मावळच्या एसटी सेवेला ‘जिजाऊ’ची साथ, पाच नव्या स्मार्ट बसेसचे लोकार्पण; आगारातील बसेसची संख्या तब्बल...
वडगाव मावळ : मावळ तालुक्यातील ग्रामीण भागातील सार्वजनिक वाहतूक व्यवस्था अधिक सक्षम, सुरक्षित आणि आधुनिक करण्याच्या दृष्टीने तळेगाव एसटी आगाराला प्राप्त झालेल्या पाच नव्या ‘राजमाता जिजाऊ’ स्मार्ट एसटी बसेसचे लोकार्पण आमदार सुनील शेळके यांच्या हस्ते करण्यात आले. आमदार सुनील शेळके यांच्या प्रयत्नातून या नव्या बसेस उपलब्ध झाल्याने मावळातील ग्रामीण भागातील प्रवाशांना अधिक चांगली आणि आधुनिक परिवहन सेवा मिळणार आहे.
मावळ तालुक्यातील दुर्गम आणि ग्रामीण भागातील नागरिकांना शिक्षण, रोजगार, बाजारपेठ तसेच विविध शासकीय कामांसाठी प्रवास करावा लागतो. या पार्श्वभूमीवर नव्या बसेस उपलब्ध झाल्याने ग्रामीण भागातील सार्वजनिक वाहतूक व्यवस्था अधिक सक्षम होण्यास मदत होणार आहे. विद्यार्थी, शेतकरी, महिला आणि ज्येष्ठ नागरिकांसह सर्वसामान्य प्रवाशांना या बसेसचा मोठा फायदा होणार आहे.
तळेगाव आगारात यापूर्वी ३८ बसेस कार्यरत होत्या. गतवर्षी मिळालेल्या १० आणि यावर्षी आमदार सुनील शेळके यांच्या प्रयत्नातून प्राप्त झालेल्या पाच अशा एकूण १५ नव्या बसेस आगारात दाखल झाल्याने आता आगारातील बसेसची संख्या ४३ झाली आहे. त्यामुळे मावळ तालुक्यातील विविध ग्रामीण मार्गांवरील एसटी सेवा अधिक सक्षम करण्यास मदत होणार असून प्रवाशांची गैरसोय कमी होण्याची अपेक्षा आहे.
‘राजमाता जिजाऊ’ स्मार्ट बसेसमध्ये ३×२ आसन व्यवस्था असून तब्बल ५६ प्रवाशांची आसन क्षमता आहे. जुन्या साधारण बसेसच्या तुलनेत या बसेसमध्ये १६ आसने अधिक आहेत. त्यामुळे अधिक प्रवाशांना एकाच फेरीत प्रवास करता येणार असून ग्रामीण भागातील प्रवाशांसाठी ही सुविधा महत्त्वपूर्ण ठरणार आहे. प्रवाशांच्या सुरक्षिततेला प्राधान्य देण्यात आले असून प्रत्येक बसमध्ये चार सीसीटीव्ही कॅमेरे तसेच आपत्कालीन परिस्थितीसाठी पॅनिक बटण उपलब्ध करून देण्यात आले आहे. याशिवाय प्रत्येक थांबा आणि आवश्यक सूचना स्पष्टपणे प्रवाशांपर्यंत पोहोचविण्यासाठी सार्वजनिक उद्घोषणा प्रणाली, मार्गाची माहिती देण्यासाठी इलेक्ट्रॉनिक डिजिटल मार्ग फलक आणि बसचे थेट लोकेशन ट्रॅक करण्यासाठी जीपीएस यंत्रणा उपलब्ध आहे.
नव्या स्मार्ट बसेसमुळे प्रवाशांना अधिक आरामदायी, सुरक्षित आणि सुखकर प्रवासाचा अनुभव मिळणार आहे. विशेषतः ग्रामीण भागातील नागरिकांसाठी आधुनिक परिवहन सेवा उपलब्ध झाल्याने सार्वजनिक वाहतूक व्यवस्थेला नवी गती मिळणार आहे. लोकार्पणप्रसंगी आमदार सुनील शेळके यांनी नव्या बसेसची पाहणी करून एसटी अधिकाऱ्यांशी संवाद साधला. प्रवाशांना दर्जेदार, वेळेवर आणि विश्वासार्ह सेवा मिळावी, यासाठी आवश्यक त्या सूचना त्यांनी संबंधित अधिकाऱ्यांना दिल्या. तसेच नागरिकांनी खासगी वाहनांऐवजी सुरक्षित आणि विश्वासार्ह एसटी बससेवेचा अधिकाधिक वापर करावा, असे आवाहनही त्यांनी केले. मावळ तालुक्यातील ग्रामीण भागातील सार्वजनिक वाहतूक व्यवस्था अधिक सक्षम करण्यासाठी आमदार सुनील शेळके यांच्या प्रयत्नातून उपलब्ध झालेल्या या पाच नव्या स्मार्ट बसेसमुळे एसटी सेवेच्या विस्ताराबरोबरच प्रवाशांच्या सुरक्षितता आणि सुविधांमध्येही महत्त्वपूर्ण वाढ होणार आहे.
.png "Videos"){kind=small}
