Nashik Potholes: नाशिकमध्ये ठाकरे गटाचा एल्गार! ‘मनपावर सदोष मनुष्यवधाचा गुन्हा दाखल करा’; संजय राऊतांचा प्रशासनावर हल्लाबोल

Nashik Potholes: नाशिक शहरातील खड्डे आणि महापालिका प्रशासनाच्या कारभाराविरोधात ठाकरे गटाच्या शिवसेनेकडून भव्य जनआक्रोश मोर्चाचे आयोजन करण्यात आले. खासदार संजय राऊत आणि खासदार राजाभाऊ वाजे यांच्या नेतृत्वाखाली हा मोर्चा काढण्यात आला.

• नाशिकमध्ये ठाकरे गटाचा एल्गार
• खड्ड्यांविरोधात संजय राऊतांच्या नेतृत्वात जनआक्रोश मोर्चा
• संजय राऊतांचा प्रशासनावर हल्लाबोल

Sanjau Raut On Nashik Potholes: नाशिक शहरातील ( Nashik Potholes) खड्डे, खराब रस्ते आणि महापालिका प्रशासनाच्या कारभाराविरोधात ठाकरे गटाच्या शिवसेनेने आक्रमक भूमिका घेतली आहे. याच पार्श्वभूमीवर आज (17 ऑगस्ट 2026) नाशिकमध्ये ठाकरे गटाकडून भव्य जनआक्रोश मोर्चाचे आयोजन करण्यात आले. खासदार संजय राऊत यांच्या नेतृत्वाखाली हा मोर्चा काढण्यात आला असून, खासदार राजाभाऊ वाजे यांच्यासह ठाकरे गटाचे पदाधिकारी आणि कार्यकर्ते मोठ्या संख्येने सहभागी झाले. हा मोर्चा नाशिकमधील शिवसेना कार्यालयापासून नाशिक महापालिका कार्यालयापर्यंत काढण्यात आला. शहरातील रस्त्यांवरील खड्डे, त्यामुळे नागरिकांना होणारा त्रास आणि अपघातांचा वाढता धोका याकडे महापालिका प्रशासनाचे लक्ष वेधण्यासाठी हा मोर्चा काढण्यात आला.

Nashik News: श्रावणी सोमवारच्या गर्दीचा वाहतुकीला फटका; खड्डे अन् अपघातांमुळे नाशिक-त्र्यंबक मार्ग ठप्प

मोर्चात यमराज आणि रेड्याचे प्रतीकात्मक रूप

ठाकरे गटाने या मोर्चाला आक्रमक स्वरूप देताना प्रतीकात्मक यमराज आणि रेडा देखील मोर्चात आणला. खराब रस्त्यांमुळे नागरिकांच्या जीवाला धोका निर्माण होत असूनही महापालिका प्रशासनाकडून ठोस उपाययोजना होत नसल्याचा आरोप ठाकरे गटाकडून करण्यात आला. यावेळी संजय राऊत यांनी महापालिका प्रशासनावर जोरदार टीका केली. ‘यमाने आता मनपात जाऊन माजालेल्यांवर रेडा सोडायचा,’ असा टोला त्यांनी प्रशासनाला लगावला.

‘महापौर, आयुक्तांकडे संवेदनशीलता असेल तर निवेदन स्वीकारा’

मोर्चादरम्यान बोलताना संजय राऊत यांनी महापालिका प्रशासनाला लक्ष्य केले. ‘महापौर, आयुक्तांकडे संवेदनशीलता असेल तर निवेदन स्वीकारा,’ असे आवाहन त्यांनी केले. नागरिकांच्या समस्यांकडे प्रशासनाने गांभीर्याने पाहण्याची गरज असल्याचे त्यांनी म्हटले. नाशिक शहरातील रस्त्यांची झालेली दुरवस्था, खड्ड्यांमुळे वाहनचालक आणि पादचाऱ्यांना होणारा त्रास तसेच अपघातांचा धोका याबाबत ठाकरे गटाकडून महापालिकेकडे जाब विचारण्यात आला.

महापालिका प्रशासनाविरोधात निवेदन

मोर्चानंतर ठाकरे गटाकडून महापालिका आयुक्तांना निवेदन देण्यात येणार आहे. शहरातील रस्त्यांची तातडीने दुरुस्ती करावी, खड्डे बुजवावेत आणि नागरिकांच्या सुरक्षिततेसाठी ठोस उपाययोजना कराव्यात, अशी मागणी निवेदनाच्या माध्यमातून करण्यात येणार आहे.

‘मनपावर सदोष मनुष्यवधाचा गुन्हा दाखल करा’

ठाकरे गटाचे नेते सुनील राऊत यांनीही महापालिका प्रशासनावर गंभीर आरोप केले. रस्त्यांची दुरवस्था आणि खड्ड्यांमुळे नागरिकांच्या जीवाला धोका निर्माण होत असल्याचा आरोप करत महापालिका प्रशासनावर सदोष मनुष्यवधाचा गुन्हा दाखल करण्याची मागणी त्यांनी केली. दरम्यान, नाशिकमधील खड्ड्यांचा प्रश्न आगामी काळात आणखी तापण्याची शक्यता आहे. पावसाळ्यात रस्त्यांची झालेली दुरवस्था आणि नागरिकांच्या सुरक्षेचा मुद्दा उपस्थित करत ठाकरे गटाने महापालिका प्रशासनाला थेट लक्ष्य केले आहे. त्यामुळे या मोर्चानंतर महापालिका प्रशासनाकडून कोणती भूमिका घेतली जाते, याकडे नाशिककरांचे लक्ष लागले आहे.

प्रदूषण रोखण्यासाठी महापालिकेचे ‘एआय’ अस्त्र! एअरवाईज प्रणालीद्वारे ७५ ठिकाणी हायपरलोकल सेन्सर्स; प्रशासनाचे सूक्ष्म नियोजन