हिंजवडी ते शिवाजीनगर 'मेट्रो लाईन 3'ला मिळाला अखेर मुहूर्त? 3 नोव्हेंबरला मेट्रो धावणार (File Photo)
पुणे : रामवाडी ते उबाळेनगर (विमानतळ मार्ग) या प्रस्तावित मेट्रोमार्गिकेच्या विस्तारीकरणाच्या कामाला आता गती मिळण्याची शक्यता आहे. या प्रकल्पाच्या सुधारित सर्वसाधारण आराखड्याला अंतिम मंजुरी देण्याची प्रक्रिया सुरू झाली असून, महामेट्रोने सुधारित आराखडा पुणे महापालिका आयुक्त नवल किशोर राम यांच्याकडे सादर केला आहे. या आराखड्यास मंजुरी देण्याची मागणी महामेट्रोकडून करण्यात आली आहे.
महापालिकेच्या विकास आराखड्यात (डीपी) निश्चित करण्यात आलेल्या रस्त्यांच्या ‘सेंटर लाइन’नुसार मेट्रोमार्गिका आणि प्रस्तावित उन्नत मार्गाच्या रचनेत आवश्यक बदल करण्यात आले आहेत. यासंदर्भात महापालिका आयुक्त नवल किशोर राम आणि महामेट्रोचे व्यवस्थापकीय संचालक श्रावण हर्डीकर यांच्या उपस्थितीत दोन्ही यंत्रणांच्या अधिकाऱ्यांची संयुक्त बैठक झाली.
रामवाडी-उबाळेनगर मार्गावर मेट्रो मार्गिकेसोबत दुमजली रस्त्याची (डबल डेकर) रचना प्रस्तावित आहे. मात्र, काही ठिकाणी मेट्रोमार्गिका ही महापालिकेच्या विकास आराखड्यातील मध्यरेषेशी (डीपी सेंटर लाइन) जुळत नसल्याचे निदर्शनास आले. विशेषतः रस्त्याच्या वळणाच्या ठिकाणी डबल डेकरची रचना तसेच कॅन्टिलिव्हर पियर उभारणे तांत्रिकदृष्ट्या शक्य नसल्याने या भागातील आराखड्यात बदल करण्यात आला आहे.
महापालिकेकडून प्राप्त झालेल्या ‘डीपी लाइन’च्या मार्किंगनुसार महामेट्रोने सुधारित आराखडा तयार केला आहे. या आराखड्याला अंतिम मंजुरी मिळाल्यानंतर ‘डीपी लाइन’च्या दोन्ही बाजूंना आवश्यक भूसंपादन आणि रस्ता रुंदीकरणाची कामे वेगाने करावी लागणार आहेत. त्यामुळे आराखडा मंजुरीनंतर या दोन्ही कामांना गती देणे महत्त्वाचे ठरणार आहे.
कंत्राटदारांची नियुक्ती; समन्वय आवश्यक
विस्तारीकरणाच्या कामासाठी कंत्राटदाराची नियुक्ती यापूर्वीच करण्यात आली असून, प्राथमिक कामांनाही सुरुवात झाली आहे. तसेच विमानतळ मेट्रो स्थानकाजवळील एचसीएमटीआर क्रॉसिंगबाबत महापालिकेकडून महामेट्रोला पत्र प्राप्त झाले आहे. त्यावरही महामेट्रोकडून कार्यवाही सुरू आहे. प्रकल्प वेळेत पूर्ण करण्यासाठी सुधारित आराखड्याला मंजुरी, आवश्यक भूसंपादन आणि रस्ता रुंदीकरण या तिन्ही बाबींमध्ये महापालिका आणि महामेट्रो यांच्यात प्रभावी समन्वय आवश्यक आहे.






