बसस्टॉपजवळ ‘हिट अँड रन’
रत्नागिरी शहर पोलिस ठाण्यात गुन्हा दाखल
दुचाकीस्वार तरुण झाला जखमी
रत्नागिरी: शहरातील मिऱ्या-नागपूर हायवेवर जे. के. फाईल बसस्टॉपजवळ एका अज्ञात पांढऱ्या रंगाच्या कारने दुचाकीला जोरदार धडक दिली. या अपघातात (Accident) दुचाकीस्वार तरुण जखमी झाला असून, धडक देऊन कारचालक घटनास्थळावरून पसार झाला. सचिन चंद्रकांत खेत्री वय २५, रा. क्रांतीनगर झोपडपट्टी) असे जखमी तरुणाचे नाव आहे.
फिर्यादी सचिन खेत्री रविवारी (दि. २२ मार्च) संध्याकाळी सहाच्या सुमारास आपल्या ताब्यातील दुचाकी घेऊन रत्नागिरी रेल्वे स्टेशनकडून साळवी स्टॉपच्या दिशेने जात होते. जे. के. फाईल बसस्टॉपच्या अलीकडे, पोस्ट ऑफिससमोरील पुलावर सध्या काम सुरू आहे. याच ठिकाणी समोरून (साळवी स्टॉपकडून कुवारबावच्या दिशेने) येणाऱ्या एका पांढऱ्या रंगाच्या चारचाकी गाडीने सचिन यांच्या गाडीला उजव्या बाजूने
जोरदार धडक दिली.
धडक दिल्यानंतर अज्ञात कारचालक तेथे न थांबता वेगाने पसार झाला. या भीषण धडकेत सचिन खेत्री यांच्या डोक्याला मागील बाजूस मुका मार लागला असून, डाव्या डोळ्याजवळ, डाव्या हाताला आणि दोन्ही पायांना खरचटून किरकोळ दुखापत झाली आहे. त्यांना तातडीने उपचारासाठी रुग्णालयात दाखल करण्यात आले आहे. याप्रकरणी रत्नागिरी शहर पोलिस ठाण्यात चालकाविरुद्ध गुन्हा दाखल करण्यात आला. सीसीटीव्ही फुटेजच्या आधारे पोलिस फरार कारचालकाचा शोध घेत आहेत.
.png "Videos"){kind=small}
