Raigad News: नेरळ ग्रामपंचायतीत मोठा घोटाळा उघड! 43 अनधिकृत नळजोडण्या समोर, कारवाईचे आदेश

कर्जत तालुक्यातील नेरळ ग्रामपंचायतीत प्रशासक काळात मोठा गैरव्यवहार उघडकीस आला आहे. कोणतीही अधिकृत नोंद नसताना 43 अनधिकृत नळजोडण्या देण्यात आल्याचे समोर आले असून या प्रकरणात कारवाईची प्रक्रिया सुरू करण्यात आली आहे.

• नेरळ ग्रामपंचायतीत 43 अनधिकृत नळजोडण्या आढळल्या; यापूर्वी 15 जोडण्या तोडल्या होत्या
• नोंद, परवानगी आणि पावती नसताना बिल्डर लॉबीला पाणी जोडण्या दिल्याचा आरोप
• प्रकरणात गुन्हा दाखल करण्याच्या सूचना, आर्थिक व्यवहारांबाबतही संशय

कर्जत: कर्जत तालुक्यातील सर्वात मोठ्या नेरळ ग्रामपंचायतीमध्ये प्रशासक काळात अनेक घोटाळे बाहेर येत आहेत. त्यात अनधिकृतपणे नळजोडण्या देण्याचा प्रकार उघडकीस आला असून आता आणखी ४३ नळजोडण्यांचा घोटाळा समोर आला आहे. यापूर्वी १५ नळजोडण्यांची नोंद ग्रामपंचायतीकडे नसल्याने त्या नळजोडण्या तोडण्याची कारवाई करण्यात आली होती.

Chandrapur News: ‘लाडकी बहीण’ योजनेत गोंधळ! 2100 रुपयांचे आश्वासन हवेतच, 50 हजार महिला अपात्र

नेरळ ग्रामपंचायतीमध्ये शुद्ध पाणी मिळत असल्याने आणि हे ठिकाण रेल्वेने जोडले असल्याने बाहेरून येथे राहण्यासाठी आलेल्यांची संख्या दररोज वाढत आहे. मागील दोन वर्षे नेरळ ग्रामपंचायतमध्ये असलेले प्रशासक राजवटमध्ये कारभाराचा सावळा गोंधळ दिसून येत आहे. बिल्डर लॉबीला नळजोडणी देताना त्यांची कोणतीही नोंद नाही आणि देणगी पावती नाही. तसेच नळजोडणी करण्याचे आदेश देखील नाहीत. पण नळजोडणीद्वारे पाणी पुरवठा सुरू आहे. दोन महिन्यापूर्वी नव्याने जिल्हा परिषद आणि पंचायत समिती निवडणूकीमध्ये निवडून आलेल्या सदस्यांच्या हा प्रकार लक्षात आला. बिल्डर लॉबीच्या अनेक जोडण्या काढून टाकण्यात आल्या असून त्यांची कोणतीही नोंद नेरळ ग्रामपंचायतकडे मिळाली नाही.

गुन्हा दाखल करून कारवाईच्या सूचना

पाणी पुरवठा विभाग यांना जिल्हा परिषद सदस्य सुनीता मोरे आणि पंचायत समिती सदस्य भगवान चंदे यांनी विश्वासात घेऊन ग्रामपंचायत दफ्तरी नोंद नसलेल्या नळजोडण्यांची यादी मागवून घेतली आहे. नेरळ ग्रामपंचायतीमधील विविध भागात आता कोणतीही नोंद नसलेल्या आणि पूर्णपणे अनधिकृत असलेल्या ४३ नळजोडण्या आढळून आल्या आहेत. त्यांच्यावर पोलिस ठाण्यात गुन्हा दाखल करण्याची कार्यवाही ग्रामपंचायतने करावी अशी सूचना पंचायत समितीचे सदस्य आणि माजी सरपंच भगवान चंचे यांनी ग्रामपंचायत अधिकारी अरुण कार्ले यांना केली आहे. आता त्या नळजोडणी पुन्हा कायम करायच्या असल्यास मोठा निधी देणगी मधून नेरळ ग्रामपंचायतकडे प्राप्त होऊ शकतो. त्यामुळे कामगार वर्ग देखील पाहणी करू लागला आहे.

अनधिकृत नळजोडणी देताना आर्थिक व्यवहार

ही बाब लक्षात घेऊन सर्च मोहीम हाती घेतल्यानंतर सध्याच्या प्रशासक काळात नेरळ ग्रामपंचायत हद्दीत अनेक नळजोडण्या दिल्याचे उघडकीस आले आहे. या नळजोडणी देताना आर्थिक व्यवहार केल्याचे नळजोडणी मालक सांगत आहेत, मात्र त्यांची कोणतीही नोंद नेरळ ग्रामपंचायतीकडे नसल्याने त्या-त्या जोडण्या कापून टाकण्यात येत आहेत.

Mumbai Local: मुंबईकरांचा प्रवास होणार सुरक्षित! देशातील पहिली ‘नॉन-एसी’ बंद दरवाज्यांची लोकल दाखल; कधीपासून सुरू होणार प्रवास?

नेरळ एसटी स्टँड परिसरातील एका इमारतीत दोन नळजोडण्या आढळून आल्या पण त्यांची कोणतीही नोंद आढळून आली नाही आणि ज्यावेळी या नळजोडण्या तोडण्यात येत होत्या. त्यावेळी लाखो रूपये दिल्याचे रहिवासियांनी सांगितले आहे. मात्र ग्रामपंचायतीकडे त्या नळजोडणींची नोंद नाही आणि नळजोडणी करण्याची परवानगी देखील नसल्याने त्या जोडण्या तोडण्यात आल्या आहेत.

डिस्क्लेमर: हे नवराष्ट्र वृत्तपत्राचे स्वयंचलित न्यूज फीड आहे. ते navarashtra.com च्या कर्मचार्‍यांनी संपादित केलेले नाही.