जिल्हा मध्यवर्ती बँक निवडणुकीच्या हालचाली वाढल्या; भाजप करणार घटक पक्षांशी चर्चा, सम्राट महाडिक यांच्यावर समन्वयाची जबाबदारी

Sangli District Central Cooperative Bank elections: सांगली जिल्हा मध्यवर्ती सहकारी बँकेच्या आगामी निवडणुकीच्या पार्श्वभूमीवर भाजपने निवडणुकीची तयारी सुरू केली असून, स्वतंत्र पॅनेल उभारायचे की महायुतीच्या माध्यमातून निवडणूक लढवायची, याबाबत चर्चा सुरू आहे.

• जिल्हा मध्यवर्ती बँक निवडणुकीच्या हालचाली वाढल्या
• भाजप करणार घटक पक्षांशी चर्चा
• सम्राट महाडिक यांच्यावर समन्वयाची जबाबदारी

सांगली : सांगली जिल्हा मध्यवर्ती सहकारी बँकेच्या आगामी निवडणुकीच्या पार्श्वभूमीवर राजकीय हालचालींना वेग आला असून, भारतीय जनता पक्षाने निवडणुकीत पूर्ण ताकदीनिशी उतरण्याची तयारी सुरू केली आहे. जिल्हा बँकेसाठी स्वतंत्र पॅनेल उभारायचे की महायुतीच्या माध्यमातून निवडणूक लढवायची, याबाबत महायुतीतील घटक पक्षांशी चर्चा करूनच अंतिम निर्णय घेण्यात येणार आहे. या समन्वयाची जबाबदारी भाजपचे जिल्हाध्यक्ष सम्राट महाडिक यांच्यावर सोपविण्यात आली आहे.

Sanjay Raut : संजय राऊत यांनी लिहले आयुक्तांना पत्र ? घडलेल्या घटने मागे राजकीय पाठबळ ….

कोल्हापूर येथे पालकमंत्री चंद्रकांत पाटील यांच्या अध्यक्षतेखाली भाजपच्या प्रमुख नेत्यांची जिल्हा बँक निवडणुकीसंदर्भात बैठक झाली. या बैठकीत निवडणुकीची रणनीती, संघटनात्मक बांधणी तसेच विविध मतदारसंघांतील संभाव्य उमेदवारांबाबत प्राथमिक चर्चा झाली. यावेळी आमदार सत्यजित देशमुख, माजी आमदार पृथ्वीराज देशमुख, जिल्हा बँकेच्या उपाध्यक्षा जयश्री पाटील, भाजप जिल्हाध्यक्ष सम्राट महाडिक यांच्यासह प्रमुख नेते व पदाधिकारी उपस्थित होते.

जिल्हा बँकेची निवडणूक तोंडावर आल्याने भाजपने आतापासूनच मतदारसंघनिहाय बांधणी सुरू केली आहे. विकास सेवा संस्था गटासह अन्य महत्त्वाच्या मतदारसंघांमध्ये निवडणुकीची पूर्वतयारी करण्याच्या सूचना बैठकीत देण्यात आल्या. संभाव्य उमेदवारांची चाचपणी, स्थानिक पातळीवरील राजकीय समीकरणे आणि मतदारसंघनिहाय संघटनात्मक ताकद यांचा आढावा घेण्यास सुरुवात झाली आहे.भाजपच्या बैठकीत स्वतंत्र पॅनेल उभारण्याच्या दिशेने भूमिका स्पष्ट झाली असली, तरी महायुतीतील घटक पक्षांशी चर्चेनंतरच अंतिम निर्णय घेतला जाणार असल्याने जिल्हा बँकेच्या निवडणुकीत पुढे कोणते राजकीय समीकरण आकाराला येते, याकडे आता सर्वांचे लक्ष लागले आहे.

महायुतीतील घटक पक्षांशी चर्चा

भाजपकडून जिल्हा बँकेसाठी स्वतंत्र पॅनेल उभारण्याची तयारी असली, तरी महायुतीतील शिवसेना आणि राष्ट्रवादी काँग्रेस (अजित पवार गट) यांच्याशी चर्चा केल्यानंतरच निवडणुकीचे अंतिम स्वरूप निश्चित केले जाणार आहे. जागावाटप, मतदारसंघनिहाय उमेदवार आणि पॅनेलची रचना याबाबत या चर्चेतून मार्ग काढला जाणार आहे. पालकमंत्री चंद्रकांत पाटील हे महायुतीतील घटक पक्षांच्या नेत्यांशी संवाद साधणार असल्याचे बैठकीत स्पष्ट करण्यात आले.

त्यामुळे भाजप स्वतंत्रपणे पॅनेल उभारणार की महायुतीच्या माध्यमातून मैदानात उतरणार, याकडे आता जिल्ह्यातील सहकार क्षेत्राचे लक्ष लागले आहे. महायुतीतील घटक पक्षांशी समन्वय साधताना स्थानिक पातळीवरील नेते आणि इच्छुक उमेदवारांची भूमिका महत्त्वाची ठरणार आहे.

सम्राट महाडिकांवर समन्वयाची जबाबदारी

जिल्हा बँक निवडणुकीच्या पार्श्वभूमीवर भाजपच्या स्थानिक नेत्यांमध्ये समन्वय साधण्याची महत्त्वाची जबाबदारी सम्राट महाडिक यांच्यावर देण्यात आली आहे. जिल्ह्यातील विविध तालुक्यांतील राजकीय समीकरणे, संभाव्य उमेदवार आणि महायुतीतील घटक पक्षांशी संवाद या पातळ्यांवर समन्वय साधण्याचे काम त्यांच्या नेतृत्वाखाली होणार आहे.

बैठकीस आमदार सुधीर गाडगीळ, आमदार गोपीचंद पडळकर, आमदार सत्यजित देशमुख, माजी आमदार पृथ्वीराज देशमुख, जिल्हा बँकेच्या उपाध्यक्षा जयश्री पाटील, राहुल महाडिक, चिमण डांगे, संग्रामसिंह देशमुख, पृथ्वीराज पाटील, बाळासाहेब होनमोरे, अमरसिंह देशमुख, वैभव पाटील तसेच भाजप नेते शेखर इनामदार यांच्यासह प्रमुख पदाधिकारी उपस्थित होते.

२१ जागांसाठी २,४४५ मतदार

जिल्हा मध्यवर्ती बँकेच्या २१ संचालक पदांसाठी निवडणूक होत असून अंतिम मतदार यादीत २ हजार ४४५ मतदारांचा समावेश आहे. त्यामुळे ही निवडणूक सहकार क्षेत्रापुरती मर्यादित न राहता जिल्ह्यातील राजकीय समीकरणांवरही परिणाम करणारी ठरण्याची शक्यता आहे. सर्वच राजकीय गटांकडून निवडणुकीची तयारी सुरू झाल्याने आगामी काळात पॅनेल निर्मिती आणि जागावाटपाच्या चर्चांना वेग येणार आहे.

Maharashtra News: तंजावरच्या मातीत घुमणार मराठीचा जयघोष! दक्षिण भारतातील पहिलं मराठी साहित्य संमेलन 23 तारखेला