Ambadas danve- eknath shinde
मुंबई : प्रदीप पूर्णेकर यांच्या कुटुंबीयांची शिवसेना (उद्धव बाळासाहेब ठाकरे) पक्षाचे नेते अंबादास दानवे यांनी भेट घेतली. यावेळी माजी खासदार राजन विचारेही उपस्थित होते. या भेटीनंतर पत्रकार परिषद घेत दानवेंनी राज्य सरकार आणि पोलिसांच्या तपासावर गंभीर प्रश्न उपस्थित केले. मुख्यमंत्री देवेंद्र फडणवीस यांची पूर्णेकर कुटुंबीयांसह भेट घेणार असल्याचेही त्यांनी सांगितले. (Pradeep Purnekar Murder Case)
या प्रकरणातील आरोपींचे कॉल डिटेल रेकॉर्ड (CDR) पूर्णपणे तपासण्याची मागणी दानवेंनी केली. एफआयआरमध्ये नाव असलेल्या सर्व संबंधितांचे सीडीआर तपासले पाहिजेत, असे ते म्हणाले. तपास यंत्रणा योग्य पद्धतीने काम करत नसल्याचा आरोप करत त्यांनी तपास अधिकाऱ्यांवर कुणाचा दबाव आहे, असा सवाल उपस्थित केला.
यावेळी दानवेंनी एकनाथ शिंदे यांच्यावरही निशाणा साधला. “स्वतःला मसीहा समजणारे कुठे गेले? एवढ्या मोठ्या कार्यकर्त्याचा मुडदा पाडला तेव्हा इकडे का नाही आले?” असा सवाल त्यांनी केला.
प्रदीप पूर्णेकर यांच्यासोबत काम करणारे पदाधिकारी संतोष शिर्के यांच्या कार्यालयाची रेकी करण्यात आल्याचा आरोपही दानवेंनी केला. यासंदर्भात व्हिडिओ आणि सीसीटीव्ही पुरावे असल्याचा दावा त्यांनी केला.
तपास यंत्रणांनी योग्य तपास केला नाही, तर उपलब्ध पुरावे उच्च न्यायालयात सादर करू, असा इशारा दानवेंनी दिला. या प्रकरणाचा तपास निष्पक्ष अधिकाऱ्याकडे सोपवावा आणि खटला फास्ट ट्रॅक कोर्टात चालवावा, अशी मागणीही त्यांनी केली.
सरकारने एसआयटी स्थापन केली असली, तरी परिस्थितीत अपेक्षित सुधारणा झालेली नाही, अशी टीका त्यांनी केली. आरोपींना कठोर शिक्षा व्हावी, अशी भूमिका मांडताना त्यांनी दोषींना फाशी देण्याची मागणी केली.
गृहखाते मुख्यमंत्री देवेंद्र फडणवीस यांच्याकडे असल्याने त्यांनी या प्रकरणात लक्ष घालून न्याय द्यावा, असे दानवे म्हणाले. पूर्णेकर कुटुंबीयांसह मुख्यमंत्र्यांची लवकरच भेट घेणार असल्याचेही त्यांनी स्पष्ट केले.
“मुख्यमंत्र्यांनी न्याय दिला नाही, तर आमच्याकडे वेगळे दरवाजे आहेत,” असा थेट इशारा दानवेंनी दिला. त्यामुळे या प्रकरणातील तपास, सरकारची भूमिका आणि पुढील न्यायालयीन हालचालींकडे राजकीय वर्तुळाचे लक्ष लागले आहे.
.png "Videos"){kind=small}
