रायगडच्या विकासाला निधीअभावी खीळ; MMRDA च्या रखडलेल्या कामांवरून माजी आमदार पंडित पाटील आक्रमक

माजी आमदार पंडित पाटील यांनी तीव्र नाराजी व्यक्त करत शासनाकडे तात्काळ निधी उपलब्ध करून देण्याची मागणी केली आहे. अन्यथा, काम न करणाऱ्या ठेकेदारांच्या वर्कऑर्डर रद्द करून रिटेंडरिंग प्रक्रिया सुरू करण्याचा इशारा दिला. 

अलिबाग : रायगड जिल्ह्यातील विकासकामांना निधीअभावी मोठी खीळ बसली असून, मुंबई महानगर प्रदेश विकास प्राधिकरणाच्या (MMRDA) मार्फत हाती घेतलेली अनेक विकासकामे रखडली आहेत. या ठप्प कामांबाबत माजी आमदार पंडित पाटील यांनी तीव्र नाराजी व्यक्त करत शासनाकडे तात्काळ निधी उपलब्ध करून देण्याची मागणी केली आहे. अन्यथा, काम न करणाऱ्या ठेकेदारांच्या वर्कऑर्डर रद्द करून रिटेंडरिंग प्रक्रिया सुरू करण्याचा इशारा त्यांनी दिला आहे.

५६५ विकासकामांना मंजुरी, पण फक्त ७०-७५ कामेच सुरू

राज्याचे मुख्यमंत्री एकनाथ शिंदे यांच्या नेतृत्वाखालील सरकार आणि स्थानिक आमदार दळवी साहेब यांच्या माध्यमातून अलिबाग तालुक्यात MMRDA च्या माध्यमातून तब्बल ५६५ विकासकामांना मंजुरी देण्यात आली होती. यापैकी ३५० कामांचे कार्यआदेश (वर्कऑर्डर) दोन वर्षांपूर्वीच जारी करण्यात आले. मात्र प्रत्यक्षात केवळ ७० ते ७५ कामांनाच निधी वितरित झाला असून उर्वरित कामे कागदावरच अडकून पडली आहेत.

Ahilyanagar News: आधी पावसाने झोडपलं त्यात खतांच्या दरवाढीने कंगाल केलं! शेतकऱ्यांच्या ‘रब्बी’ चे गणित बिघडले

निधीअभावी अनेक ठेकेदारांनी प्रत्यक्ष कामे सुरू करण्यास नकार दिल्यामुळे, गावागावांतील रस्ते व सार्वजनिक सुविधा प्रकल्प रखडले आहेत. परिणामी, अलिबाग तालुक्यासह रायगड जिल्ह्याचा विकास ठप्प झाला आहे.

पाटील यांची प्रशासनाला ताकीद

माजी आमदार पंडित पाटील यांनी या संदर्भात MMRDA चे एक्झिक्युटिव्ह इंजिनिअर देवरे आणि रायगड जिल्हा परिषदेच्या अधिकाऱ्यांशी चर्चा केली आहे. त्यांनी प्रशासनाच्या निष्क्रियतेवर तीव्र शब्दांत नाराजी व्यक्त केली आहे.

तीन ठोस मागण्या

• MMRDA चा निधी तात्काळ उपलब्ध करून द्यावा.
• दोन वर्षांपासून काम सुरू न केलेल्या ठेकेदारांची एजन्सी रद्द करून रिटेंडरिंग प्रक्रिया हाती घ्यावी.
• रस्ते आणि विकासकामांमध्ये अडकलेला निधी मुक्त करून नागरिकांना दिलासा द्यावा.

त्यांनी स्पष्ट केले की, “अनेक रस्ते पावसाळ्यामुळे दुरवस्थेत आहेत. निधीअभावी नागरिकांना त्रास सहन करावा लागत आहे. शासनाने तातडीने निधी वितरित करून विकासाची गती वाढवावी.”

रायगड हा पर्यटन आणि औद्योगिक दृष्ट्या अत्यंत महत्त्वाचा जिल्हा असूनही शासनाकडून निधी न मिळाल्याने विकास थांबलेला आहे. यामुळे स्थानिक नागरिक, शेतकरी आणि उद्योग क्षेत्राला फटका बसत आहे.

शासनाकडे ठोस पावले उचलण्याची मागणी

“रायगडच्या सर्वांगीण विकासासाठी मंजूर निधी तात्काळ वितरित झाला पाहिजे. शासनाने लोकप्रतिनिधींसोबत बैठक घेऊन ठोस निर्णय घ्यावा. अन्यथा जनतेचा संयम सुटेल,” असा इशारा माजी आमदार पंडित पाटील यांनी दिला आहे. MMRDA मार्फत मंजूर झालेल्या शेकडो विकासकामांना निधीअभावी खीळ बसली आहे. पंडित पाटील यांनी शासनावर टीका करत ही परिस्थिती तातडीने सुधारावी, ठेकेदारांच्या निष्क्रियतेवर कारवाई करावी, आणि रायगडच्या विकासाला नवसंजीवनी द्यावी, अशी मागणी केली आहे.

Sanjay Raut News: देवेंद्र फडणवीस शेतकऱ्यांना सामोरे जाण्यासाठी घाबरत आहेत; संजय राऊतांची टीका