Satara Voter List: साताऱ्यात मतदार यादीचा ‘SIR’ धक्का! ३.४२ लाख मतदार संशयाच्या कक्षेत; तर ८८ हजार मृत

Satara Voter List: सातारा जिल्ह्यात मतदार यादीच्या विशेष सखोल पुनरीक्षण अर्थात ‘SIR’ प्रक्रियेत तब्बल ३ लाख ४२ हजार मतदार संशयाच्या कक्षेत आले आहेत. यामध्ये सुमारे १ लाख ९१ हजार मतदार कायमस्वरूपी स्थलांतरित असल्याचे, तर सुमारे ८८ हजार मतदार मृत असल्याचे समोर आले आहे.

• साताऱ्यात मतदार यादीचा ‘SIR’ धक्का!
• ३.४२ लाख मतदार संशयाच्या कक्षेत
• तर ८८ हजार मृत

सातारा : सातारा जिल्ह्याच्या मतदार यादीत (Satara Voter List) विशेष सखोल पुनरीक्षणामुळे मोठी खळबळ उडाली आहे. आठही विधानसभा मतदारसंघांची प्रारूप मतदार यादी सोमवारी प्रसिद्ध होताच तब्बल ३ लाख ४१ हजार ९२५ मतदारांचे गणना प्रपत्रच उपलब्ध झाले नसल्याचे समोर आले. यामध्ये १ लाख ९१ हजार ३८३ मतदार कायमस्वरूपी स्थलांतरित, तर तब्बल ८८ हजार ४९० मतदार मृत असल्याची नोंद करण्यात आली आहे. त्यामुळे मतदार यादीच्या अचूकतेचा मुद्दा ऐरणीवर आला आहे.

या जिल्ह्यात एकूण २६ लाख ५१ हजार ३४७ मतदार आहेत. SIR मोहिमेत प्रशासनाने घरोघरी जाऊन गणना प्रपत्रांचे वाटप, संकलन आणि नोंदींची पडताळणी केली. त्यापैकी २३ लाख ९ हजार ४२२ मतदारांचे म्हणजे ८७.१० टक्के प्रपत्र प्राप्त झाले. मात्र १२.९० टक्के मतदारांच्या नोंदींचे प्रपत्र प्राप्त झाले नाही. अशा मतदारांची नोंद ‘Uncollectable EF’ या प्रवर्गात करण्यात आली आहे.

SIR Voter List: SIRमध्ये मोठी तफावत! तब्बल ४.६४ लाख मतदारांचा पत्ता नाही! ३१ ऑगस्टला प्रारूप मतदार यादी होणार जाहीर

या प्रवर्गातील आकडेवारीने प्रशासनासह राजकीय वर्तुळाचेही लक्ष वेधले आहे. १ लाख ९१ हजार ३८३ मतदार कायमचे स्थलांतरित असल्याचे आढळले आहे. ८८ हजार ४९० मृत मतदार असल्याची नोंद झाली आहे. याशिवाय ३४ हजार ९०५ मतदार अन्यत्र नोंदणीकृत किंवा दुबार असल्याचे आढळले. २६ हजार ३२६ मतदार गृहभेटीत सापडले नाहीत किंवा गैरहजर होते. अन्य कारणांमुळे ८२१ मतदारांचा समावेश करण्यात आला आहे.

ही नावे थेट वगळली जाणार नाहीत

दरम्यान, या आकडेवारीचा अर्थ संबंधित मतदारांची नावे अंतिम मतदार यादीतून तत्काळ वगळण्यात आली आहेत, असा नाही. ही प्रारूप यादी असून, संबंधित नागरिकांना आपली बाजू मांडण्याची संपूर्ण संधी देण्यात आली आहे. त्यामुळे नागरिकांनी अफवा किंवा गैरसमजांवर विश्वास न ठेवता आपली नोंद तपासावी, असे प्रशासनाने स्पष्ट केले आहे.

प्रशासनाने Absent, Permanently Shifted, Dead आणि Duplicate/Already Enrolled (ASDD) मतदारांच्या स्वतंत्र याद्याही उपलब्ध करून दिल्या आहेत. जिल्हा प्रशासनाच्या NIC संकेतस्थळासह मुख्य निवडणूक अधिकारी, महाराष्ट्र राज्य यांच्या संकेतस्थळावर प्रारूप यादी पाहता येणार आहे. तहसील कार्यालय, मतदार नोंदणी कार्यालय आणि संबंधित BLO यांच्याकडेही यादी उपलब्ध आहे.

नाव गायब? तर ३० सप्टेंबरपूर्वी धाव घ्या!

प्रारूप यादीत नाव नसल्यास प्रपत्र क्रमांक ६ भरून मतदार नोंदणी करता येईल. चुकीच्या नोंदीविरोधात प्रपत्र क्रमांक ७, तर नाव, पत्ता किंवा इतर तपशिलातील दुरुस्तीसाठी प्रपत्र क्रमांक ८ भरता येणार आहे.

३१ ऑगस्ट ते ३० सप्टेंबर २०२६ या कालावधीत दावे व हरकती स्वीकारल्या जाणार आहेत. हे अर्ज भारत निवडणूक आयोगाच्या Voters’ Service Portal वरून ऑनलाइनही दाखल करता येणार आहेत.मतदार नोंदणी अधिकाऱ्यांच्या निर्णयाविरुद्ध जिल्हा निवडणूक अधिकाऱ्यांकडे, तर जिल्हा निवडणूक अधिकाऱ्यांच्या निर्णयाविरुद्ध मुख्य निवडणूक अधिकारी, महाराष्ट्र राज्य यांच्याकडे अपील करता येणार आहे.

मतदार यादीतील नाव आहे म्हणून गाफील राहू नका आणि नाव दिसत नाही म्हणूनही शांत बसू नका. SIRनंतरची प्रारूप यादी प्रत्येक नागरिकाने तपासणे गरजेचे असून, नोंद चुकीची असल्यास निर्धारित मुदतीत दावा, हरकत अथवा दुरुस्ती अर्ज दाखल करावा, असे आवाहन जिल्हा प्रशासनाने केले आहे.

‘भाजपाकडून आता मतदार याद्यांतही चोरी करण्याचा प्रयत्न’, SIR कामावर हर्षवर्धन सपकाळांचा गंभीर आरोप