बुधवार, 7 ऑक्टोबर 2026
फोटो सौजन्य सोशल मीडिया
सोमवारी रात्री घडलेल्या या घटनेमुळे परिसरात खळबळ उडाली आहे. दरम्यान, वैष्णवचा मृत्यू नेमका मारहाणीमुळे झाला की अन्य कारणाने, हे शवविच्छेदन अहवालानंतर स्पष्ट होणार आहे.
शिवनगर परिसरात मस्कऱ्या गणपतीची स्थापना करण्यात आली असून, त्यानिमित्त विविध सांस्कृतिक कार्यक्रम सुरू आहेत. सोमवारी रात्री चिमुकली आईसोबत गणपतीचा देखावा पाहण्यासाठी गेली होती. त्यानंतर आई-वडील जवळच राहणाऱ्या नातेवाइकाकडे गेले. याचदरम्यान शेजारी राहणाऱ्या नारायण वैष्णवने चिमुकलीला तिचे वडील बोलावत असल्याचे सांगून स्वतःच्या घरी नेल्याचा आरोप आहे.
घरातील दिवा बंद करून दरवाजा लावण्याचा प्रयत्न होत असताना चिमुकलीला संशय आला. तिने नारायणच्या हाताला चावा घेत तेथून पळ काढला आणि घरी पोहोचून आई-वडिलांना प्रकार सांगितला.
Nagpur Crime : चार ट्रकांना एकच नंबर; कर्जाच्या जाळ्यातून वाचण्यासाठी बनावट नंबरप्लेटचा फंडा
घटनेची माहिती परिसरात पसरताच काही नागरिक संतप्त झाले. त्यांनी नारायणला घेरून त्याला हातबुक्क्यांनी मारहाण केली. या मारहाणीत तो गंभीर जखमी झाला. घटनेची माहिती मिळताच पारडी पोलिसांनी घटनास्थळी धाव घेत त्याला मेयो रुग्णालयात दाखल केले.
मात्र, उपचारादरम्यान मंगळवारी दुपारी साडेदोनच्या सुमारास त्याचा मृत्यू झाला. पोलिसांनी घटनेची नोंद करून चिमुकलीसोबत घडलेल्या कथित प्रकारासह नारायणच्या मृत्यूचे नेमके कारण आणि मारहाणीच्या घटनेचा तपास सुरू केला आहे.
चिमुकलीवर अत्याचाराचा प्रयत्न झाल्याची माहिती मिळताच संतप्त नागरिकांनी कायदा हातात घेतल्याचा आरोप आहे.
अलिकडेच बेलतरोडी परिसरातही जमावाच्या मारहाणीत एका तरुणाचा मृत्यू झाल्याची घटना घडली होती. त्यामुळे गंभीर आरोप असलेल्या प्रकरणांत कायदा हातात घेण्याची प्रवृत्ती आणि त्यातून होणारे परिणाम पुन्हा चर्चेत आले आहेत.
नारायणचा मृत्यू नेमका कोणत्या कारणामुळे झाला, है शवविच्छेदन अहवालानंतरच स्पष्ट होणार आहे.
