Tribal Student Protest Azad Maidan
मुंबई : आदिवासी विद्यार्थ्यांच्या आंदोलनावरून ( Tribal Students Protest) राज्यातील राजकीय वातावरण पुन्हा तापलं आहे. आझाद मैदानात आंदोलन करण्याची परवानगी नाकारून सरकारने आदिवासी विद्यार्थ्यांवर अन्याय केल्याचा आरोप काँग्रेसने केला आहे. लोकशाहीमध्ये आंदोलन करण्याचा अधिकार प्रत्येकाला असताना सरकार आणि पोलिसांकडून विद्यार्थ्यांची मुस्कटदाबी केली जात असल्याचा दावा काँग्रेसने केला.
आदिवासी विद्यार्थ्यांनी आझाद मैदानात आंदोलन करण्याची परवानगी द्यावी किंवा राज्यपालांची भेट घडवून द्यावी, अशी मागणी केली होती. मात्र, या मागणीवरून पोलिसांनी विद्यार्थ्यांना त्रास दिल्याचा आणि अखेर त्यांना ताब्यात घेतल्याचा आरोप काँग्रेसने केला आहे.
आदिवासी विद्यार्थ्यांनी आश्रमशाळांमधील विद्यार्थ्यांच्या मृत्यूच्या घटनांची निष्पक्ष चौकशी करण्याची मागणी केली आहे. तसेच आदिवासी विकास मंत्र्यांचा राजीनामा आणि आदिवासी आयुक्तांची बदली करण्याची मागणी करण्यात आली आहे.
आश्रमशाळांमध्ये विद्यार्थ्यांना मूलभूत सुविधा मिळाव्यात, सेंट्रल किचनमधून मिळणाऱ्या जेवणाचा दर्जा सुधारावा, यासह इतर मागण्यांसाठी विद्यार्थी आंदोलन करत आहेत. विद्यार्थ्यांच्या म्हणण्यानुसार, मागील दोन वर्षांत आश्रमशाळांमधील 600 विद्यार्थ्यांचा मृत्यू झाला असून, या दाव्याची निष्पक्ष चौकशी करण्यात यावी, अशी त्यांची मागणी आहे.
आपल्या मागण्यांकडे सरकारचं लक्ष वेधण्यासाठी आदिवासी विद्यार्थ्यांनी नाशिकहून मुंबईच्या दिशेने लॉन्ग मार्च काढला. विद्यार्थ्यांच्या म्हणण्यानुसार, त्यांच्या आंदोलनाला 48 दिवस झाले आहेत.
मुंबईच्या जवळ हा लॉन्ग मार्च आल्यानंतर पोलिसांनी विद्यार्थ्यांना रोखण्याचा प्रयत्न केल्याचा आरोप काँग्रेसने केला आहे. काही विद्यार्थ्यांना ताब्यात घेण्यात आल्याचंही काँग्रेसकडून सांगण्यात आलं.
काँग्रेसने या विद्यार्थ्यांच्या राहण्याची व्यवस्था दादर येथील टिळक भवन कार्यालयात केली होती. मात्र, मध्यरात्री पोलिसांनी विद्यार्थ्यांना ताब्यात घेण्याचा प्रयत्न केल्याचा आरोप काँग्रेसने केला आहे.
पोलिसांनी पक्ष कार्यालयात प्रवेश करून विद्यार्थ्यांना धमकावल्याचा आरोपही काँग्रेसने केला. टिळक भवनाबाहेर मोठ्या संख्येने पोलीस आणि वाहनांचा ताफा तैनात करण्यात आल्याचा दावा पक्षाने केला आहे.
पक्ष कार्यालयात पोलिसांनी प्रवेश का केला, असा सवाल काँग्रेस नेत्यांनी उपस्थित केला. पोलिसांकडून याबाबत समाधानकारक उत्तर मिळालं नसल्याचा दावाही काँग्रेसने केला आहे.
भाजप सरकार पोलिसांना पुढे करून दडपशाही करत असल्याचा आरोप काँग्रेसने केला आहे. ही दडपशाही खपवून घेतली जाणार नाही, असा इशाराही काँग्रेस नेत्यांनी दिला. काँग्रेस पक्ष आदिवासी विद्यार्थ्यांच्या पाठीशी खंबीरपणे उभा असून, पुढेही त्यांच्या लढ्याला पाठिंबा देणार असल्याचं पक्षाने स्पष्ट केलं.
लोकसभेतील विरोधी पक्षनेते राहुल गांधी यांनीही आदिवासी विद्यार्थ्यांच्या मागण्यांना पाठिंबा दिला आहे. या लढ्यात काँग्रेस पक्ष विद्यार्थ्यांसोबत असल्याचं राहुल गांधी यांनी सांगितलं.
दरम्यान, आदिवासी विद्यार्थ्यांच्या मागण्या, पोलिसांची भूमिका आणि काँग्रेसच्या आरोपांवरून राज्यात राजकीय आरोप-प्रत्यारोप आणखी तीव्र होण्याची शक्यता आहे.
.png "Videos"){kind=small}
