पाणीकपातीचा निर्णय रद्द करा, अन्यथा…; मनसेचे पुणे महापालिका प्रशासनाला निवेदन

पुणे महापालिकेने आठवड्यातून एक दिवस पाणीपुरवठा बंद ठेवण्याचा निर्णय घेतला आहे. हा निर्णय तातडीने रद्द करून पुणेकरांना नियमित आणि पुरेशा दाबाने पाणीपुरवठा करावा, अशी मागणी महाराष्ट्र नवनिर्माण सेनेने केली आहे.

• पाणीकपातीचा निर्णयावरुन मनसे आक्रमक
• पाणीकपातीचा निर्णय रद्द करा
• मनसेचे महापालिका प्रशासनाला निवेदन

पुणे : धरणांमध्ये पुरेसा पाणीसाठा उपलब्ध असतानाही पुणे महापालिकेने आठवड्यातून एक दिवस पाणीपुरवठा बंद ठेवण्याचा निर्णय घेतला आहे. हा निर्णय तातडीने रद्द करून पुणेकरांना नियमित आणि पुरेशा दाबाने पाणीपुरवठा करावा, अशी मागणी महाराष्ट्र नवनिर्माण सेनेने केली आहे. मनसेचे पुणे शहराध्यक्ष व माजी नगरसेवक साईनाथ संभाजी बाबर यांनी महापालिका प्रशासनाला निवेदन दिले आहे. या मागणीसाठी मनसेतर्फे मटका फोड आंदोलनही करण्यात आले.

 

खडकवासला धरणातून शहराला पाणीपुरवठा करणाऱ्या मुख्य जलवाहिन्या आणि वितरण व्यवस्थेत मोठ्या प्रमाणावर गळती होत असल्याचा दावा मनसेने केला आहे. जलवाहिन्यांची तपासणी करून गळती तातडीने दुरुस्त करावी, अशी मागणी करण्यात आली. बांधकामे आणि रस्त्यांवरील दुभाजकांच्या देखभालीसाठी पिण्याच्या पाण्याचा वापर होत असल्याकडेही लक्ष वेधण्यात आले. बांधकामांसाठी प्रक्रिया केलेल्या सांडपाण्याचा वापर बंधनकारक करून त्याची प्रभावी अंमलबजावणी करावी, असे निवेदनात म्हटले आहे.

हे सुद्धा वाचा : प्रशिक्षणार्थी PSI पतीकडून विवाहितेचा छळ, पिस्तूल दाखवून धमकावल्याचा आरोप; नेमकं प्रकरण काय?

नियोजनातील त्रुटींचा भार नागरिकांवर का?

आठवड्यातून एक दिवस पाणीपुरवठा बंद ठेवल्यानंतर पुढील दोन ते तीन दिवस कमी दाबाने किंवा अपुरा पाणीपुरवठा होत असल्याचे निवेदनात म्हटले आहे. विशेषतः उंचावरील भागांत पाणी पोहोचत नसल्याच्या तक्रारी आहेत. त्यामुळे नागरिकांना दैनंदिन गरजा भागविण्यासाठी अडचणींचा सामना करावा लागत आहे. प्रशासनाच्या नियोजनातील त्रुटींची शिक्षा नागरिकांना का, असा सवाल मनसेने उपस्थित केला.

हे सुद्धा वाचा : ‘छत्रपती’चा गळीत हंगाम सुरू, ११ लाख टन ऊस गाळपाचे उद्दिष्ट; सभासदांसह गेटकेन ऊसालाही समान दर देण्याची ग्वाही