Nagpur News : अतिक्रमण हटविण्याची कारवाई केवळ दिखावा? काही तासांतच पुन्हा जैसे थे स्थिती; वाहतूक कोंडीने नागपूरकर त्रस्त!

Nagpur News : नागपूर शहरातील अतिक्रमण हटविण्याची महापालिकेची कारवाई केवळ तात्पुरती ठरत असल्याचे चित्र समोर येत आहे. कारवाई केल्यानंतर अवघ्या काही तासांतच संबंधित ठिकाणी पुन्हा अतिक्रमण होत असल्याने रस्त्यांची परिस्थिती जैसे थे होत आहे. यामुळे वाहतुकीला अडथळे निर्माण होत असून, वाहतूक कोंडीचा त्रास नागपूरकरांना सहन करावा लागत आहे.

• अतिक्रमणामुळे व्यपाऱ्यांची दुहेरी कोंडी
• जबाबदारी निश्चित करण्याची गरज
• सीताबर्डीतील कारवाईचा दावा हवेत

Nagpur News : शहरातील अतिक्रमण हटविण्यासाठी मनपाकडून सातत्याने मोहिमा जाहीर होत असल्या तरी प्रत्यक्ष परिस्थितीत फारसा बदल झालेला दिसत नाही. आयुक्तांनी शंभर दिवसांचे मिशन जाहीर केले, त्यानंतर प्रत्येक झोनने दररोज दहा किलोमीटर रस्ता अतिक्रमणमुक्त करण्याचे उद्दिष्ट निश्चित केले.

मात्र, या घोषणांनंतरही शहरातील प्रमुख रस्ते आणि बाजारपेठा अतिक्रमणाच्या विळख्यातच आहेत. सणासुदीच्या खरेदीसाठी बाजारपेठांमध्ये गर्दी वाढली आहे. त्यात रस्त्यांच्या कडेला उभ्या राहणाऱ्या हातगाड्या, फुटपाथवर थाटलेली दुकाने आणि अनधिकृत विक्रेत्यांमुळे वाहतुकीची कोंडी अधिकच तीव्र झाली आहे.

मनपाचे पथक कारवाई करून परतताच काही तासांतच हटविलेली दुकाने आणि हातगाड्‌या पुन्हा त्याच जागी उभ्या राहत असल्याचे चित्र आहे. दररोज कारवाईचे फोटो आणि आकडे समोर येत असले तरी त्याचा परिणाम रस्त्यांवर दिसत नसल्याने अतिक्रमणविरोधी मोहिमेच्या कार्यक्षमतेवरच प्रश्नचिन्ह निर्माण झाले आहे.

Court Decision : अविवाहित मुलीलाही पोटगीचा अधिकार; नागपूर खंडपीठाचा निर्वाळा

अतिक्रमणामुळे व्यपाऱ्यांची दुहेरी कोंडी

अतिक्रमणाचा फटका केवळ वाहतुकीलाच बसत नसून स्थानिक व्यापा-यांनाही मोठी किंमत मोजावी लागत आहे. ऑनलाइन खरेदी आणि ई-कॉमर्सच्या वाढत्या स्पर्धेमुळे आधीच अडचणीत असलेल्या पारंपरिक दुकानदारांसाठी रस्त्यांवरील अतिक्रमण आणखी एक संकट ठरत आहे. इतवारी, महाल, धरमपेठ, सदर आणि सेंट्रल एव्हेन्यूतील व्यापा-यांच्या मते, पार्किंगची अपुरी व्यवस्था आणि रस्त्यांवर वाढलेले अतिक्रमण यामुळे ग्राहक बाजारपेठेत येण्याचे टाळत आहेत.

जबाबदारी निश्चित करण्याची गरज

केवळ जप्ती करून किंवा अधूनमधून मोहीम राबवून अतिक्रमणाची समस्या सुटणार नाही. अतिक्रमण करणाऱ्यांवर कठोर दंडात्मक कारवाई करण्यासोबतच कारवाईनंतर पुन्हा अतिक्रमण होऊ न देण्याची जबाबदारी संबंधित अधिकाऱ्यांवर निश्चित करणे गरजेचे आहे. अन्यथा मोहिमा केवळ कागदावरच सुरू राहतील आणि वाहतूक कोंडी अधिकच गंभीर होत जाईल.

Crime News: २० रुपये मागितले… आईने नकार दिला; शाळेच्या वाटेवर निघालेल्या नैतिकचा धक्कादायक अंत

सीताबर्डीतील कारवाईचा दावा हवेत

सीताबर्डी परिसरात मनपा प्रवर्तन विभागाने दिवसभर कारवाई करून मुख्य रस्ता, व्हरायटी चौक आणि मल्टी-लेव्हल पार्किंग परिसर अतिक्रमणमुक्त केल्याचा दावा केला. मात्र, संध्याकाळ होताच या दाव्याची स्थिती स्पष्ट झाली. हटविण्यात आलेले विक्रेते पुन्हा रस्त्याच्या कडेला परतले.

महाल, मेडिकल चौक, खामला, देवनगर, धरमपेठ मार्केट, रामेश्वरी, मानेवाडा रोड आणि हनुमान नगर येथेही परिस्थिती फारशी वेगळी नाही. प्रशासनाने कारवाई पूर्ण झाल्याचे समाधान मानले; मात्र नागरिकांना त्याचा कोणताही फायदा झाला नाही. धरमपेठ आणि गोकुळपेठसारख्या प्रमुख व्यापारी भागांत तर फुटपाथच विक्रेत्यांच्या ताब्यात गेल्याचे चित्र आहे.