सासवड : शासनाच्या स्वच्छ सर्वेक्षण २०२२ अंतर्गत आयोजित केलेल्या इंडियन स्वच्छता लीगमध्ये सासवड नगरपरिषदेने देशात अव्वल क्रमांक पटकावला असून शनिवारी ( दि १ ) दिल्ली येथील तालकटोरा स्टेडियम येथे केंद्रीय नगरविकास राज्यमंत्री कौशल किशोर आणि नगरविकास मंत्रालयाचे प्रधान सचिव मनोज जोशी यांच्या हस्ते पुरंदर हवेलीचे आमदार संजय जगताप, मुख्याधिकारी निखिल मोरे, मा नगराध्यक्ष मार्तंड भोंडे, आरोग्य प्रमुख मोहन चव्हाण यांनी हा पुरस्कार स्वीकारला.
शासनाच्या वतीने संपूर्ण देशपातळीवर या स्वच्छता लीग स्पर्धेचे आयोजन करण्यात आले होते. यामध्ये १८५० पेक्षा अधिक शहराचा समावेश करण्यात आला होता. यामध्ये २५ ते ५० हजार लोकसंख्या विभागामध्ये सासवड नगरपरिषदेने देशात अव्वल स्थान मिळविले. राष्ट्रपती द्रौपदी मुर्मू आणि केंद्रीय नगरविकास मंत्री हरदीपसिंग पुरी यांच्या प्रमुख उपस्थितीमध्ये हा सोहळा संपन्न झाला. यावेळी पालिका अभियंता व पाणीपुरवठा प्रमुख रामानंद कळसकर, समन्वयक राम कारंडे उपस्थित होते.
[read_also content=”लोकसंख्या नियंत्रणाचे प्रलंबित बिल संसदेने पास करावे : कृष्णदेव नंदगिरीजी महाराज https://www.navarashtra.com/maharashtra/parliament-should-pass-the-pending-population-control-bill-krishnadev-nandgiriji-maharaj-nrdm-333565.html”]
स्वच्छतेच्या बाबतीत संत गाडगेबाबा स्वच्छता अभियानापासून तत्कालीन नगराध्यक्ष चंदूकाका जगताप यांच्या मार्गदर्शनाखाली सासवड नगरपालिका आणि नागरीक स्वच्छतेच्या बाबतीत नेहमी जागरूक राहिले आहेत. आताही २०१८, २०१९, २०२० आणि २०२१ सलग चार वर्षे स्वच्छ सर्वेक्षण अभियानात देशपातळीवर नगरपालिका अव्वल राहिली आहे. सासवड नगरपरिषदेचे अधिकारी, कर्मचारी आणि सासवड नागरीकांच्या सहकार्याने हे यश मिळाले असून, यापुढेही नागरीकांचे असेच सहकार्य रहावे, असे आवाहन करीत आमदार संजय जगताप यांनी पालिका कर्मचारी आणि नागरीकांचे अभिनंदन केले आहे.
.png "Videos"){kind=small}
