खासगी शाळांतील पदांसाठी कमाल वयोमर्यादा लागू नाही
पुणे : पवित्र पोर्टलच्या माध्यमातून सुरू असलेल्या शिक्षक भरती प्रक्रियेत खासगी व्यवस्थापनाच्या माध्यमिक व उच्च माध्यमिक शाळांमधील इयत्ता नववी ते बारावीच्या शिक्षक पदांसाठी कमाल वयोमर्यादा लागू राहणार नसल्याचे स्पष्ट करण्यात आले आहे. त्यामुळे या गटातील शिक्षक पदांसाठी इच्छुक उमेदवारांना वयाची कमाल मर्यादा हा अडथळा राहणार नाही.
शिक्षक अभियोग्यता व बुद्धिमत्ता चाचणी-२०२५ च्या आधारे मुलाखतीशिवाय पदनिवडीचा पर्याय दिलेल्या संस्थांमध्ये शिफारस झालेल्या उमेदवारांच्या कागदपत्र पडताळणीबाबत शिक्षण आयुक्त सचिन्द्र प्रताप सिंह यांनी सविस्तर सूचना जारी केल्या आहेत. पवित्र प्रणालीवर उमेदवारांनी नोंदविलेल्या माहितीच्या आधारे पदांसाठी तात्पुरती शिफारस केली आहे. मात्र, नियुक्तीपूर्वी उमेदवारांच्या मूळ कागदपत्रांची पडताळणी बंधनकारक केली आहे.
शैक्षणिक, व्यावसायिक अर्हता आवश्यक
शिक्षण विभागाच्या सूचनेनुसार, खासगी शाळांमध्ये इयत्ता नववी ते बारावीसाठी सेवा शर्तीच्या नियमांनुसार कमाल वयोमर्यादा निश्चित करण्यात आलेली नाही. त्यामुळे या गटातील शिक्षक पदांसाठी कमाल वयोमर्यादा लागू राहणार नाही. मात्र, संबंधित शैक्षणिक आणि व्यावसायिक अर्हता निर्धारित मुदतीत प्राप्त केलेली असणे आवश्यक आहे. इयत्ता ९ वी ते १० वीसाठी उमेदवाराकडे पदवीस्तरावर किमान उत्तीर्ण श्रेणी असणे, तर इयत्ता ११ वी ते १२ वीसाठी पदव्युत्तर स्तरावर किमान द्वितीय श्रेणीत उत्तीर्ण असणे आवश्यक आहे.
कागदपत्रांची पडताळणी २ ते ५ सप्टेंबरदरम्यान
शिफारस झालेल्या उमेदवारांच्या कागदपत्रांची पडताळणी २ ते ५ सप्टेंबर २०२६ या कालावधीत करण्याचे नियोजन आहे. पात्र उमेदवारांसाठी पदस्थापनेचे समुपदेशन ७ ते ११ सप्टेंबरदरम्यान होणार आहे. उमेदवारांची संख्या कमी असल्यास ५ सप्टेंबरपूर्वीच नियुक्तीची कार्यवाही करण्याच्या सूचनाही देण्यात आल्या आहेत. कागदपत्र पडताळणी नंतर पात्र उमेदवारांची पोलीस खात्यामार्फत चारित्र्य पडताळणी तसेच नियमानुसार वैद्यकीय तपासणी करण्यात येणार आहे. अपात्र उमेदवाराला नियुक्ती दिल्यास त्याची संपूर्ण जबाबदारी संबंधित व्यवस्थापनाची राहणार असल्याचे शिक्षण विभागाने स्पष्ट केले आहे.
.png "Videos"){kind=small}
