शनिवार, 24 ऑक्टोबर 2026
ठाणे/ स्नेहा जाधव,काकडे : देशात धार्मिक विषमता पसरविण्याचे प्रयत्न होत असतानाच मुंब्र्यातील झेन झी अर्थात तरुणाई सामाजिक शांतता आणि सौहार्दाची जपणूक व्हावी, या उद्देशाने रस्त्यावर उतरली. “आय लव्ह मोहम्मद” आणि “आय लव्ह महादेव” असे नारे देत हिंदू-मुस्लीम तरूणांनी द्वेष नको, प्रेम हवे, असा संदेश दिला.
कानपूर येथे आय लव्ह मोहम्मद लिहिलेले पोस्टर्स लावून समाजात असंतोष निर्माण करण्याचा प्रयत्न करण्यात आला. या प्रकरणी उत्तर प्रदेश पोलिसांनी गुन्हे दाखल केले होते. या घटनेचा निषेध करण्यासाठी तसेच मुंब्रा हे उपनगर सामाजिक एकोपा जोपासणारे शहर आहे, हा संदेश देण्यासाठी आरिफ सय्यद , बासित शेख आणि यश चौधरी या तिघांनी मुंब्रा रेल्वे स्टेशन समोरील जामा मशिद येथे शांततापूर्ण निदर्शने केली.
शुक्रवारचा नमाज अदा केल्यानंतर हजारो तरूण रस्त्यावर एकवटले. कोणताही राजकिय पक्ष, संघटनांना सहभागी न करता केवळ 18 ते 25 वयोगटातील तरूणांनी हातात, आय लव्ह मोहम्मद अन् आय लव्ह महादेव असा संदेश लिहिलेले पोस्टर्स हातात धरून निदर्शने केली. याप्रसंगी संघर्ष नको, प्रेम हवे; शांततेसाठी गुन्हे दाखल झाले तरी चालतील; भेदाभेद नको, समता हवीय अशा घोषणा यावेळी झेन झी देत होते.
या आंदोलनाचे नेतृत्व करणारे आरिफ सय्यद म्हणाले की, हा देश सर्व जातीधर्मांचा आहे. मात्र, धर्माच्या नावावर लोकांची माथी भडकावली जात आहेत. तरूणांना शांतता हवी आहे. द्वेष पसरविणाऱ्या प्रवृत्तींना आम्ही या आंदोलनातून धडा दिला आहे. द्वेषाच्या दलदलीत आम्ही प्रेमाची फुले उगवणार आहोत, असे सांगितले.
याबाबत बासित शेख यांनी, आमचा लढा प्रेमासाठी आहे. दोन धर्मातील तेढ संपविण्यासाठी आज मोठ्या संख्येने तरुणाई एकवटली आहे. हाच संदेश द्वेष पसरविण्यासाठी पूरक आहे, असे सांगितले. तर यश चौधरी या तरूणाने सांगितले की, मुंब्रा हे असे शहर आहे की जिथे हिंदू, मुस्लीम, बौद्ध आणि इतर धर्मिय एकोप्याने रहात असतात. गणेशोत्सव- नवरात्रोत्सवात मुस्लीम बांधव आमच्या घरी येतात तर ईदला आम्ही त्यांच्या घरी जातो. सामाजिक एकात्मता जोपासणाऱ्या शहराची ओळख सबंध देशाला करून देण्यासाठी आम्ही आय लव्ह मोहम्मद अन् आय लव्ह महादेवचा नारा देत आहोत, असे सांगितले.
