Raigad News: श्रीवर्धनच्या समुद्रकिनाऱ्यावरील ओपन जिमला गंज! नागरिकांच्या सुरक्षिततेचा प्रश्न ऐरणीवर, दुरुस्ती कधी होणार?
श्रीवर्धन समुद्रकिनारा हा स्थानिक नागरिकांसह पर्यटकांच्या आकर्षणाचे प्रमुख केंद्र आहे. सकाळी आणि संध्याकाळी येथे फेरफटका मारण्यासाठी, व्यायाम करण्यासाठी तसेच मोकळ्या हवेत वेळ घालविण्यासाठी नागरिकांची मोठी गर्दी असते. नागरिकांचे आरोग्य जपण्याच्या उद्देशाने समुद्रकिनाऱ्यावरील बीच प्रोमेनेड परिसरात ओपन जिम उभारण्यात आली होती. मात्र, कालांतराने या साहित्याच्या देखभालीकडे दुर्लक्ष झाल्याने जिमची अवस्था बिकट झाली आहे. (फोटो सौजन्य – AI Created)
समुद्राच्या खाऱ्या हवेमुळे आणि दमट वातावरणामुळे येथील एअर वॉकर, वेस्ट ट्विस्टर यासारख्या व्यायाम उपकरणांवर मोठ्या प्रमाणात गंज चढला आहे. काही उपकरणांचे भाग खराब झाल्याने त्यांचा वापर करणे धोकादायक ठरू शकते. अशा परिस्थितीत व्यायाम करताना नागरिकांना दुखापत होण्याची शक्यता नाकारता येत नाही. विशेषतः लहान मुले, ज्येष्ठ नागरिक आणि नियमित व्यायाम करणाऱ्यांच्या सुरक्षिततेच्या दृष्टीने या समस्येकडे गांभीर्याने पाहणे आवश्यक आहे.
तातडीने उपाययोजना करण्याची मागणी ओपन जिममधील गंजलेले आणि धोकादायक साहित्य तातडीने दुरुस्त करावे किंवा आवश्यकतेनुसार बदलावे, सागरी हवामानात दीर्घकाळ टिकणारी उपकरणे बसवावीत, तसेच नियमित तपासणी व देखभालीसाठी कायमस्वरूपी व्यवस्था करावी, अशी मागणी नागरिकांकडून होत आहे.
श्रीवर्धन समुद्रकिनारा हा शहराच्या पर्यटनवैभवाचा महत्त्वाचा भाग आहे. अशा ठिकाणी उभारलेल्या सार्वजनिक सुविधांची दुरवस्था होणे ही चिंतेची बाब आहे. पर्यटनवाढीसोबतच नागरिकांच्या आरोग्याची आणि सुरक्षिततेची काळजी घेणे ही पालिकेची जबाबदारी आहे. त्यामुळे श्रीवर्धन नगरपालिका या ओपन जिमच्या दुरवस्थेकडे गांभीर्याने लक्ष देऊन तातडीने उपाययोजना करणार का? असा सवाल नागरिक उपस्थित करीत आहेत.
समुद्रकिनाऱ्यावरील सागरी वातावरणाचा विचार करता येथे बसविण्यात येणाऱ्या उपकरणांची गुणवत्ता आणि टिकाऊपणा महत्त्वाचा आहे. गंगरोधक प्रक्रिया केलेले साहित्य, उच्च दर्जाचे स्टेनलेस स्टील किया सागरी वातावरणास अनुरूप उपकरणांचा वापर करणे आवश्यक होते. मात्र, सध्याच्या स्थितीवरून नियमित देखभालीचा अभाव स्पष्टपणे जाणवत आहे. सार्वजनिक निधीतून उभारण्यात आलेल्या सुविधांचा नागरिकांना दीर्घकाळ लाभ मिळावा, यासाठी केवळ साहित्य बसविणे पुरेसे नसून त्याची वेळोवेळी दुरुस्ती आणि निगा राखणेही तितकेच महत्त्वाचे आहे.
.png "Videos"){kind=small}
