रांजणगाव महागणपती मंदिर साडेतीन महिन्यांसाठी बंद; नेमकं कारण काय?
रांजणगाव गणपती : अष्टविनायकांपैकी एक असलेल्या श्री क्षेत्र रांजणगाव गणपती येथील श्री महागणपती मंदिरात व्यापक जतन व दुरुस्तीच्या कामांना सुरुवात होत असून, बुधवार (दि. १५ एप्रिल) ते ३१ जुलै या कालावधीत सुमारे साडेतीन महिने मंदिर भाविकांसाठी पूर्णतः बंद ठेवण्याचा निर्णय घेण्यात आला आहे. महाराष्ट्रातील सात मंदिरांच्या विकास आराखड्याअंतर्गत हा प्रकल्प राबविण्यात येत असून, या कालावधीत मंदिराच्या मुख्य गाभाऱ्याची संरचना, सभामंडप तसेच परिसरातील पायाभूत सुविधांची दुरुस्ती व सुशोभीकरणाची कामे हाती घेतली जाणार आहेत. या संदर्भातील माहिती पुरातत्व विभागाचे सहाय्यक संचालक डॉ. विलास वहाणे यांनी सोमवारी (दि.१३) मंदिर सभागृहात आयोजित पत्रकार परिषदेत दिली. यावेळी तहसीलदार बाळासाहेब म्हस्के, रांजणगाव एमआयडीसीचे पोलीस निरीक्षक महादेव वाघमोडे तसेच देवस्थान ट्रस्टचे विश्वस्त मंडळ उपस्थित होते.
नित्यपूजा, धार्मिक विधी नियमितपणे सुरू
विभागीय आयुक्त चंद्रकांत पुलकुंडवार यांच्या अध्यक्षतेखालील उच्चस्तरीय समिती व जिल्हास्तरीय समितीच्या मान्यतेनंतर हे काम सुरू करण्यात आले आहे. या काळात मंदिरातील नित्यपूजा, धार्मिक विधी आणि परंपरागत सेवा नियमितपणे सुरू राहतील; मात्र भाविकांना मंदिर परिसरात प्रवेश दिला जाणार नाही. भाविकांची गैरसोय टाळण्यासाठी प्रशासनाकडून विशेष व्यवस्था करण्यात आली असून, मंदिराबाहेर एलईडी स्क्रीनद्वारे थेट दर्शनाची सुविधा उपलब्ध करून दिली जाणार आहे. त्यामुळे दूरवरून येणाऱ्या भाविकांना डिजिटल माध्यमातून दर्शन घेता येणार आहे.
मंदिर परिसरात कडक सुरक्षा व्यवस्था ठेवणार
कामकाजाच्या पार्श्वभूमीवर मंदिर परिसरात कडक सुरक्षा व्यवस्था ठेवण्यात येणार असून, संवेदनशील भागांमध्ये अनधिकृत प्रवेश पूर्णतः बंद राहणार आहे. मुख्य दुरुस्तीची कामे तीन महिन्यांत पूर्ण करण्याचे उद्दिष्ट ठेवण्यात आले असून, त्यानंतर उर्वरित किरकोळ कामे टप्प्याटप्प्याने पूर्ण केली जाणार आहेत. दरम्यान, या कालावधीत मंदिर व परिसरात कायदा व सुव्यवस्था अबाधित राखण्यासाठी महसूल व पोलीस प्रशासनाकडून विशेष दक्षता घेण्यात येणार असल्याचे तहसीलदार बाळासाहेब म्हस्के व पोलीस निरीक्षक महादेव वाघमोडे यांनी स्पष्ट केले.
हे सुद्धा वाचा : अखेर चिमुकल्यांच्या मैदानावर फिरला बुलडोझर; विरोध डावलून आरोग्य केंद्राचे काम सुरु
.png "Videos"){kind=small}
