कला अन् कृष्णभक्तीचा सुंदर संगम; वसईच्या कलाकाराने बासरीवर रेखाटले श्रीकृष्ण
सामान्यतः चित्र रेखाटण्यासाठी कागद, कॅनव्हास किंवा मोठ्या पृष्ठभागाचा वापर केला जातो. मात्र जयने यासाठी वेगळा प्रयोग करत बासरीसारख्या अत्यंत अरुंद पृष्ठभागाची निवड केली. विशेष म्हणजे वॉटर कलर्सच्या माध्यमातून ही कलाकृती साकारण्यात आली आहे.
Travel News : भारतातील 3 सुप्रसिद्ध कृष्ण मंदिर… भाविकांनी एकदा तरी नक्की भेट द्या
बासरीचा पृष्ठभाग अरुंद आणि आकाराने गोलाकार असल्यामुळे त्यावर चित्र रेखाटणे हे कलाकारासाठी आव्हानात्मक काम असते. रंगांचा योग्य वापर, ब्रशवरील नियंत्रण आणि चित्रातील बारकावे सांभाळत जयने अवघ्या एका तासात श्रीकृष्णाचे चित्र पूर्ण केले.
या कलाकृतीचे आणखी एक वैशिष्ट्य म्हणजे श्रीकृष्ण आणि बासरी यांचे असलेले अतूट नाते. श्रीकृष्णाच्या हातातील बासरी ही त्यांच्या प्रतिमेचा अविभाज्य भाग मानली जाते. त्याच बासरीवर श्रीकृष्णाचे चित्र साकारल्याने या कलाकृतीला वेगळे प्रतीकात्मक महत्त्व प्राप्त झाले आहे.
चित्रकार कौशिक जाधव यांच्या मार्गदर्शनाखाली जयने ही कलाकृती साकारली. पारंपरिक कॅनव्हासच्या चौकटीबाहेर जाऊन वेगवेगळ्या वस्तूंवर कला साकारता येऊ शकते, हे या प्रयोगातून दाखवून देण्यात आले आहे.
‘कलेला पारंपरिक कॅनव्हासची गरज नसते; कल्पकता असेल तर कोणताही पृष्ठभाग कलाकृतीसाठी कॅनव्हास बनू शकतो,’ हा संदेशही या कलाकृतीतून अधोरेखित होत आहे. गोकुळाष्टमीच्या उत्सवी वातावरणात साकारलेल्या या अनोख्या कृष्णचित्राचे कला क्षेत्रातून कौतुक होत आहे.
श्रीकृष्णाच्या हातातील बासरीला ‘मुरली’ किंवा ‘वेणू’ असेही म्हटले जाते. भागवत परंपरेतील कृष्णवर्णनात त्यांच्या वेणुवादनाला विशेष स्थान आहे. कृष्णाच्या बासरीच्या मधुर स्वरांनी गोप-गोपी, गायी तसेच निसर्गही मोहित झाल्याचे काव्यमय वर्णन आढळते.
बासरीचे आणखी एक सुंदर आध्यात्मिक प्रतीक आहे. बासरी आतून पोकळ असते. भक्तीपरंपरेत याचा अर्थ अहंकाराचा त्याग असा लावला जातो. मनुष्याने अहंकार, द्वेष आणि स्वार्थ सोडून स्वतःला ईश्वराला समर्पित केले, तर जशी कृष्णाच्या श्वासामुळे साध्या बासरीतून मधुर संगीत निर्माण होते, तसेच त्याचे जीवनही सुंदर होऊ शकते, अशी त्यामागची भावना आहे.
बासरी प्रेम, आनंद, भक्ती आणि ईश्वराशी असलेल्या निःस्वार्थ नात्याचे प्रतीक म्हणूनही पाहिली जाते. त्यामुळे मोरपीस, बासरी आणि श्रीकृष्ण ही प्रतिमा भारतीय कला व भक्तीपरंपरेत एकमेकांशी घट्ट जोडली गेली आहे.
.png "Videos"){kind=small}
