रुग्णालय की निष्काळजीपणाचा अड्डा? कळवा रुग्णालयात जेवणाच्या ताटात आढळलं झुरळ
२८ ऑगस्ट रोजी रात्री कळवा रुग्णालयातील वॉर्ड क्रमांक ६ मध्ये डोळ्यांच्या शस्त्रक्रियेसाठी एक रुग्ण दाखल झाला होता. रात्रीच्या वेळी रुग्णालयाकडून रुग्णाला जेवणाचे ताट देण्यात आले. रुग्ण जेवण करत असतानाच ताटातील अन्नामध्ये झुरळ दिसून आले. हा प्रकार रुग्णाने तातडीने निदर्शनास आणून दिल्यानंतर संपूर्ण वॉर्डात संताप व्यक्त करण्यात आला, अशी माहिती मनसे जनहित व विधी विभागाचे ठाणे शहर अध्यक्ष स्वप्नील महिंद्रकर यांनी दिली.
रुग्णांच्या तक्रारींकडे प्रशासनाचा कानाडोळा
कळवा रुग्णालयात ठाणे, कल्याण-डोंबिवली, मीरा-भाईंदर आणि ग्रामीण भागातून दररोज हजारो गरीब व गरजू रुग्ण उपचारासाठी येतात. येथे दररोज हजारो रुग्णांना जेवण पुरवले जाते. रुग्णांना दिल्या जाणाऱ्या जेवणाच्या निकृष्ट दर्जाबाबत यापूर्वीही अनेकदा तक्रारी करण्यात आल्या होत्या. मात्र प्रशासनाने त्याकडे नेहमीच कानाडोळा केल्याचा आरोप होत आहे.
शहर अध्यक्ष स्वप्नील महिंद्रकर यांनी म्हटले की, “आजारी रुग्णांना स्वच्छ आणि सकस आहार मिळणे हा त्यांचा मूलभूत हक्क आहे. अन्नात झुरळ आढळणे म्हणजे रुग्णांच्या जीवाशी थेट खेळ मांडण्यासारखे आहे. राज्यभरात अन्न व औषध प्रशासन हॉटेल्सवर कारवाई करत असताना, ठाणे महानगरपालिकेच्या रुग्णालयात एवढा अक्षम्य प्रकार घडूनही एफडीए आणि प्रशासन डोळेझाक का करत आहे? या प्रकरणातील दोषी ठेकेदाराबा परवाना तत्काळ रद्द करून त्याला काळ्या यादीत टाकावे आणि जबाबदार रुग्णालय प्रशासनावर गुन्हे दाखल करावेत”.
(डिस्क्लेमर: हे नवराष्ट्र वृत्तपत्राचे स्वयंचलित न्यूज फीड आहे. ते navarashtra.com च्या कर्मचाऱ्यांनी संपादित केलेले नाही.)
.png "Videos"){kind=small}
