सोलापूरच्या विद्यार्थ्यांसाठी पिंपरी-चिंचवडमध्ये वसतिगृह
निगडी/पुणे : सोलापूर जिल्ह्यातील विद्यार्थ्यांसाठी पिंपरी-चिंचवड परिसरात वसतिगृह उभारण्यासाठी सोलापूर जिल्हा मित्र मंडळाला किमान २० गुंठे जमीन उपलब्ध करून देणार असल्याचे आश्वासन आमदार शंकर जगताप यांनी दिले. या जमिनीच्या उपलब्धतेसाठी आमदार सुनील कांबळे आणि विधानपरिषद सदस्या उमा खापरे यांनीही सर्वोतोपरी सहकार्य करण्याचे आश्वासन दिले.
सोलापूर जिल्हा विधानपरिषदेवर आमदार म्हणून निवड झाल्याबद्दल आमदार राजेंद्र राऊत यांचा नागरी सत्कार सोलापूर जिल्हा मित्र मंडळ, पुणे यांच्या वतीने निगडी येथील सीझन्स बँक्वेट हॉलमध्ये करण्यात आला. यानिमित्त पुणे, पिंपरी-चिंचवड आणि परिसरात वास्तव्यास असलेल्या सोलापूर जिल्ह्यातील नागरिकांचा स्नेहमेळावाही आयोजित करण्यात आला होता.
या वेळी सोलापूर जिल्हा मित्र मंडळाचे संयोजक अॅड.अतुल पाटील यांनी प्रस्तावना करताना उपस्थित लोकप्रतिनिधींकडे विद्यार्थ्यांच्या वसतिगृहासाठी पिंपरी-चिंचवड परिसरात किमान २० गुंठे जमीन उपलब्ध करून देण्याची मागणी केली तर उद्योजक दिनेश मोरे व अजय करंडे यांनी वसतिगृहाच्या बांधकामासाठी सर्व आर्थिक सहाय्य करणार असल्याचे जाहीर केले.
आमदार शंकर जगताप यांनी भाषणाच्या सुरुवातीलाच या मागणीची दखल घेत, वसतिगृहासाठी जमीन उपलब्ध करून देण्याचे जाहीर केले. विद्यार्थ्यांसाठी आवश्यक असलेल्या या उपक्रमाला सर्वतोपरी सहकार्य करण्याची ग्वाही त्यांनी दिली.
सत्काराला उत्तर देताना नवनिर्वाचित आमदार राजेंद्र राऊत म्हणाले, ‘‘जमीन मिळवण्यासाठी व वसतिगृहाच्या बांधकामासाठी मुख्यमंत्री देवेंद्र फडणवीस यांच्याकडून विशेष निधी मिळविला जाईल तसेच यापुढील काळात सोलापूर जिल्ह्यातून पुणे व पिंपरी चिंचवड परिसरात आलेल्या विद्यार्थी, उद्योजक आणि नोकरदार यांच्या पाठीशी खंबीरपणे उभे राहणार आहे. सोलापूर जिल्ह्यातील विद्यार्थ्यांसाठी वसतिगृह उभारण्याचा हा उपक्रम मार्गी लावण्यासाठी सामुहिक प्रयत्न केले जातील, असेही त्यांनी सांगितले.
या वेळी सोलापूर जिल्ह्यातील पुणे, पिंपरी-चिंचवड आणि परिसरात वास्तव्यास असलेले नागरिक मोठ्या संख्येने उपस्थित होते. कार्यक्रमाच्या आयोजनासाठी बाळासाहेब बावकर, प्रशांत घोडके, सुमित जगदाळे, अमोल गव्हाणे, किरण मोरे यांनी सहकार्य केले.
.png "Videos"){kind=small}
