नितीन गडकरींचे राजकारणातून निवृत्तीचे संकेत? ‘सत्ता काही कामाची नाही...’; नव्या पिढीबाबत मोठं वक्तव्य
Nitin Gadkari: केंद्रीय रस्ते वाहतूक आणि महामार्ग मंत्री नितीन गडकरी हे त्यांच्या रोखठोक विधानांमुळे, उत्कृष्ट कामांमुळे आणि राजकीय भूमिकेमुळे नेहमीच चर्चेत असतात. त्यांच्या वक्तव्यांमुळे आणि कामाच्या शैलीमुळे ते अनेकदा माध्यमांमध्ये केंद्रस्थानी असतात. अशातच नितीन गडकरी यांनी केलेल्या एका वक्तव्यामुळे त्यांच्या राजकीय निवृत्तीची चर्चा सुरू झाली आहे. जुन्या पिढीतील लोकांनी हळूहळू बाजूला होऊन नव्या पिढीला संधी दिली पाहिजे आणि स्वतः मार्गदर्शकाची भूमिका स्वीकारली पाहिजे, असे गडकरी यांनी म्हटले. ‘आता मी जास्त काम करू शकत नाही,’ असेही त्यांनी सांगितल्याने त्यांच्या वक्तव्याचे विविध राजकीय अर्थ काढले जात आहेत. मात्र, त्यांनी थेट राजकारणातून निवृत्तीची घोषणा केलेली नाही.
काटोल तालुक्यातील पारडसिंगा येथे आयोजित एकलव्य एकल विद्यालय शिक्षक-पर्यवेक्षक प्रशिक्षण वर्गाच्या समारोप कार्यक्रमात नितीन गडकरी बोलत होते. यावेळी त्यांनी नव्या पिढीकडे जबाबदारी सोपवण्याबाबत भाष्य केले.
जुन्या पिढीने कायम पदांना चिकटून राहण्याऐवजी नव्या पिढीला पुढे येण्यासाठी संधी दिली पाहिजे, अशी भूमिका त्यांनी मांडली. अनुभवी लोकांनी मार्गदर्शकाच्या भूमिकेत राहावे आणि नव्या पिढीला काम करण्याची संधी द्यावी, असेही गडकरी म्हणाले.
गडकरी यांनी स्वतःच्या वाढत्या वयाचा आणि कामाचा उल्लेख करत ‘आता मी जास्त काम करू शकत नाही,’ असे वक्तव्य केले. या विधानामुळे ते सक्रिय राजकारणातून निवृत्तीचा विचार करत आहेत का, अशी चर्चा राजकीय वर्तुळात सुरू झाली आहे.
मात्र, गडकरींनी आपल्या भाषणात राजकीय निवृत्तीची कोणतीही औपचारिक घोषणा केलेली नाही. त्यामुळे त्यांच्या विधानाकडे नव्या नेतृत्वाला संधी देण्याच्या व्यापक भूमिकेतूनही पाहिले जात आहे.
यावेळी गडकरींनी आपल्या राजकीय आणि सामाजिक जीवनातील जुन्या आठवणीही सांगितल्या. पक्षाचे काम करत असताना पूर्वी जीवनशैलीला कोणतीही शिस्त नव्हती. समोसा खाऊन झोपायचो, अशी आठवण त्यांनी सांगितली.
मात्र, कोरोना काळानंतर आपण आपल्या जीवनशैलीत मोठा बदल केल्याचे त्यांनी नमूद केले. आरोग्याची काळजी घेण्यास सुरुवात केली असून नियमित योगाभ्यास करत असल्याचेही गडकरी यांनी सांगितले.
आरोग्याचे महत्त्व अधोरेखित करताना गडकरींनी सत्ता आणि पदापेक्षा चांगले आरोग्य महत्त्वाचे असल्याचे सांगितले. तब्येत चांगली असेल तरच आयुष्याचा आनंद घेता येतो आणि तब्येत चांगली नसेल तर सत्ता काही कामाची नाही, असे त्यांनी स्पष्ट केले. राजकारणातील व्यस्त जीवनशैली आणि सततच्या धावपळीत आरोग्याकडे दुर्लक्ष करू नये, असा संदेशही त्यांच्या वक्तव्यातून देण्यात आला.
नितीन गडकरी हे भाजपमधील ज्येष्ठ नेत्यांपैकी एक असून केंद्रीय मंत्रिमंडळात महत्त्वाची जबाबदारी सांभाळत आहेत. त्यामुळे ‘जुन्या पिढीने बाजूला व्हावे’, ‘नव्या पिढीला संधी द्यावी’ आणि ‘आता मी जास्त काम करू शकत नाही’ या त्यांच्या वक्तव्यांची राजकीय वर्तुळात चर्चा सुरू झाली आहे.
गडकरींचे वक्तव्य स्वतःच्या राजकीय भविष्याबाबतचे संकेत आहेत की त्यांनी नेतृत्वातील पिढीबदलाबाबत सर्वसाधारण भूमिका मांडली, याबाबत वेगवेगळे तर्क लावले जात आहेत. मात्र, त्यांनी प्रत्यक्ष निवृत्तीची घोषणा केलेली नसल्याने ‘गडकरींनी निवृत्तीचे संकेत दिले’ एवढ्यापुरतेच सध्या या विधानाकडे पाहणे योग्य ठरेल.
.png "Videos"){kind=small}
