टोबरला मुंबईत आंदोलनाची घोषणा करण्यात आली आहे. या आंदोलनाची प्रमुख मागणी मुख्य निवडणूक आयुक्त ज्ञानेश कुमार यांच्या राजीनाम्याची आहे. निवडणूक प्रक्रियेशी संबंधित मुद्दे आणि SIRवरही CJPकडून आक्षेप नोंदवण्यात आले आहेत. दरम्यान, शिवाजी पार्कमधील प्रस्तावित आंदोलनाला मुंबई पोलिसांनी परवानगी नाकारल्याची माहिती यापूर्वीच समोर आली आहे. त्यानंतर अभिजीत दिपकेंनी ‘जेल भरो आंदोलन’ करण्याची घोषणा केली होती.
याच आंदोलनाच्या पार्श्वभूमीवर नितेश राणेंनी दिपकेंवर निशाणा साधला. “अभिजीत दिपकेंच्या आंदोलनाला आपला आक्षेप नाही, मात्र ते ज्या व्यक्तींना समर्थन देतात आणि आंदोलनाच्या प्रचारासाठी वापरल्या जाणाऱ्या काही प्रतिमांवर आपली हरकत आहे, ” असं राणेंनी म्हटलं.
दिपकेंनी सोशल मीडियावर पोस्ट केलेल्या एका फोटोचा संदर्भ देत राणेंनी त्यात छत्रपती शिवाजी महाराजांच्या खाली मावळ्यांच्या ऐवजी ‘क्रॉक्रोज’ दाखवण्यात आल्याचा दावा केला. हा महाराजांचा अपमान असल्याचं म्हणत ‘मुंबईतील कुठलाही शिवप्रेमी आणि देशभक्त हा अपमान सहन करणार नाही,’ अशी भूमिका त्यांनी मांडली.
दुसऱ्या फोटोचा संदर्भ देतही राणेंनी आक्षेप घेतला. या प्रतिमेत महात्मा गांधींच्या पायाजवळ छत्रपती शिवाजी महाराजांचं नाव दाखवल्याचा त्यांनी दावा केला. या प्रतिमांबाबत अभिजीत दिपकेंनी स्पष्टीकरण द्यावं आणि माफी मागावी, अशी मागणी राणेंनी केली.
दरम्यान, उमर खालिद यांच्या समर्थनाच्या मुद्द्यावरूनही नितेश राणेंनी दिपकेंना लक्ष्य केलं. ‘हे आंदोलन नेमकं कुणासाठी आहे?’ असा सवाल करत त्यांनी आंदोलनाच्या भूमिकेवर प्रश्न उपस्थित केले.
‘महाराष्ट्रात लोकशाही आहे, कुणीही घाबरत नाही. आंदोलन करायचं असेल तर करा; मात्र छत्रपती शिवाजी महाराजांचा अपमान आम्ही सहन करणार नाही,’ अशी भूमिका राणेंनी मांडली.
CJP कडून मात्र हे आंदोलन निवडणूक आयोगाच्या कार्यपद्धतीविरोधात आणि ज्ञानेश कुमार यांच्या राजीनाम्याच्या मागणीसाठी असल्याचं सांगण्यात आलं आहे. त्यामुळे आंदोलनाच्या आधीच राणेंनी केलेल्या वक्तव्यांनुसार शिवाजी महाराजांच्या कथित अवमानावरून नवा राजकीय वाद पेटण्याची चिन्हं आहेत.
